Итни кьини райондалул администрациялий хьунни райондалул бакIчи Юсуп МахIаммадовлул батIаву. Муний гьуртту хьунни райондалул бакIчинал хъиривчутал ва идарарттал каялувчитал.

Ххал бигьлай бия муниципалитетирттал даврил агьамсса буруккинтту, налогру датIаврийн багьайсса суаллу, райцентрданул марцI-чапалшиврул тагьарданийн ва экстремизмалия мюхчан шаврийн багьайсса суаллу.
БатIаву тIитIлай, райондалул бакIчинал бувсуна республикалий хьусса хъуни-хъунисса мероприятиярттая, миннуй ххал бивгьусса агьамсса буруккинттая.
Муния махъ бавтIминнащал кIул увна райондалул УСЗН-лул цIусса каялувчи Рамазан Майрамов, чIа увкуна жагьилсса каялувчинан давриву тIайлабацIу.
Гихунмай ва шинал 11 зурул дянив райондалий налогру датIаврил тагьардания балжину бувсуна райондалул бакIчинал хъиривчу Ансар Къажлаевлул.
Райцентрданул ва шяраваллал марцI-чапалшиврул тагьардания буслай, Юсуп МахIаммадовлул кIицI лавгуна, нюжмар ляхну, ца-ца чIумал сайки гьарца нюжмардийгума субботникру дуллайсса-дуллайнма бунува, марцIшиву дуруччин бюхълай бакъашиву. Цалва хъиривчутурайн тапшур бувна ва масъалалул ялувсса тIалавшиннарду кьянкьа дан.
Мукунма ххал бивгьуна районнал школарттал ва детсадрал кIи рутаврийн багьайсса буруккингу. КIицI лавгуна гьарца школалийн хъуручI цила чIумал бувкIшиву, ми идарартту кIинтнийн хIадурну бушиву.