Щалагу жула билаятрай вай гьантрай кIицI ларгунни Совет аьрал Авгъаннава буккан бувну 30 шин бартларгсса кьини, лахъа-хъун бунни Авгъаннал аьрщарай аьрали бурж биттур буллай чувшиву ккаккан дурсса вирттал.

Андриана Аьбдуллаева
ХIакьинусса кьини МахIач­къалалив ялапар хъанай бур Авгъан дяъвилул иширттаву гьур­тту хьусса 800 инсан. Чансса ба­къар лакгу. Вай гьантрай на хьунабавкьура Бархъаллал шяравасса МахIаммадлул арс Ризван Исяевлущал. Ва кьинилуцIун бавхIуну бакъассагу, Ризваннущал цамургу ххарисса иширайгу хьунабакьин багьлай бия. Ларгсса шинал ахирданий, МЧС-рал зузалтрал пишалул байрандалул кьини, Ризваннун дуллунни «Щинавун бюкьлакьими хха­ссал баврихлу» тIисса Аьрасатнал МЧС-рал чулухасса медаль.

[dropcap]Б[/dropcap]архъаллал шяравасса Ма­хIам­мадал ва Сузуннул кулпат­раву Ризван ур чIана-чIавама. Гьай-гьай, тай шиннардий жагьилсса арсру бусса цинявппа нину-ппу кунма, бухьунссия вайгу арс аьралуннаву къуллугъ буллан уцлацийни дяъви нани­сса Авгъаннавун къаагьан тIий вас-ццахлий. Амма кьадардания тинмай-шинмай хьун къашайхха, кьисмат хьуну бур Ризваннунгу та дяъвилул цIаравух уккан. Кьини дуккайсса духIан шайнайхри учайссар жула. Зунттал чувнан багьайсса куццуй, яхIирай лархъун дур та кьини Ризваннулгу.

[pullquote]Авгъаннавусса дяъвилий ккаккан дур­сса чувшиврухлу Ризван лайкь хьуну ур ЯтIул ЦIукул ордендалун ва чIярусса цайми медаллан. Утти вай наградарттацIун ххи хьунни цамургу – «Щинавун бюкьлакьими ххассал баврихлусса» медаль. ЛичIи-личIисса шиннардий хьхьиривун оькьлакьи­сса шама инсан хха­ссал увну ур Ризваннул. [/pullquote]

Къуллугъ буллай ивкIун ур ва 1986-1988-ку шиннардий 181-мур полкрал разведподразделениялуву, цувагу яла нигьачIаву думур кIанттурдай – Кабуллал ва Баграм тIисса шагьрурдал дянив­сса Чарикарская Зеленка тIисса кIанттурдай. Чарикарская зеленка чIявусса жула аьралитал оьрмурдацIа бувсса, Авгъаннал дяъвилуцIун бавхIусса жула тарихраву пашмансса лажин чирчусса кIанттурдур.
ЧIарахсса машиналул хху­ллийх нанисса жула колоннардайн шичча шаттирахун моджахетътал ххяхлай бивкIссар. Заставалийсса Ризван усса взводран ярагъ, наркотикру лавсун нанисса караваннан ххуллу кьукьлан, Союзрая наними колоннарду мюхчан дан багьлай бивкIссар. Сайки гьарица кьини биту-ххитурду шайсса бивкIун бур.

Аминнул къалалия арх бакъа хьусса ца талатавриву, душманнал руртсса граната хъап дурну, экьиличин най уна, каниву пIякь увкуну захIматсса щавурду дирну дур Ризваннуйн. Оьттувух увккун унува, цала аьра­литал махъунмай хьуннин, душман айщун уллай ивкIун ур. Къиялий цала БТР-нучIан ивну махъ хIалдания лавгун ур. Ризваннул щала чурххаву цIалцIив диркIун дур. Зарал хьуну бур ца янин. Кабуллай операция бувну, чIярусса цIалцIив дурккун дур, амма хъиннура куртIну дурхми дукъаркнура лирчIун дур. Барз ва бачIиннуй Кабуллайсса госпитальданий, яла сайки ца зуруй Ташккантлив хъин уллай бивкIун бур хIакинтал Ризван. Миккугу, щала хъин къавхьуну, тIайла увккун ур Ленинградрайн. Ленинградрай кIилчингу операция бувну, ца зуруй уттуивхьуну ивкIун ур. Хъунмасса хIаллай Ризваннуя чIу-чIитI бакъа буруккинттарал къазразан бувну бивкIун бур ванал нину-ппу ва уссурссу.

Авгъаннавусса дяъвилий ккаккан дурсса чувшиврухлу Ризван лайкь хьуну ур ЯтIул ЦIукул ордендалун ва чIярусса цайми медаллан. Утти вай наградарттацIун ххи хьунни цамургу – «Щинавун бюкьлакьими ххассал баврихлу­сса» медаль. ЛичIи-личIисса шиннардий хьхьиривун оькьлакьи­сса шама инсан ххассал увну ур Ризваннул.
Ванайн барчаллагьрайсса нитти-буттал МЧС-рал къуллугърайн баян бувну, дуллуну дур Ризваннун МЧС-рал чулухасса медалгу. Цуварив ур: «Ттул кIанай цума-цанналгу дантIиссия ва даву»,- тIий.
Авгъаннавун тIайла буклакийни, данну-хьунну тIий, хъунисса махъру буслай бивкIсса къуллугъчитуран цала буллусса махъ ччяни хъамабитаву къащи хъанарчагу, занай, жяматийсса давурттаву чялишну гьуртту хъанай, жагьилминнал чIарав бацIлай, шаймур буллай бур хIакьинугу Авгъан дяъвилул ветерантал.