Жу цакьнивагу «Илчи» кказитрай бувсъссия сентябрь зуруй хьусса бувчIавурттаву Ккуллал райондалул жяматрал цала чулухасса Дагъусттаннал Халкьуннал Мажлисрал депутатну увчIусса Расулов Аьбдул Батталлул арснал райондалийсса шяраваллан кумагру бувшиврия.
Вана уттигу Аьбдулла Ккуллал райондалул жямат цIусса шинащал барча буван ххуйсса ссайгъатирттащал увкIун ия. Ва цукунсса кумагирттащал увкIссарив бувсунни Ккуллал райондалул бакIчинал хъиривмур Сабрина Илиясовал.
— Аьбдулла Батталовичлухь жу, Ккуллал райондалул администрация, хъунмасса барчаллагь тIиссару буллалисса кумагирттахлу. Ва базилух ванал Ккуллал райондалий яхъанахъисса ятинтуран, мушакъатминнан ва бюхъу чансса инсантуран булун лавсун увкIунни: 50 иникIмалул дарваг, 50 качар-писукIрал, 50 ппиринжирал кьуцуртту, 50 пархтIутIул нагьлил шуша ва 50 чяйлул пачка. Вай дакъагу, райондалий сияхIрайсса 12 ятиннан конвертирттаву дуллунни ца-цаннан 5 азарда къуруш, ялагу 200 бахшиш дуллунни цIусса шинал оьрчIан дулун. Бюхълай личIаннав ина, Аьбдулла Батталович! Хъунмасса барчаллагь!
