ЦIуссалакрал райондалийсса школарттай цIусса дуккаврил шин дайдишиннин школартту бакьин буллай, чялишсса давуртту най дур. Август зурул ахирданийннин райондалийсса цинявппагу школарттай ва садикирттай ремонтру дурну къуртал дансса пикри бур.

Зузалтрал ва техперсоналданул хIулухIлай, сирду бук­лай бакьин буллай бур школарду. Ремонтру къадан тIий бур дахьва дукIу зун бивкIсса ЦIуссачIурттащиял ва Гьамиящиял школарттай. КIицI лагансса хъунисса дахханашивуртту цавагу школалий дуллан тIий бакъар, амма ляличIисса къулагъас дан тIий бур ми идарарттай дукра дуллали­сса кIанттурдах, ялув бацIан тIий бур электричествалуцIун дархIусса диялдакъашивуртту дукьан дан. Вай идарарттал хIаятирттаву бишин тIий бур чирахъру.
ЦIуссалакрал райондалул КIулшивуртту дулаврил уп­рав­лениялул хъунама Руслан МахIаммадовлул бусласимунийн бувну, школарттай ва детсадир­ттаву ремонтру дан итадаркьуну дур 1 млн. ва 300 азарда къуруш арцул. Ми арцу дачIин тIий дур цинярдагу кIулшивуртту дулаврил идарарттайх дуллан­сса давуртту хIисавравун ларсун. Дагъусттан Республика хьхьичIуннай даву мурадрай кьамул дурсса приоритетсса проектру щаллу дуллай хъуннасса къула­гъасравун лавсун бур республикалийсса личIи-личIисса кьай итадакьлакьисса идарартту, мюр­щисса ва дянив­сса бизнесраха зузими. Райондалул школарттал гьашину контракт чичин тIий дур школалий ремонт­ру дансса материаллу жулва ишбажаранчитураща ласаван. Мукун школарттай ремонтру дансса сир лавсун бур Дагъус­ттаннайсса «ПП «Лакокраска» ООО-лучIату.
— ЦIусса дуккаврил шин оьрчIал ва учительтурал дайди­шинтIиссар бакьин бувсса, марцIсса школарттай, — тIий ур Руслан МахIаммадов.
Лажин хIадур дурссар
А. Аьбдуллаевал