Апрель зурул 17-нний ЦIуссалакрал райондалий, ДР-лул экономикалул министр Раюдин Юсуповлул каялувшиннаралу, хьунни ЦIуссалакрал райондалия агьали бизан баврил ва Аухуллал район цIудуккан даврил хIакъиравусса масъаларттан хас дурсса совещание.

Ванал бувсунни шикку ххалбигьлагьисса, лак ЦIусса миналийн бизан буллалисса, чачаннал миллат­ран цалла аьрщи зана ритлатисса масъала хъинну агьамсса бушиву. Ва масъалагу дузал буллалиссар «О первоочередных мерах по практическому восстановлению законных прав репрессированных народов Дагестанской ССР» тIисса АьФ-лул ПаччахIлугърал 1992 шинал бувсса хIукмулийн бувну.
— Федерал бюджетрал лагрулуву бизан баврил масъала дузал бан ккаккан бувну буссия 1992 шиная 1996 шинайн бияннин. Амма ва масъала цикссагу шиннардий лахъи лаган буван багьунни. ХIакьину жува хьунабакьлай буру вай циняв шиннардий салкьи хьуну бивкIсса, бизан баврицIун бавхIусса масъаларттащал, — увкунни Раюдин Юсуповлул.
Ванал бувсунни уттинин вай масъалартту щаллу бан итадаркьуну диркIшиву 8 млрд. арцул, Новостройрай агьали ялапар хъанансса 3053 къатри, 9 школа, оьрчIал багъ, администрациялул 5 къатри дуршиву. Бувсунни цаппара масъалартту личIиссара къулагъасралун лавсун бушиву.
— ЦIусса миналийн бизан бувсса агьали газрал ва щинал дузал був­ссар. ЛивчIунни уттигу чара бакъа щаллу бан аьркинсса ттукIрал ва ххуллурду баврил масъалартту. Дурсса тамансса къатравугу агьали ялапар хъанай бакъар, мунил хъунмур сававгу дур цIу миналий зунсса кIанттурду бакъашиву. Аьркинну бур агьали зунсса кIанттурду хIасул буллан. Инвестортал кIункIу бувну, къюмайтIутIи бугьаврил даву дайдишин. Вай масъалартту щаллу бан райондалул администрациялущал архIал Республикалул ХIукуматгу зунтIиссар, — увкунни Раюдин Юсуповлул.
Шиккува кIицI лаган, вай масъалартту хъуннасса аякьалувун лавсун ур Аьрасатнал Федерациялул Ухссавнил Ккавкказрайсса ишир­тталсса буллалисса министр Лев Кузнецов ва ванал хъиривчу Одеса Байсултанов.
ЦIуссалакрал райондалул администрациялул хъунама ХIажи Айдиевлулгу кIицI лавгунни 20-хъул шинал лажиндарай лахъи лавгсса бизан баврил масъала къуртал бавай бушиву.
— ЦIуссалакрал райондалул агьулданунгу бувчIлай бур вай масъалартту цакуну, анаварсса мутталий щаллу бан захIматсса бушиву. Хъуннасса вихшалдарай агьали ялугьлай бур республикалул каялувчиталгу чIарав бацIанссар тIий. Райондалийн Федерал министртуращал Республикалул БакIчи учIаврилгу бусласиссар ва масъала ваналгу аякьалувун лавсун ушиву. Махъсса шиннардий шикку дурсса давурттугу чIярусса дуссар. Ва авлахърал аьрщарай дурссар агьали ялапар хъанансса цикссагу къатри, хъин-хъинсса школарду, азархана, администрациялул идарартту, ЖКХ-лул объектру, — увкунни ХIажи Айдиевлул.
Мукунма агьамсса масъаларттавух ванал кIицI лавгунни аьрщаралмигу, 2007 шиная шихунмай хIасул хьусса, жагьилсса кулпатру къатрал дузал баврил, агьалинан зунсса кIанттурду дузал баврил масъалартту. Бувсунни райондалул аьрщарай цаппара инвестициялул проектру иширайну бачин бувну бушиву.
ХIакьинусса кьини 30 азара инсан ялапар хъанахъисса райондалий бувну, зузи бувну бур МФЦ. Ва центрданий гьашину 1800-нния лирчусса хIаллихшинна биттур дурну дур. Мукунма райондалий куццувун багьну зий буссар социал ва коммунал службарду.
Совещаниялул даврий гьур­тту хьунни Ухссавнил территориал округрайсса Дагъусттаннал БакIчинал полпред Вячеслав Паламарчук, ДР-лул Халкьуннал Мажлисрал депутат Зайнулла Мирзоев, ДР-лул экономикалул министрнал хъиривчу ХIажи Султанов, «Дирекция «Новострой» ГКУ-рал директор МахIаммад-Сани Мяндиев, ДР-лул Юстициялул ва цаймигу министерствардал вакилтал.
Раюдин Юсуповлул, шикку гьаз бувсса циняв масъаларттал хIакъираву бувчIин бавурттугу дурну, тапшур бунни биттур бансса бигарду. Мукунма, хIукму бунни вай масъаларттал хIакъираву кIива зуруй цал батIаван.