Июньдалул 19-20-нний Къарачай-Чаргаснал Республикалий Домбайллал шяраву хьунни СКФО-рал (Ухссавнил Ккав­кказуллал федерал округрал) кекусинкай каратэрал чемпионат ва первенство «Кубок Домбая».

ХIасан Аьдилов
Аьрасатнал яла бюхттулмур зунттуйсса курортрайн бувкIун бия 150-нная ливчусса спортсментал Ухссавнил Ккавкказуллал 5 региондалия. Мунил хIакъираву жухь бувсунни «Илчилул» редакциялийн увкIсса, «Иппон» спортклубрал каялувчи, ЦIуссалакрал райондалиясса ХIаммадов Русланнул.
Ванал бувсмунийн бувну, ЦIуссалакрал 1-мур ДЮСШ-рал цачIундур командалувасса 8 спортс­меннавату 7-ннал бувгьуссар хьхьичIунсса кIанттурду, вай циняв занай бур «Иппон» спортклубравун тренер ХIаммадовлучIан.
1-ми кIанттурду бувгьуну бур Шушиятусса ХIабибуллагь Давыдовлул, ТIюхчаратусса Ванати АьбдурахIмановлу л, ТIюхчаратусса ХIаммад ХIаммадовлул ва ПатIи­ма ХIаммадовал.
2-ми кIанттурду бувгьуну бур Кривая балкалий ялапар хъана­хъисса (Аьхъардал школа) Сайпуллаев Астемирдул ва МахIаммадов АхIмадлул.
3-мур кIану бувгьуну бур Дахадаевкалиясса (ТIюхчардал школа) Абакаров Сунгъурбаглул.
Бяст-ччаллал хIасиллайн бувну командарттавату 1-мур кIану бувгьунни Дагъусттаннал каратэчитурал.
Дагъусттаннал кекусинкай-каратэрал федерациялул президент Арсен ХIаммадовлул Къарачай-Чаргаснал Республикалул жагьилтурал иширттал комитетрал ва гара республикалул коммунист партиялул чулуха буллунни хасъсса дип­лом, спорт хьхьичIуннай дуллалаврихлу ва жагьилтал патриотшиврий тарбия буллалаврихлу.
Чемпионатрая махъ спортсментуран сакин бувна зунттавун канатрал ххуллийх лавхъун лагай­сса экскурсия. Тренертал ва спорт­сментал рязину бия чемпионатрал ва первенствалул сакиншинначитурая ва «Домбай» тIисса гостиницардал комплексрал каялувчитурая, ххуйну кьамул баврихлу ва бигьалагансса шартIру сакин даврихлу.