Лакрал райондалул бакIчи Юсуп МахIаммадовлул каялувшиннаралу, администрациялий хьунни райондалул террорданийн къаршисса комиссиялул батIаву. Муний гьуртту хьунни райондалул террорданийн къаршисса комиссиялул члентал, идарарттал каялувчитал.
БатIаврий ххалбигьлай бия ЦIусса шинал байрандалул гьантрай чIявусса агьали бавтIсса кIанттурдай мюхчаншиву дуруччаврийн багьайсса суаллу.
ЦIусса шинал байрандалийнсса хIадуршиннарал давурттая бувсунни райондалул администрациялул бакIчинал хъиривчу, террорданийн къаршисса комиссиялул секретарь Юсуп Рамазановлул. Ихтилатру бунни Аьрасатнал МВД-лул «Лакский» МО-лул каялувчи Марат МахIмудовлул, КIулшиву дулаврил управлениялул каялувчи Явсупи ХIамзаевлул, Лакрал ва Ккуллал районнал аьрали комиссар ХIасан Массуевлул, азарханалул хъунама хIакиннал хъиривчу ХIусайн Гъазиевлул ва цайминнал.
Ххалбигьлагьисса суаллал ялув кьамул бунни муницIун бакьлакьисса хIукму, ЦIусса шинал байрандалул гьантрай агьали ва агьамсса объектру террордания мюхчан бансса, низам дуруччинсса.
