Январь зурул 14-нний ЦIуссалакрал райондалий ивтунни цIусса прокурор. Аьрасатнал Федерациялул хъунама прокурор Юрий Чайкал 2015 шинал декабрь зурул 23-нний бувсса хIукмулийн бувну, ЦIуссалакрал райондалул прокурорну ивтунни Аьлилов ХIусайн Аьбдурашидович.
ЦIуссалакрал райондалийн, цIуну ивтсса прокурорнайн къуллугъ тапшур бан, увкIунни ДР-лул прокурорнал хъиривчу, юстициялул хъунама советник Заур Тарханов. Ванал кIицI лавгунни ХIусайн Аьбдурашидович цалла даву кIулсса, хъинну жаваблувсса ва захIмат ххирасса, дакI марцIсса зузала ушиву.
ХIусайн Аьлилов цIусса къуллугъращал барча унни ЦIуссалакрал райондалул бакIчинал бигарду чIумуйнусса щаллу буллалисса Султан ХIамзатовлул. Цалвамур ихтилатраву ХIусайн Аьлиловлул барчаллагь увкунни Заур Тархановлухь ва ДР-лул прокурор Рамазан Шахнавазовлухь, цайнна вихшала дурну, хъуннасса жаваблувшинна дусса райондалул прокурорнал къуллугъ тапшур баврихлу.
ЦIусса прокурор къуллугърай итлатисса батIаврий гьуртту хьунни ЦIуссалакрал райондалул прокуратуралул зузалт, райондалул судрал коллектив, гужирдал структурардал зузалт, шяраваллал бакIчитал ва райондалийсса личIи-личIисса идарарттал каялувчитал.
