Февраль зурул 13-нний Ккуллал райондалул администрациялул актовый залдануву хьунни райондалийсса шяраваллавусса къатрал заллухъруннал гай цалла душиву тасттикь буллалисса чагъарду (зеленкартту) хьхьарану буллалаврин хас дурсса батIаву. Шикку гьуртту хъанай бия Ккуллал райондалул бакIчи Сяид Сулайманов, ванал хъиривми, райондалул Мажлисрал депутатътурал председатель Гъази Оьмаров , цаппара идарарттал бакIчитал, шяраваллал администрациярттал каялувчитал.

БатIаврий райондалул бакIчинал бувчIин бувна шяраваллавусса инсантурал къатри, шиккусса идарартталминнущал заллу ккаккан уллалисса ча­гъарду му ца жулла райондалия­сса тIалавшинна дакъача, Аьрасатнал хIукуматрал тIалавшинна душиву.
ЦIуну итадаркьусса законнайн бувну, къатрая ласайсса налогру заллу уманая дакъа (зеленка буманая) ягу хIукуматрал дуллуну диркIсса къатри цалашиврий дацIан дурминная (приватизация дурминная) дакъа ласун ихтияр дакъар. Шяраваллал администрациярттал каялувчитал кIицI буллай бия шяраваллаву душиву чIярусса къатри, инсантал бивзун лавгун кьадирт­сса.Гай къатрал заллу цу уссарив кIул уван къахъанахъишиву.Шиккува чара бакъа ца укун­сса затгу жула инсантурахь кIицI буван ччива. Аьрасатнал Президентнал тIалавшиндарайн бувну 2018-ку шинайнин Аьрасатнаву царагу квадрат метра къадикIан багьлай бусса бур заллу акъасса. Мунийн бувну, цу-унугу увкIун, жула къатрал, аьрщарал ча­гъарду жухлува булланссар тIий къаялугьий, цала хъуслил заллушиву дуван багьлай бур. Къатри хъанахъиссар хъусну. Амма пенсиялийн увксса инсанная ганал царай къатрая (кIирайра, шаннайра дусса бурхха) налог къаласайссар. Вай къаласуншиврул къатрал чагъарданущал (зеленкалущал) паспортращал ва пенсиялийн увкшиврул книжкалущал налогирттал къуллугърайн гьан аьркинссар, гьарца шинах документру тикрал буллай. Вагу жуннасса куклушивур.
БатIаврил ахирданий шяраваллал бакIчитал, райондалул администрациялул чулухасса вакилтал буржлув бувна, циняв шяраваллаву Дагъусттаннал БакIчинал Рисалалия ихтилатру бувну, цала-цала пикрирду кIибачIин.