ЦIусса шинавун бухлахисса гьантрай ЦIуминалийсса ТIюхчардал школалий хьунни Новостройрал школардай марцIну ххювардай дуклакисса оьрчIан райондалул администрациялул чулуха бахшишру дуллалисса шадлугъ.
Шиккун оьвкуну бия ЦIуминалийсса цинявппа школардаясса отличниктурайн, миннал нитти-буттайн ва учительтурайн. Шадлугърай гьурттушинна дан ТIюхчардал 2-мур школалийн бувкIун бия ЦIуссалакрал райондалул бакIчи ХIажи Айдиев, мунал хъиривчу Алик Исрапилов, райондалул администрациялул ва КIулшивуртту дулаврил управлениялул вакилтал, шяраваллал бакIчитал. Ххуйну дуклакисса оьрчIан райондалул администрациялул чулуха бахшишру даву ЦIуссалакрал райондалий ххаллилсса аьдат хьуну дур. Мунил дуклаки оьрчIавун дуккаврихсса гъира бутлай бур.
2014-2015 дуккаврил шин марцIну ххювардай къуртал дурсса райондалий 546 оьрчI ур, миннава 182 оьрчI ур ЦIуминалийсса 9-гу школалиясса.
Шадлугърал мажлис тIитIлай, цинявппагу шиккун бавтIми ЦIусса шинащал барча бунни ЦIуссалакрал райондалул бакIчи ХIажи Айдиевлул.
— На ххарира ЦIусса шин жува укун ххуйсса ккаккиярттащал хьунадакьлай тIий. Ххарира жулла райондалул школардай ххуйну дуклакисса оьрчIру гьарза хьуну тIий.
Жуятура нанисса шинал марцIну ххювардай дуклакисса 546 оьрчI ур райондалул школардай. Вайннаяр хъар хьунтIисса райондалулгу, республикалулгу бучIантIимур. Умуд бур ххуйну дуклакисса оьрчIру жучIава ялу-ялун ххишала хъананссар тIисса, — увкунни ХIажи Айдиевлул. Хъирив райондалул бакIчинал дакIний личIансса бахшишру дунни 2014-2015 дуккаврил шин марцIну ххювардай къуртал дурсса дуклаки оьрчIан. Миннан буллунни кIулшивуртту куртI дансса, цIу-цIусса затру лахьхьинсса луттирду. Дуклаки оьрчIал рирщунни райондалул бакIчинащал ва администрациялул вакилтуращал дакIний личIансса суратру.
Хъирив хьунни ЦIусса шин хьунадакьлакьисса дялахъру. Дуклаки оьрчIал дянив хьунни личIи-личIисса бяст-ччаллу ва тIуркIурду.
Гьар мудан кунма, шадлугърал мажлис чIюлу бунни райондалул Культуралул управлениялул хъунмур ХIабибат Буттаевал каялувшиндаралу Культуралул къатлул зузалтрал хIадур дурсса концертрал.
Хъирив кьини укуннасса шадлугърал мажлис хьунни ЦIуссалакрал райондалий, ЦIуссалакрал шяравугу. Шикку барча буллай ва бахшишру дуллай бия 2013-2014 дуккаврил шинал школа мусил медальданий къуртал бувсса оьрчIан. Мукунсса 19 оьрчIан бахшиш дунни каний дахIайсса мусил ссятру. Шиккугу хьунни Дякъил Ттатта, Марххала душ ва цаймигу магьрал персонажру гьурттусса тяхъасса байран.
А. Аьбдуллаева
И. Саидова
