Ларгсса нюжмардий Лакрал райондалий хьунни депутатътурал ирглийсса сессия. Муний гьуртту хьунни райондалул собраниялул 20 депутат, шяраваллал бакIчитал, идарарттал каялувчитал. Хасну сессиялийн бувкIун бия ДР-лул БакIчинал ва ХIукуматрал администрациялул правовой управлениялул каялувчинал хъиривчу ХIабибуллагь Малачилов, ДР-лул БакIчинал зунттал кIанттул округрайсса вакилнал хъиривчутал Оьмари Аьлиев ва МахIаммад МахIаммадов, ДР-лул БакIчинал ва ХIукуматрал администрациялул виваллил политикалул отделданул каялувчинал хъиривчу Амир МахIаммадов. БатIаву, тIигу-тIиртIуну, дачин дурну ия райондалул депутатътурал собраниялул хъунама Шамил Абачараев.
БатIаврий ххал бигьин ккаккан бувсса суаллу бия укунсса: райондалул бакIчи увчIин; райондалул уставраву ххибавуртту ва дахханашиннарду даврия.
Цалчинмур суалданул ялув Шамил Абачараевлул бувсуна райондалул бакIчи увчIлачIишиву конкурсрал комиссиялул личIи увсса кандидатътурава депутатътурал чIурду буллуну. Конкурсрал комиссия цуппагу сакин хьуну бия Республикалул БакIчинал чулухасса вакилтурая ва райондалул администрациялул зузалтраяту.
Хъирив конкурсрал комиссиялул хъунама ХIабибуллагь Малачиловлул батIаврий гьуртту хъанахъими кIул бувна райондалул бакIчинал къуллугърайн цIарду рирщусса инсантуращал. «Райондалул бакIчинал къуллугърайн документру буллуну бия 5 кандидатнал. Миннавасса кIиннал документру щаллу бакъашиврийн бувну, ми бувчIавурттайн итакъабавкьуссар. Ца кандидат цува къаувкIунни. Мунийн бувну, бувчIавурттайн итаавкьуссар 2 кандидат – Юсуп МахIаммадов ва Марат Бугъуннаев. Цалчин чIу булун ккаккан дуруна Юсуп МахIаммадовлул цIа. Мунахлу сайки цинявппа депутатътурал чIурду буллуна.
Юсуп МахIаммадовлул барчаллагь увкуна депутатътурахь, цайннасса вихшалдарахлу, цува цIунилгу райондалул бакIчину ацIаву хъинчулий ккавксса республикалул БакIчи Рамазан АьбдуллатIиповлухь.
«Ххюра шинал лажиндарай райондалий сакин хьуну дуссар цалла даву кIулсса ва дакI тIайлану зузисса администрациялул пишакартурал ва шяраваллал администрациярттал бакIчитурал кьюкьа. ДакI дарцIуну ура гихунмайгу вайннащал авкьуну, ца пикрилий зун бюхъанссар, жул даврин кьимат райондалул агьалинал бищунссар», — увкуна Юсуп МахIаммадовлул.
Райондалул уставраву дахханашиннарду даврил ялув ихтилат бувна райондалул иширтталсса буллалисса ХIажи Чавтараевлул.
ДакIнийхтуну барча уллай буру МахIаммадов Юсуп ХIамидлул арс Лакрал райондалул бакIчинал къуллугърайн цIунилгу увчIаврищал. Лакрал райондалул хIакьинусса кашилуцIун ва ялун бучIантIимуницIун цал цIа вихшалдарай дархIусса инсаннан чIа тIий буру тIайлабацIуртту, цIу-цIусса хьхьичIуннайшивуртту, ххуй-хъиншивуртту. БацIаннав арулххуттай ина бан дакIниймур ва буллалимур.
«Илчи» кказитрал редакция