Махъсса, инфляциялул ччамарду бишлашисса, шиннардий арцу кьюкьлай, янна-ка, дуки-хIачIия гьантлия гьантлийн ххира хъанахъисса тагьарданий ахIвал-хIал кIюланал, пенсионертурал, чIявусса оьрчIру бусса кулпатирттал иш-тагьар ялу-ялун кIюла дуклай дур.

\Укунсса тагьарданувун багьсса агьалинан ка-кумаг бансса кьасттирай, 2006-ку шинал январь зуруя шинмай жулла хIукуматрай кIани-кIанттайх тIивтIуну бур социал обслуживаниялул центрду, яни ЦСОН, ахIвал- хIал кIюласса пенсионертуран, чIявусса оьрчIру бусса кулпатирттан, нину- ппу бакъа ливчIсса оьрчIал чIарав бацIлансса пикрилий. Махъсса шиннардий ахIвал кIюламиннал аьдад ялу-ялун хъун хъанай дур. Гьай- гьай, ЦСОН-далуща къабюхъанссар ялув кIицI лавгсса агьали гьарца чулуха, гьарца аьркинмунил щаллу бан, амма мискинсса кулпатирттан чIиви-хъунсса кумаг бан вайннаща махъ бакъа бюхълахъиссар. Лакрал райондалийсса ЦСОН-далучIасса кIизивулийсса къатри, чIумул тIалавшиннарайн бувну, дакьин дурну, цIудуккан дурну, чIумуха лархьхьусса техникалул щаллу дурну дур: компьютерду, телевизорду, холодильникру, янна шюшай машина, спортинвентарь, микроавтобус ва куклу машина, оьрмулул бугьарасса инсантуран ишла буллан ва ЦСОН-лул зузалт райондалул щархъайсса пенсионертурачIан биян буллалисса. Цалла даврил буржну лажин кIялану щаллу буллалисса ЦСОН-лул зузалтгу райондалий­сса пенсионертурачIа лайкьсса хIурматрай бур. ЦСОН-далучIа бур дяхтта бугьарасса пенсионертураха аякьа дуллалисса отдел, ванил хъунмур бур С.А. Хизриева, ятинсса оьрчIал ва оьрчIру чIявусса кулпатирттал отдел, хъунмур Г.Д. Изиева, анаварсса кумаграл отдел, хъунмур А. Г. МахIаммадова, шаппа-шаппах пенсионертуран кумаг байсса отдел, С. Р. ХIажиев ва Г.Д. МахIаммадова, юрист С.А. Аьлиев ва психолог Л.Я. Усттарова. Бур шикку анаварсса медициналул кумаграл кабинетгу, хъунмур медсестра Э. Кьурбанова. ЦСОН-далучIа зий бур хIаммам, душ, парикмахерская, оьрчIан ва хъуниминнан тIиртIуну дур каних личIи- личIисса мюрш-кьюрш дайсса, ххаллая ци-дунугу щащайсса кружокру, бур кIукIлусса диванну, кресларду бусса, телевизоргу, кказит- журналлугу бусса бигьалагай къатта, лечебная физкультуралул ва физиотерапиялул кабинетру. ЦСОН-далучIа бур ахIвал кIюласса пенсионертурал дяхтта дукра дукайсса столовая. Дяхттасса бигьалагай къатлувун бучIай оьрмулул бугьарасса 25-нния ливчусса пенсионертал, инвалидтал.
ОьрчIал ва кулпатирттал отделданул аякьа дуллай бур 52 инсаннай. Щаллагу райондалий ЦСОН-далий социально-бытовой кумагирттал щаллу буллай бур 500-нная ливчусса инсантал.
2013 шинал декабрь зуруй дурксса «Об основах социального обслуживания граждан РФ» тIисса федерал закон щаллу дуллансса мурадрай, ЦСОН-далучIа тIиртIуну дур телефондалул «горячая линия», ванил номергу бивщуну бур райондалул кказитрай. Ва телефондалийн гьантлул бакIрах оьвтIий бур, Гъумучату бикIу, щархъаяту бикIу, ЦСОН-далия маслихIатрайну кумаг аьркинсса пенсионертал. ГьунчIукьатIрал шярава баян бувна угьарасса пенсионер, гъанчу бакъа, урганма акъа, цувалу ливчIун ур, бюхъарчан Республикалул мушакъатминнал пансионатравун тIайла уккаву ччай ур тIий. Му иширал ялув ванан кумаг бан багьлай бия. ЦСОН-лул зузалт А. МахIаммадовал ва Л. Усттаровал ганан аьркинсса хIакинтурал чулухасса справкарду щаллу дурну, га пенсионер республикалул бугьарасса мушакъатминнал пансионатравун тIайла увккуна. Мува куццуй, мушакъатсса 3 оьрчI Республикалул реабилитациялул центрданий хъин хъанан тIайла буккан аьркинну, ЦСОН-далул зузалтрал, аьркинсса медициналул справкардугу щаллу дурну, вай реабилитациялул центрданийн тIайла бувккунни.
2015 шинал ЦСОН-далул чулуха Лакрал райондалийсса ахIвал-хIал кIюласса 33 кулпатран арцуйнусса кумаг бунни, бакIра-бакIрах, 3 азарунния 4 азаруннийн бияннинсса. Ялагу арцуйнусса кумаг бувну бур ятинтурал 13 кулпатран, 3 азарунния 9 азарда къурушрайн бияйсса лагрулий. Му бакъассагу, укунсса кулпатирттан, пенсионертуран ЦСОН-лул зузалтрал хIукму-кьанундалул, цIуллу- сагъшиврул хIакъиравусса суаллан маслихIатрайнусса кумаг буллай бур.
Байрандалул шадлугърайн ЦСОН-далул къатравун букlлакlисса пенсионертуран, оьрчlан ва кулпатирттан хъамалушиннаран дуки-хlачlиялул чlюлу бувсса ссупрардугу тlивтlуну, гайннан дялахъру дан райондалул Культуралул къатлул зузалтрайн оьвчай.
Бюхттулсса Ххувшаврил 70 шинал юбилейрал байран хьунадакьлай, гьарца шинал кунма, ЦСОН-лул хъунама Шяпи Щурпаев цалва зузалтращал лавгуна Гьунчlукьатlрал ва Увурдал шяраваллавун, Хъун дяъвилул ветерантал М. КЬ. Даудов, Ж. И. Ибрагьимов ва Оь.Оь. Къардашов барча бан ва гайннан бахшиширттайну­сса ва арцуйнусса кумагру бан. Ва байрандалул хьунийн, ЦСОН-лул сипталийну, баян бувну бия 7-9-ми ва 9-11-ми кла­ссирттавусса дуклаки оьрчlал дянив Хъун дяъвилул тематикалун хас дурсса сочинениялул конкурс.
Ххувшаврил 70 шинал юбилейран хас дурсса ЦСОН-далучlасса шадлугърай гьуртту хьуна райондалул бакIчитал, райондалул идарарттал вакилтал, дяъвилул ветерантал. Сочинениялул конкурсрай ххув хьусса оьрчIан буллуна дипломру ва арцуйнусса бахшишру.
ЦСОН-лул зузалтрал ва пенсионертурал Ххувшаврин хас дурсса парадрайгу гьурттушинна дурссар.
Гьашину ЦСОН-далул зузала Г. Д.Изиевал цачIава ккалданийн багьсса оьрчIру Лаккуйн бувкIсса циркиравун бувцунни ва Ккурккуллал шяраваллил школданучIасса дяъвилул вир­ттавран хас бувсса музей ккаккан бан бувцуну лавгунни, интдайдихьулул кьинилун хас дурсса шадлугърай къавтIигу бивчуну, оьрчIащал тяхъасса тIуркIурду бунни ва миннайх бартри, шинни-пинни дарчIунни.
ХIасил, ЦСОН-далул хъунаманал ва зузалтрал щаллуну кIул дурну дур райондалийсса ахIвал-хIал кIюламиннал, ятин-оьрчIал ва чIявусса оьрчIру бусса кулпатирттал аьдад.
ЦСОН-далул зузалт гьуртту шай­ссар райондалул ва республикалул лагрулий дуллали­сса конкурсирттай, вай диялсса ХIурматрал грамотарттангу лайкь хьуну бур.
Мамлакат НажмутТинова