Нитти-буттал, оьрчIал дакIру гьулусан дуллалисса кьинину дикIай майрал 25-мур, Махъра-махъсса занг ришлашисса, кьини. ЧIюлуну лархсса оьрчIал, вайннал нитти-буттахъал, хъунбавахъал, хъунттаттахъал ххаришивурттал дуцIин дувай ва кьини школардал хIаятру, шагьрурдал, шяраваллал кIичIиртту. Гьашину майрал 25-мур кьини бигьалагай кьинилийн тIайла дацIаврийн бувну, майрал 24-нний, ххуллун кьини, рирщунни школардай Махъра-махъсса занг.
ХIажимурад ХIусайнов
Хъиннура исвагьину чIалан дикIайхха оьрчIал ва бугьараминнал чIюлу дурсса зунттавусса шяраваллал школардал хIаятру. Му исвагьишивугу ягин дуллан дикIай лагмасса ттюнгъану щюллисса яннарду лархсса зунттурдал ссиртирдалгу. Гай щюллишивурттал зума-къирагъирттавухсса чарттал, ххяллалгу хъиннурасса авур дутай янилун дагьлагьисса суратрал.
Мурхьру тIутIайх бичлачисса, лухччал симанну личIи-личIисса тIутIал чIюлу дуллалисса чIун. Ва чIюлушивруха лахьлахьисса оьрчIал дуцIин дурну дия ларгсса ххуллун кьини Ккуллал райондалийсса Ккуллал шяраваллил 1-мур школалул хIаятгу. Ттун ва кьини бахтти хьуна Аьрасатнал Виричу Мурачуев Халидлул цIа дирзсса школалул оьрчIал махъра-махъсса занг ришлашисса байрандалул кьинилух ябитан. Гьашину аьмну Ккуллал райондалийсса школардал 11-мур класс къуртал буллалисса оьрчIал сияхI дур 127, 9-мур класс къуртал буллалиминналсса – 116. Такну Ккуллал 1-мур школа гьашину къуртал буллалисса оьрчIру циксса буссарив ттухь бувсуна ва школалул директор Къянчиев Русланнул.
— Гьашину 11-мур класс къуртал буллай ур 28 выпускник. Вай кIива классри. Вай классирттал бакIчиталну бур Абакарова Залму ва Аьлиев Амучи. 9-мур класс къуртал буллай ур 25 выпускник. Вайгу кIива классри. Вай классирттал бакIчиталнугу бур МахIмудов Адам ва МахIмудов МахIмуд. Гайми ва Махъра-махъсса занг рищаврин хас бувмур винмагу ххал хьунссар…
Махъра-махъсса занг рищаврин хас дурсса тяхъашивуртту тIиртIуна ва гихуннай дачин дуруна школалул организатор Абакаров ХIусманнул:
— Ва кьини оьрчIан ва вайннахь дарс дихьлай бивкIсса учительтуран хъинну агьамсса кьинину хъанахъиссар. Учительтурал цала «хъаттирдалату» оьрчIру итабакьлакьисса кьини хъанахъиссар. Вания гихуннайсса вайннал оьрмулул кьинирдавух «леххаву» цала бюхъулийнусса дикIантIиссар. Мунияту цалва оьрчIан лахьхьин бувмур оьрмулувугу ишла булланссархха тIисса умудру учительтурал дакIурдивугу хIасул хъанай бушиву чIалачIисса зат бур, — куна. Хъирив ХIусман МахIаммадовичлул махъ буллуна школалул директор Къянчиев Руслан Ибрагьимовичлухьхьун. Такну Руслан Ибрагьимовичлул кIицI бувуна:
— Цалчин ттун барча учин ччай бур жулва оьрчIру итабакьлакьисса кьинилул байран. Гьашину школа къуртал буллалисса оьрчIру хъанай бур Ккуллал цалчинмур школалул 60-чинсса выпуск.1954-ку шинал 26 оьрчIал къуртал бувну бивкIссар жулва школа. Гайннавату 14 оьрчI ккуллал ва 12 оьрчI хъусращиял шяраватусса бивкIун бур. Жула школалий дуклай бивкIсса оьрчIаяту бувкссар чIявусса аьлимтал, жяматийсса ишккаккулт, спортсментал, шяраву, республикалий, Аьрасатнаву кIулсса цIардан лайкь хьусса пишакартал. Гьай-гьай, жул учительтурал дакIру (мукунна оьрчIалссагу дикIайхьунссар) цахъис гьис тIий, цирив оьрмулува чан хъанахъиний кунмасса иш бикIай ва хIакьину куннасса кьини дуркIсса чIумал. Вай 11-гу шинал мутталий жула чIарав бивкIсса оьрчIру жун шаппами, жулвами, оьрчIаяр хъис личIину къабикIай. Мунияту вай чIарату къалавгун ччан бикIай. Амма вайннангу цалва школалия гихунмайсса оьрмулул ххуллийн буккан аьркиншиву жунгу кIулну бикIай. ХIатта Аьрасатнал хIукуматрал школарду ххювардай къуртал буллалисса оьрчIан медаллу цIунилгу дуллан аьркиншиврул закон итадакьин дуранугу, бур оьрчIаву 4-5 оьрчI-душ марцIну ххювардай школа къуртал буллалисса. Умуд бур чIал къавхьуну дуллантIисса ЕГЭ жулва оьрчIал лахъсса баллайну дулунтIишиврийн. ЧIа учинну жулва оьрчIан тIивтIусса ххуллурду, дакIнил тIалавшинна дусса пиша канил бувгьуну, оьрмулул ххуллурдайх бачинсса тIайлабацIурду, — увкунни ванал.
ОьрчIан тIайлабацIу чIа тIисса ххуй-ххуйсса махъру лавхъунни школалул завуч МахIмудов МахIаммадлул, Ккуллал райондалул финотделданул хъунама Амучиев Кьурбаннул, Ккуллал шяраваллил администрациялул бакIчи Алхасов Шамххалал, выпускникнал нину ХIусайнова Сураял, 11-мур классрал бакIчи Аьлиев Амучил. Гания гихуннайсса тяхъашиву дачин дуруна цалва оьрчIал. Гьарца дарсирал учительнан хас бувсса шеърирдугу бувккуна оьрчIал, барчаллагь увкуна цахьра дарсру дихьлай бивкIсса учительтурахь, миннан бахшиширттан тIутIив ва нацIушивуртту, кIукIлу игрушкартту дуллуна. ОьрчIал увкуна ххуй-ххуйсса балайрду, царай исвагьийсса лаххиялуву къавтIун бивзуна душру. Школалул хIаятравусса тяхъашивурттавух гьурттушинна дуллай бия учительтал ва нину-ппугу. Яла 11-мур класс къуртал буллалисса Аьлилов МахIаммадлул, 1-мур классрал дуклаки оьрчI Данчиев АьвдурахIман хъарай щяивтун, рирщуна махъра-махъсса занг. Занг рирщуну махъгу мадарасса хIаллай най дия хIаятраву къавтIисса, балайрду тIисса, хъамакъабитулун суратру ришлашисса тяхъашивуртту.
Чара бакъа кIицI дуван ччива синтезатор, микрофонну бакьин баврил давуртту дакъагу, балайрду тIий, техникалулми давурттив цайнна ларсун, цукунчIавсса дайшишру хьун къадиртсса Ккуллал шяраваллил культуралул къатлул директор Аьлилов Аликлул ва Вихьуллал шяравасса музыкант ва балайчи Амираьлиев Аьлил цIарду. Хъунмасса барчаллагь вай культуралул зузалтран.
Шиккува выпускниктуран тIайлабацIу чIа увкуна Ккуллал райондалул УО-лул хъунаманал хъиривма Оьмариев Жамалуттиннул:
— На хьхьичIра-хьхьичI цIуллушиву чIа тIий ура цинявппагу оьрчIан. Учин ччива, жулла шяраваллаву инсантал чан хъанай бушиврийн бувну, пишардугу лавхьхьуну, жулва оьрчIру махъунмай зана бикIлай, цалла кIулшивурттан лархьхьусса давурттив жулва зунттаву хIасул дуллалисса чIунну дучIаннав куну. Вана ттул чIарав авцIуну, ккарччал хIакин хьуну зунттавунай зана хьусса, Ваччав зузисса ХIусайнов Раджаб. Укунсса жагьилтал чIяву хьунссар тIисса умуд муданмагу ттувату чан къашай, — увкунни ванал.
Цинявннанмагу ххуйсса ссупра тIивтIуну бия оьрчIал нитти-буттал. Барчаллагь вайннан.
Вания гихунмайгу Аллагьнал кабакьиннав.
