Гъинтнил каникуллу. Дуклаки оьрчIру школалиягу, дарсирдаягу бигьалаглагисса чIун. Ххюлчинмур классравун лавгсса Амирма, цала чIунархIалсса ва цаярва хъунисса оьрчIру куна, кьинил-кьинибархан компьютердай аьлахълай ягу кьатIув ссанчIав дакъа чIун гьан дуллай акъассарча, школалиягу увкIун (ва гьарца кьини школалийн учительницачIан лагайссар ца ссятрайсса), Дагъус­ттаннал халкьуннал аьдатирттаясса луттирая «ЦIанил инсан акъарча, цIа инсанналли чIюлу дайсса» тIисса дарс ккалай.

Вайннал кулпатраву, щалва тухумраву цIанил агьамсса кIану бугьлагьиссар. ЦIарду бусравсса инсанталли ванал буттал ппу «Отличник милиции» Жамал Загьиров ва буттал нину Дагъусттаннал бусравсса педагог Рая Загълиевагу. Ниттилми нину-ппу бур Тарумовкаллал райондалул администрациялий личIи-личIисса къуллу­гъирттай зий ивкIсса Дагъусттаннал бусравсса экономист Сяид Цимпаев ва Дагъусттаннал мединститут къуртал бувния шинмай 44 шинал лажиндарай Тарумовкаллал райондалул ахарханалий зузисса хIакин акушер-гинеколог, Да­гъусттан Республикалул бусравсса хIакин, Аьрасатнал Федерациялул хIурмат бусса донор Изумруд Исмяиловагу.

Зулайхат Тахакьаева
Рая ва Изумруд цивппагу ссурвалли. Ккуллал райондалий цалчин ларайсса кIулшиву ларсъсса, Хъусращиял байбихьулул школалул директорну, райондалул кIулшиву дулаврил отделданул каялувчину (ванал каялувшиннаралу Ккуллал райондалул кIулшиву дулаврил отдел лайкь хьуну диркIссар ДАССР-данул КIулшиву дулаврил министерствалул чулухасса занази ЯтIул Ттугълин), райондалул халкьуннал фронтрал комиссарну (дяъвилун бувсса кумаграхлу билаятрал бакIчи Сталиннуя бувкIссар барчаллагьрал чагъар), райкомрал цалчинма секретарьну зий ивкIсса (тай шиннардий кьянатсса зунттал район бюхттул­сса ккаккиярттайн дирну диркIссар) ХIасан Загълиевлул душрур.
Цуксса хъунисса къуллугъир­ттай зий ивкIхьурчагу, тамахIкарсса хъуслил инсан акъая, тIий дакIнийн утлан бикIай ХIасан Исмяилович ва кIулну бивкIцири. «Ттул яла хъунмур аваданшиву ттулва ряхвагу оьрчIал ларайсса кIулшиву ласун бавур, минная паччахIлугърангу, жяматрангу бучIи лякъинсса инсантал бизавур», — учайва тIун бикIай. Бунияла бугу бувкссар ванал ряхвагу оьрчIая щарнингу пахрулунсса, паччахIлугъран ва жяматрангу мюнпатрансса инсантал. Хъунама арс Сажид Дагъусттаннал бусрав­сса хIакин, хьхьичIунсса кардиолог, «Халкьуннал хIакиннал цIа» багьавай хIалал дурсса, Заннала ляхъан увсса хIакинни. Рая Дагъусттаннай республикалул яла хьхьичIунсса мукьва садикравасса цанний сайки 25 шинал лажиндарай каялувшиву дурсса, даврил кьатIувгума учайсса махъ насихIатрайну учайсса, «Халкьуннал учительнал цIа» бусрав дурсса, Занналва ляхъан бувсса тарбиячири. Изумрудгу мукунма къашайшалал къюву дакIнивух, къюкIливух, оьтту-ттурчIавух дуккан дайсса, Занналва ляхъан бувсса хIакинни. Исмяил ва Муса физикалул элмурдал кандидатъталли. Мамед зий уссия Тарумовкаллал райондалул рыбоохранный идаралул инспекторну.
ЦIанил бакъассагу, Загълиевхъал тухумраву агьамсса кIану ялагу бугьлагьиссар никирая никирайн нанисса аьдатирттал ва уздансса хасиятиртталгу: захIмат ххирашиву, пахру-ххара бакъашиву, дакI хъун дакъашиву, сахаватлувшиву, рахIму-цIими бушиву, инсаннал чIарав бацIан хьхьичIуншиву. Буслан бикIай ХIасан Исмяилович, райондалул бакI дургьусса хъунасса къуллугъчи ивкIхьурчагу, къурувгу, мащилийгу гьармудан захIматкашнал дянив икIайссия, райондалий буцири колхозрал ятту-гъаттара бакIра-бакIрах кIулссия (Изумруд кIулми махIаттал хъанан бикIай ванин Тарумовкаллал райондалий 40 шинал оьрмулувусса инсантурал гьарцаннал цIа-бакI, цума щил оьрчIрив кIулссар тIий. «Феноменальныйсса память» ванийн буттая дирхьун­ссар), ванал кулпат ХIуриягу колхозрал къурув хIухIалтравух хъуру ттихIлай бикIайссия, тIий. Ялагу буслан бикIай ятинсса оьрчIан янна-калийну, дукиялийну кумаг байва, цала кабакьу бувну райондалия дуклан гьан бувсса студентътурал ялтту уккан лагайссия, арцуйну какIидахIайссия, тIий. Мира хасиятру кIицI лагай ванал ряхвагу оьрчI кIулминналгу. «Мархлуя ххун, ххунуя ккиж» тIисса учала бур лакрал. Мира хасиятру дуссар ванал оьрчI-душварая бивзминнавугу. «Замана баххана хьуну бур» тIисса калима вайннал тухумран ятсса калимар. «ХIарачатрачIа барачатгу буссар» тIисса ХIасан Загълиевлул ччя-ччяни тикрал байсса учалагу вайнначIа ттигу кьиматрай буссар. Тухумрал уздансса хасиятру ва аьдат­ругу лайкьну дуручлай буссар.
Сажид ва Рая республикалул хъуншагьрулий чIявучил итталусса халкь бия, ми шикку зий буну тIий. Вайннал чIивимур ссу Изумруд Тарумовкаллал райондалий ца яла бусравмур инсан бушиву буслай бур ванищал архIал зузими ва вайннал кулпат ххирами, ванил оьрмулул 70 шин шаврил юбилейращал барчагу буллай.

Виктор Ображиев, Тарумовкаллал райондалул азарханалул хъунама хIакин:

ХIакьсса «изумруд»
— ТтучIан бучIаннингу вин къабавну бакъахьунссар Изумруд ХIасановна цукун ляличIисса инсан буссарив. Бюхттулсса Ххувшаву ларсун, Совет билаятрал халкьуннаву гьавасгу, ххаришивугу ххисса гьантрай дунияллийн бувксса душ цамур куццуйсса бикIангу къабю­хъайссия, гьай-гьай. Къабяйкьуну бур нину-ппугу ванин Изумруд тIисса цIа дулаврийну, изумруд – хъинну нажагьсса ва багьлул ххирасса чару. Жул райондалунгу Изумруд ХIасановна бавцIуссар хIакьсса изумрудну. Ва бакIрайн багьаврийну жул больницалунгу тIайлабацIу хьуссар, щалла райондалул хъаннингу бахтти хьуссар. Цанчирча ванин кIулссар гьарца хъамитайпалул хIалкьазия, цумунил ци цIуцIаву дуссарив, ци буруккинтту буссарив, дакIний ци буссарив, цими оьрчI буссарив, кулпатрал ахIвал цукунсса буссарив, дакIний буссар цума оьрчI та бувссаривгума.
44 шин хъанай дур гьашину Изумруд ХIасановна ва больницалийн зун бувкIун. Тани ваксса хъуннасса райондалий ва ца акушер-гинекологъя буссавагу. 16 шинал лажиндарай ца цуппалу зий бивкIссар, машина бакъа архсса шяраваллавун хьхьу-кьини къакуну, марххалттанивух, гъаравух, кьяркьаравух бахьтта фонарьгу канихьну занай.
ЦIанакул гинекологталгу биялну бур, аппаратурагу цIусса дур, давриву бигьашивугу хьунни. Амма тани Изумруд ХIасановнал аякьалулу бувсса, хIакьину цивппа ниттихъул хьун хIадур хъанахъисса жагьилсса хъамигу ваничIанни най бусса. Ва шиккусса зузалтрангу нинур, лякьлуву оьрчI бусса хъаннингу нинур, вайннал оьрчIангу нинур.
Даву канилух дурксса лавайсса даражалул пишакар бухьурчагу, цила кIулшивуртту, пишакаршиву магьир дуллайнмари бусса хIакьинусса кьинигу. Москавлий семинардайн лагайссар чIун-чIумуй. Билаятрал хьхьичIунсса институтирттаву, клиникардай, цIуллу-сагъшиву дуруччаврил центрдай дурсса цIу-цIусса ахттаршиннардая, кьяйдардая хавар буссар. Ванил сумкалуву бакъасса журалул ттизаманнул журналлу бакъассар, так гинекологиялийн ва УЗИ-лийн багьайсса бакъассагу, педиатриялийн ва цIуллу-сагъшиву дуру­ччаврил агьамсса буруккинттайн багьайссагу.
Хъаннищалгу бигьану маз лякъин кIулссар. Лавровлущагума къашайхьунссар ванища кунма бигьану инсантуращал маз лякъин.
«Незаменимых людей нет» тIун бикIай, амма ванил кIану бугьансса хIакин-гинеколог жучIа акъа­ссар. Больницалул хъунмур хъар ванийри дусса. Ва дежурствалий бусса чIумал нагу дакI паракьатну икIара — реанимациялийхгу, гьарца отделениярттайхгу ялтту буккай­ссар. Лув-ялув кIира-шанна хьхьуну дежурствалий зий бивкIхьурчагу, хъиривмур хьхьунугу акъаманахлу зун буккантIиссар. Дежурствалия махъ чичру ишла къадурну бусай­ссар ци тагьар диркIссарив. Цумур отделениялийн цу увкIссарив гьарцаннал цIа-бакI кIулссар циннагу. Жул азарханалун, жул райондалун бакъассагу, республикалийцири хъаннинма бахтти хьуссар Изумруд ХIасановна кунмасса хIакин дунияллийн лявхъуну бушиву, цанчирча чIаххувсса районная, хIатта МахIачкъалалиягума бучIайссар жучIан ванил цIа дургьуну. Мунияту махърувагу къалякъинссар ванин лайкьсса. Лакку мазраву бусса яла ххуйми лащанбавур­тту ишла дурну чичирчагу, ина бякъайкьинтIиссара.

Акбике Джемалиева, Барият ХIамзатова хъаннил консультациялул акушеркахъул:

Жунсса эбратри
— Укунсса хIакинтал жучIа цир, дуллу-дунияллийвагума кIиссурттай буккинукссавагу бакъахьунссар. Цила бусса оьрму, дакIгу, къюкIгу пишалун хас бувссар ванил. ЗахIматсса къашайшалая цичIар ххира къадайссар. Ттигъанну ца хъамитайпа реанимациялийн багьну, цила жиплува дурккун 8 азарда къурушрансса дарур­тту лавсуна. ЧIярусса шиннардий лякьлуву оьрчI къахъанай, ЭКО дурну, ахиргу, мурадирайн бивсса жул акушерка, кIинничалт ливну, захIматну МахIачкъалалив реанимациялийн тIайла бувккуна. Изумруд ХIасановнал цинявппа ччаннай бацIан бувна, цилвагу хьхьу-чани хьуннин ганил ялату ша къакьувкьуна. Москавливсса, Санкт-Петербурграйсса клиникардайн, ЦIуллу-сагъшиву дуру­ччаврил министерствалийн оьвтIий, хьхьунил 3 ссятраву вертолетрай даруртту бучIан бувну, бивчIавайсса кIанттая ххассал бувссар.
Буххаву цирив къакIулссар циннагу. Хьхьурайсса дежурствалия махъгу, 30-нничIан бивсса, ца-ца чIумал миннуяргума ххисса хъами кьамул байссар. Зузи кьини къуртал хьурчагума, цинявппа кьамул къабувну шаппай къалагайссар. Хъиривмур кьинигу акъаманахлу дежурствалийн буккантIиссар. Изумруд ХIасановна жунсса эбратри, нину хIисаврайгу, хIакин хIисаврайгу, хъамитайпа хIисаврайгу.

Ображиева Валентина, яру­ннил хIакин, Изумрудлул ччянияцIавасса хьхьичIунсса дус:

жучIава АлЖАН бикIанссия
— Изумруд ХIасановна кунмасса инсантал нажагь бакъа дунияллийн къаляхъайссар. Ттуршукурдай – ца. Ванил чIунгу, цIуллушивугу, гьавасгу, къюкIгу гьарцаннан диял шай. Гьарцаннал къюву, буруккинтту цила дакIнивух буккан бай. Цу-унугу къашай хьурча, мугьлат бакъа ялун къалавгун паракьат къашайссар. Цайминная цийнмамур къабияйссар.
На чIявучил бакъасса бахтти-талихIрал заллура, Изумруд кунмасса подруга нясив хьусса. Агарда на ттулла дард-ххажалатрая ванихь бусарча, ттун гайннуя гавассят хъамабитайссар, гихунмай ттул буру­ккинтталсса ганилли байсса. Щаллу къабувну паракьатгу къашайссар. Цаппара шиннардил хьхьичI ттуй операция бан багьлай бия, намур буссияв хIакьину-гьунттий тIий, лахъи лаган буллай. Изумрудлул ка дургьуну къабувцуссания, танин личIанссиявгума къакIула. МахIачкъалалив бувцуну, гьарца хIакинтурацIух бувккун, уттубишин бувну, операция бан бувссар. Изумруд кунмасса инсантал гьарзасса бивкIссания, жучIава Эдем бикIанссия.

Асият Адильгереева:

Жул хъаннин бахтти хьуссар
— На шиккун зун бувкIсса кьинива ттул цалчинсса насихIатчи хьуссар Изумруд ХIасановна. ХIакьинусса кьининийнгу ва ттул учителли. Давривугу, оьрмулувугу ттун ванил маслихIатру хъинну бучIи лякъайссар.
Жул райондалул хъаннин хъунмасса бахтти хьуссар, ми Заннал кьисматрайн барчаллагьрай буссар цалва оьрмулул ххуллий Изумруд ХIасановна кунмасса хIакингу, инсангу хьунабакьаврихлу. Цала кулпатрахнияр шамлий-мукьлий хъуннасса аякьа ва къулагъас райондалул хъанних дурссар ванил. Ванил ка сававну чIявусса хъаннил ва вилттили оьрчIал оьрмурду хха­ссал хьуссар.
Ниттил шаттирдайх лавгунни ванил душ Ххадижатгу, язи бувгьунни ниттил пиша. Хасиятгу, багьу-бизугу ниттил кунмасса бушиврийну вагу ччяни бусрав хьунни азарханалул зузалтран бакъасса, щалва райондалийва.
Разият Аьлисултанова, фтизиатр:

Цилвамур оьрмулуяр цайминналсса
ххирассар
— Тамансса шиннардий жу цачIу зий буссияв. На хIайран бувсса ва хIакьинугу хIайран буллайнмасса хасиятру Изумруд ХIасановнаву ккал дан къашайсса дуссар. ХIакинтал чIявуссар, амма Занналва хIакинну ляхъан бувсса нажагьсса бакъа бакъассар. Изум­руд ХIасановнагу ми нажагьсса хIакинтуравасса цар. Цилвамур оьрмулуяр ванин цайминнал оьр­мурду ххирассар. Цийва рахIму къабувну цайминнал оьрмурду ххассал бувсса лахIзарду ванил оьрмулуву къачансса хьуссар. Навагума цимилвагу бара хьуссара оьрчI буллалисса чIумал оьлицIал хъанай байбивхьусса хъаннин, мугьлат бакъа цила оь буллуну, ми бивкIулуща хха­ссал бувсса иширттал. Лайкь хьуссар Аьрасатнал Федерациялул бусравсса донорнал цIанин.
Ххаллилсса пишакар бушив­руцIун ва ялагу гьарца кIанттай гьар ишираву хьхьичIва-хьхьичI буссар – хIакиннал кумаг аьркиннийгу, инсаннал кумаг аьркиннийгу, дуснал кумаг аьркиннийгу. ЩихчIав къабурувгун, щилчIав даннин къабавцIуну, хьхьичIва-хьхьичI буккайссар жяматийсса давурттайнгу. Масалдаран, хIакьину ихтилат бия Медициналул зузалт­рал байрандалул хьунийн чIирал кказит итабакьаврия. Цилла жип­лува арцу харж дан багьарчагу, ванил му давугу чулийн дуккан дантIиссар. Жагьилсса пишакарталгума цIуру-кIуру тIий, субботникрайн къабуклакисса чIумал, жула лагма-ялттусса кIанттай марцIшиву дуруччин аьркинссар тIий, гьарцаннаяр хьхьичI зий булувкьуну, цинявппа яхIиравун бичайссар. Даврия тачIав нигьакъабусай. Ва бур лекъащайсса гьавасрал щаращи.
Хъинсса мукъуйну дакIнийн къаувтун къабюхъанссар Изумруд ХIасановнал лас Сяид МахIадовичгу. Ва жул штатрай акъасса зузалан хIисавсса инсанъя. Цува райондалул жаваблувсса къуллугъирттай зий ухьурчагу, кулпатралмур даву халкьуннал цIуллу-сагъшиврул къаралданийсса душиву бувчIлай, ванин кумаг банссагу чIун лякъайва, аьпа­бивул. Ва участковый хIакинну зузисса чIумал цала машиналий шяраваллавун къашайшалтрачIан биян байва. Кулпатгу, душгу даврийн биян бан нани ххуллий на хьунабакьирча, гай биян бувну мукьах на биян бангу махъунай зана шайссия, на биян бувну махъунай нанийни ялагу цу-унугу хьунаакьирча, гагу иян ан лагай­ссия. Цув Алжаннул ххари аннав! Ххадижатгу нину кунма иминсса, инсаннан кумаг бан хьхьичIунсса душ бур. Чанссавагу бакъахьунссар жул райондалий вайннал кулпат­рая къулагъас къаккарксса, кумаг къабивсса кулпатру. БувчIуссарив миннан му за, къабувчIуссарив ттун къакIулли. АллагьначIа бучIи лякъиннав вайннал кулпатрал жул райондалун бувмур.

Зинаида Хизриева, хIакин:

Каругу, дакIгу мусил
— Каругу, дакIгу мусил дусса хIакинни жул Изумруд ХIасановна. Ванил къюкIливун хьхьири гьантIиссар. Гьарма цала дард-хажалатращал ваничIан учIайссар, ванищал дакI кIидарчIукун рахIат хьуну, гьиву яла ларгсса кунма лагайссар. Буржирай арцу аьркинмагу, кумаг аьркинмагу тIайлана ИзумрудлучIанни учIайсса.

АхIмад Мусаев:

Яла бусравмур
кулпатри
— ХьхьичIва шийх чIявуми оьрус миллатрал халкь бия. Сяид ва Изумрудгу шиккун зун бувкIсса жагьилсса пишакартурава цалчин­сса бия. Тти шикку дагъусттаннал личIи-личIисса миллатирттал агьлу чIяву хьуну бур. Оьруснал 28 процентвагу ливчIун бакъар.
Ва райондалий ца яла бусравмур кулпат миннал кулпатри. Изумруд ХIасановна кунма дакI даврин дуллусса, агьалинай цIими бусса хIакинтал жула дянив чанссавагу бивкIссания, Дагъусттаннал медицина бюхттулсса даражалий дикIанссия. Ттул кулпатран ваниха чIалачIин дакъассар. Ттул чIивима уссу ивкIуну, жагьилсса кулпат лякьлувусса оьрчIащал ливчIуна. Хъазам цIий, инжитну бия. ОьрчI байхту, ганил хъазамрай операция бувна. Хирургнал баччибакъулшиву дурну, хъазам оьнийн буклай байбивхьуна. Ца кьини кIюрххила телефондалувух оьвкуну, Изумруд ХIасановнал на больницалийн учIан увну, оь баххана байсса ампуларду лякъин МахIачкъалалив насу мугьлат бакъа, куну, тIайла увккунна. Гай гьантрай аьрххилий нанисса цуппагу ттул уссил щарнилшиврий бавцIуна. Лавгун МахIачкъалалив, Муххал ххуллул больницалий аьркинсса ампулардугу лявкъуну, зана хьура махъунай. Дарув лякъавриясса ххаришиврул аьтIий, ттуйн хъямала багьлай бия. Жулва кулпатраяргума га цуппа ххари хьуна. ХIакьсса хIакиннан щилчIавмур къювугу асар шайссар.

Написат ва Загьидат, Изум­рудлущал хIалашиву дусса лакку хъами:

Оьрму нахIакь
къабувтссар
— Жу мукъул усттарсса бакъару, Изумрудлун лайкьсса махъругу дакIнийн багьлай бакъар. Амма ва райондалий щихь цIуххирчагу, ххуйсса бакъа къабусантIиссар муниягу, мунил кулпатраягу. Цилва мюрщисса оьрчIру кьабивтун, къашайшалал бакIрацIа къабукьайссия. Щинний-бунугу мажлисрай бухьурча, «ссупралия ттул къашайшалт­рангу дукра дишара ттущал» куну, анаварну лагайва. Къашайшалтрахгу аякьа дусса, мюхтажнал чIарав бацIангу хьхьичIунсса буссар.
Ххаллилсса оьрчIругу тарбия бунни. ХIабиб ва Ххадижатгу нину ва ппу кунма дакIру хъинсса, аьчух­сса, инсаннал хIурмат байсса, аьркиннал чIарав бацIайсса бур. Дунияллийцири неъматру кка­кканнав цан.

Гугьар Гъазалиева, Изумрудлул шяравущар:

ЧIявусса душваран
Изумрудлул цIа
дирзссар
— Барчаллагьрай буссару жу Изумруд ХIасановнайнгу, ванил кулпатрайнгу. Жу дахьва шиккун бивзсса чIумал, хъирив кьинива бувкIуна жу ца бурив, ци бурив ккаккан. ЧIявусса лакрал кунма, жулгу чIарав бавцIуна. ОьрчIру къашашай хьусса чIумал ялун бучIайва, кумаг байва. Изумруд ХIасановна райондалул жяматран багьавай ххирагу, бусравгу хьусса инсан бушиву исват буллалиссар чIявуссаннал цалва душваран ванил цIа дизаврил.

Издаг Мюрщиева, Изумрудлул шяравущар:

Нину Тереза
— Цила чIумал ттул чIаравгу хъинну бавцIуссар Изумруд ХIасановна. ХIакин хIисаврайгу, подруга хIисаврайгу, хъамитайпа хIисаврайгу муния увкуцири хъинсса мукъурттива винма бувчIухьунссар Изумруд ХIасановнацIун «Нину Тереза» тIисса махъ цуксса бавкьусса буссарив.

Изумруд ХIасановнал юбилей бюхттулсса даражалий дан­сса пикри буссия жул, амма ларгсса шинал хьусса оьзрурду сававну, му шадлугъру дуллансса макьулий къаливчIунни, тIий бур азарханалул цинявппагу хIакинтал.
Мяйжаннугу, 2014 шин Изумрудлул оьрмулуву алши бакъасса хьунни. Лас дунияллия лавгун барзрувагу чIарах букканнин, хархавар бакъасса апатIрал зевххунни ссу Рая. Вай кIиягу язисса инсаннал бивкIурдая цийнма-цуппа бучIаннин яла лавгунни цихара чIалачIин дакъасса ссил лас Жамалуттин.
— Ххарира нава тIалавну бушиврия. Инсантуран кумаг бан бюхъаврия. Цамур пиша тачIав язи къабугьантIиссия, яла арцу чIярусса думургума.
На инсантуран бусравну ва ххирану бушиву ца ттулвалусса иш бакъар. Ттул лагма мудангу ххаллилсса инсантал буссия. Миннал хасиятрур ттуйнгу дирсса. Ттул дуссия хъинну аькьилсса, дакI хъинсса нину, аьпабиву. Жун жува хъунисса хьуннин къакIулссия жула хъунама уссу хъабакIсса ушиву, ниттин га жуяр ххирасса икIайва, ганил дакI ганачIан, ганалмур кулпатрачIан ххишалану кIункIу тIун дикIайва. «Зуяра лавайманах мабургаруча, ялавайминнах бургияра», — тIун дикIайва. «БакIрачIан цуксса оьсса кьини дучIарчагу, лакъавхIуну, мурччи-ккарччул дургьуну, хьхьичIунай ачин аьркинссар», — учайва. Ппу, аьпабиву, республикалун машгьурсса, бусравсса инсан ия. Лас Сяид ххаллилсса инсан ия. «Оьмур бувнан хъинмур бува, АллагьначIа бучIи лякъинтIиссар», — учайва. Больницалун ягу райондалун аьркиншиврий цанма кIулсса къуллугъчитурачIан лавгний, гайнналгума учайсса бия: «Бизар къавхьурав чил буруккинтталсса буллай, вилвами буруккинттащал та учIанна жучIан», — куну.
Дазу дакъа барчаллагьрай буссара Тахакьа­хъал тухумрайн – ттулва ххаллилсса учительтурайн Тахакьа ва ХIасан АхIмадовичхъайн, Мариян Салмановнайн. Мукунма барчаллагьрай буссара Кьурбан АхIмадовичлуйн, Рамазан АхIмадовичлуйн. Вайннал дуллусса кIулшивурттугу ттул оьр­мулуву хъинну дучIи ляркъуссар.
Амма, хIайп, даврия къабиллай бура ттула Макка-Мадинану хьусса буттал шяравун Хъусрахьхьун гьан, караматсса тIабиаьтрая, гьаварая мякь лиххан, — тIий бур Изумруд.
Хъусрахьхьун биян къахьурчагу, вил цIа шяраваллил тарихраву мусил хIарпирдай чирчуну дуссар, жул аьзизсса Изумруд ХIасановнай. Ина инава зий, ялапар хъанахъисса Тарумовкаллал райондалий хъусращири хъамитайпалул цIа бюхттул дурссар. Гьарцаннан нясивну ба­къахьунссар, цува лявхъу кIанттай учIину лякъин. Амма инава чув бухьурчагу, вилла инсаншиврулгу, пишакаршиврулгу бурж лажин кIялану лавхъссар. Оьрму нахIакь къабувтссар.
ДакIнийхтуну барча тIий бура вихь оьрмулул юбилей. Ина оьрмулул буччиннин битаннав. Вил арснал ва душнил арсру Сяид, Мансур ва Амир зул агьулданул арамтурал цIарду бюхттул дансса бизаннав, инава хъунма бувсса душнил душ Аминагу зул тухумрал хъаннил цIардан лайкьсса бу­кканнав.