Сентябрьданул 1-нний щаллагу дунияллул оьрчIру лавгунни школалийн. Му хъанай дур ххуйсса байран, чаннасса иш оьрчIал оьрмулувусса, яла-яла цалчин школалийн бувкIминнан. Мукунсса, Цалчинмур занг рищаврин хас дурсса линейка хьунни жул, Халид Мурачуевлул цIанийсса, Ккуллал 1-мур школалийгу.

Лагмава бавцIуну бия дуклаки оьрчIру, цалва-цалва классрал каялувчитуращал. Миннал лагмагу бия нитти-буттахъул, шяраваллил агьлу. Дуклаки оьрчIру бия цащава шайкун чIюлу хьуну бувккун. Миннавугу яла-яла итталун багьлай бия 1-мур классравун нанисса оьрчIру. Гьашину дукIумур шинах бурувгун оьрчIру гьарзасса бия. Райондалул кIулшиву дулаврил управлениялул хъунама АхIмадов Шамиллул тIийкун, цIана шиная шинайн оьрчIал аьдад чан хъанай дур. Мунин сававгу – жагьилсса кулпатру ялавай бизлай бушивур.
Цалчинмур занглил байран тIиртIуна школалул тарбиялул завуч Абакаров ХIусманнул ва барча бувна циняв дуклаки оьрчIру цIусса дуккаврил шинащал, бувсуна ларг­сса дуккаврил шинал оьрмулия. Школалул директор Къянчиев Русланнул бувсуна ларгсса 2013-2014-ку шинал хIасиллая.
— Гьашинугу жулва школалул бувгьуссар райондалул олимпиадардай цалчинмур кIану (109 балл). КIилчинмур кIану бувгьусса школалул бия 64 балл. Мукунна дурссар хьхьичIунсса гьурттушиву респуб­ликалий дуллалисса олимпиадардайгу. Муданма кунма, гьашинугу бувгьунни жулва оьрчIал цалчинсса кIанттурду спортрал тIуркIурдавугу. Мукунма школалул командалул бувгьунни цалчинсса кIану «Нигь дакъасса нигь» («Безопасное колесо») тIисса конкурсраву ва гьуртту хьунни Гъунив хьусса соревнованиярдай.
Чара бакъа бусан багьлай бур оьрчIал школа къуртал баврия. Ца оьрчIан дулун багьунни оьрус мазрал ЕГЭ кIилчин. Яламиннал шайкун дуллунни ЕГЭ ва циняв оьрчIаща бювхъунни аттестатру ласун. Миннава чIявуми бувххунни личIи-личIисса дуккаврил идарарттавун, — увкунни ванал.
Цалва ихтилат къуртал буллай, ванал барча бувна циняв ва байрандалущал.
Хъирив ванал махъ буллуна райондалул чулухасса уполномоченный Маммаев Рамазаннухьхьун. Муналгу цалва ихтилат байбивхьуна барча баврия. Бувсуна Ккуллал школа мудангу хьхьичIунминнавух бивкIшиву ва бушиву. Бувсуна Бесланнал трагедия хьуну 10 шин хъанай душиврия, мугъаятну бикIан аьркиншиврия мудангу.
Школалул учитель Исакьов МахIаммал увкуна:
— Олимпиадардай 1-мур кIану бугьарчагу, оьрчIал кIулшиву гуж­сса дакъар. ОьрчIру лахьлай бакъар. ЕГЭ-рдал хIасиллу райондалийра лагьсса хьуну дур. Мунияту аьркинни оьрчIал ва нитти-буттахъал хъуннасса ургъил дан дуккаврих, — куну.
Дуклаки оьрчIру барча буллалисса ихтилат бунни Жагьилтурал ва спортрал комитетрал хъунама Чаринов МахIаммалгу ва чIа куна дуккавриву тIайлабацIу, оьрмулуву цIуллушиву.
Ихтилатирттая махъ, ххуйну дуклай бивкIсса 64 оьрчIан дуллуна грамотарду.
Ттулла чичру къуртал дуллай, укунсса зад къаучин къабучIир. Линейка дия хас дурну 1-мур классравун нанисса оьрчIан 1-мур занг рищаврин. Циваннив къакIула, 11-мур классрал дуклаки оьрчIал хъарай 1-мур классрал оьрчIгу щяивтун, лагма ча уккави, кIиччава, ца кIанттай бавцIунувагу занг къарирщуна. Ялагу бучIия музыкагу итабакьин, та кьини цичIав дягъу дусса кьинигу дакъахьувкун.
Карина Далиева