Малиналуву (кьюнукьул ца жура) чIявуссар клетчатка, витаминну (С,В, РР, Д, Е, К, А,В) медь, калий, фосфор, кальций, йод, стронций, цинк, хром. Мунияту кьюнукьи чIярусса къашайшивурттан дарувнугу савав шайсса бур.

Малиналуву бур бета-ситостерин, склероз хьун къаритайсса, оьттул туннурдаву холестерин чан бай­сса. Аьлимтурал исват буллай бур кьюнукьул оь цIулаган байшиву, оьттул азарду (белокровие, малокровие) хьун къаритайшиву. Малиналул щин (сок) хъинну хъинссар инсан аьвкъу-гъили хьу­сса чIумал, букайссар ницIахун, чяйлухун.
Малина букан ккаккан бай­ссар инсаннал организм инфекциялия дуруччин аьркинсса чIумалгу, давление гьаз хьунигу, хьюму лавснигу, ревматизмалул чIумалгу, экзема дунигу, инсан увччу хьунигу — ччяни цайна-цува кIурааеншиврул, бакIрал кIиз кьатIа тIинигу, ангиналул чIумалгу.
-Малиналул тIутIал 2 хъунна къуса дирчуну 1 стакан щаращисса щинавун 2 ссятрай­сса дитайссар, яла диргьуну, кIирину дуна хIачIайссар. Укуннасса щинай кьакьари вилаглангу бучIиссар.
-Лякьа цIуцIийни ца стакан малиналул сокрал хIавчIун хъинссар.
— Аьвкъу-гъили хьуний — 100 гр. малиналул ялун ца стакан щаращисса щинал бувтIуну, 10-15 минутIрай битайссар. КIирину дунура хIачIайссар 2-3 стакан цал архIал, гьухъа итаншиврул. БучIиссар шивунна ялун 1 къуса ницIал дирхьуну хIала дурну, утту­бишин хьхьичIгу хIачIан.
-Хьхьирилул (липа) мурхьирал чIапIал чяй дурну, малиналул мураппалухун хIарчIун, кIучI шайссар гьухъа итаншиврул.
-Склероз дусса инсаннангу гьарца кьини кьюнукьул щинал (сокрал) стакан хIачIларча хъинссар.
-Дукралух тамахI бакъасса инсаннан 2 хъунна къуса малиналул ялун ца стакан щаращи­сса щинал бувтIуну, термосравун дитайссар. ХIачIайссар гьантлун 4-лла бачIи-бачIи стакан, гъилину дунара.
-ТIантIри буминнансса ду­гъаннарансса рецепт:
Малиналул чIапIая щин (сок) дуккан дурну, тIантIрайх ду­ккайссар ягу мазь дайссар, ца бутIа кьюнукьул щинавун 4 бутIа лагаврил ягу вазелиндарал хIала бувну.
ЦIуллуну битаннав.