Республикалул цинявппагу школардай май зурул 25-нний бивщунни школа къуртал буллалисса оьрчIансса махъва-махъсса гюнгутIи. ДакIнийхтуну хIадур дурну, хъинну асар хьунну ларгунни махъва-махъсса гюнгутIул кьини ТIюхчардал школалийгу. ЦIуминалий цIуну бувсса ТIюхчардал школалул кIилчинсса выпуск хъанай дия ва. Гьашину 11-мур классрал выпускраву ия 7 оьрчI, 9-мур класс къуртал буллай бия 17 оьрчI.

Байран асар хъанай дия оьрчIалгу, нитти-бутталгу, учительтуралгу хIарачатрайну чIюлу дурсса школалул хIаят­равун буххайхтува.
КIюрххила школалул хIаят тIутIавун дахьлаган дурну, чанна лахъан дурну дия чIюлуну ларх­сса выпускниктурал, миннахь ххуллухъин чин бувкIсса нитти-буттахъал, гьарица чулуха баллай бия шадну лечлачисса мюрщи оьрчIал чIурду.
ОьрчIру цIусса оьрмулул ххуллийн тIайла буккан, миннахь тIайлабацIу учин бувкIун бия ЦIуссалакрал райондалул Счетный палаталул председатель Аьвдурашид Буттаев, шяраваллил администрациялул хъунаманал хъиривчу ХIасан ХIасанов, ДЮСШ-рал директорнал хъиривчу ХIамид Нахаев.
Школалул директор Дадаев ЩайхахIмад Рамазановичлул, школа къуртал буллалисса 9-мур ва 11-мур классрал выпускниктал цинявппа экзаменнайн итабавкьушивугу бувсун, оьрчIахь ххуллухъин тIисса ихтилат бунни.
— ХIакьинусса кьини зул оьр­мулуву ххариссагу, пашман­ссагу асардацIун дархIусса дур. ОьрчIшивугу кьариртун, зу бухлай буру хъуниминнал оьрмулувун. На чIа тIий ура зун, ххуйну экзаменнугу дуллуну, зува язи бувгьусса дуккаврил идарарттавун буххан. Гихунмайсса оьрмулуву зу бивзсса гьарицагу ша тIайла бавцIусса хьуннав. Умуд бур зуя кулпатиртталгу, школалулгу, шяраваллилгу цIа бюхттул дансса инсантал хьун­ссар тIисса. Хъуннасса ххаришиву дикIай жулва выпускниктурая ххуйсса хаварду бавсса чIумал. Вихшалдарай ура зу ТIюхчардал школалул цIа бюхттулну ларсун нантIишиврийн. Гьай-гьай, бигьану къабикIантIиссар, зул оьрмулул ххуллий хьунадакьлантIиссар захIматшивурттугу, миннул хьхьичI ник къарирщуну, зува бувгьусса ххуллийх кьянкьану бачинсса кьудрат дулуннав зу­хьхьун.
ДакIний битияра, школалия лавгун махъгу, школалул нузру зун тIиртIунна дикIантIиссар, жугу мудан хIадурну буссару зухь махъ бусан, маслихIат бан, чIарав бацIан. Илкинсса хьуннав зул ххуллу!
Цалва ихтилат къуртал бувну махъ ЩайхахIмад Рамазановичлул бувсунни дуккаврил шинал дайдихьулий баян бувну бивкIшиву «Яла ххуймур класс» тIисса конкурс. Му конкурсраву ххув хьусса 7-мур классран шадлугърал даражалий дуллунни хIурматрал грамота ва арцуйнусса бахшиш. Мукунма ванал бувсунни дуккаврил ккаккиярттайн бувну ТIюхчардал школалул райондалий 4-мур кIану бугьлай бушиву, спортрал кка­ккиярттал чулуха тIурчаннив хьхьичIва-хьхьичI бушиву. Ши­ккува барчагу бувну, бахшишру дунни райондалул ва республикалул олимпиадарттай, конкурсирдай хьхьичIунсса кIанттурду бувгьусса дуклаки оьрчIан ва цалла давриву хьхьичIунсса ккаккияр­тту чIалачIи дурсса, школалул оьр­мулуву чялишсса гьурттушинна дуллалисса учительтуран. Школалул директорнал хъунмасса барчаллагь увкунни махъва-махъсса гюнгутIул байран хIадур дан хъунмасса захIмат бивхьусса, чIарав бавцIусса нитти-буттахь.
Школа къуртал буллалисса оьрчIал дакIний личIансса бахшишру дунни 1-мур классрал дук­лаки оьрчIан, цахьра дарсру дирхьусса учительтуран. Мюрщими классирттал оьрчIалгу выпускниктурахь чаннасса ва ххарисса оьрму чIа тIисса махъру увкунни шеърирдайну ва балайрдайну.
Выпускниктурал тапшур дунни «КIулшивурттал кIула» хъирив наними классирттал дуклаки оьрчIайн.
Буниялагу дакIний личIансса, тамашасса хьунни ва кьинисса байран ТIюхчардал школалий. Гьарица учительнал хасиятрацIун, мунал дишайсса дарсирдацIун бавхIусса махъру бусса балайрду итабакьлай, цинявппа тяхъа бу­ккан бунни. Выпускниктурал дянив баян бувну бивкIсса «Класс­раву язима», «Паракьатшиву къакIулма», «Классрал баргъ», «Ссигъасса ссурухIи», «Ялун къаливчусса гьунарду», «Хъинмунил сиптачи», «Спорт — оьрмур» тIисса номинациярду бусса конкурсраву ххув хьумигу аьлтту бунни ва байрандалий.
Бивщунни махъва-махъсса гюнгутIи. ОьрчIру школалия личIи хъанай якьама бувккунни учительталгу, цивппа оьрчIругу.
Байрандалул мажлис къуртал буллай, выпускниктурахь ххуллухъин увкунни классрал каялувчи Жамиля Кьурбановал.
Мажлис къуртал хьуну махъ, учительталгу, дуклаки оьрчIругу гъан хъанай, выпускниктурал гьухърай тIайлабацIу чIа тIутIисса чичрурду дуллай, дакIний личIансса суратру ришлай бия.
А. Аьбдуллаева,
И. Саидова