![](http://ilchi.beget.tech/wp-content/uploads/2019/06/Unti_hgtt.jpg)
[dropcap]Ш[/dropcap]ахьуйннал шяраву мизит буллай байбивхьуну шин-кIира хьунни. Му чIумул дянив мизит буллалисса ва шяраваллицIун дархIусса цайми-цаймигу
давурттавух хьхьичIунсса гьурттушинна дуллай бур «Шахьуйми» тIисса фондрал жагьилтал. ХьхьичIрагу цимилгу дурну, вай ларгсса бигьалагай кьинирдайгу хьунни шяраву ирглийсса субботник, шагьрурдая шайма Лаккуйн увкIун.
Бадрижамал Аьлиева
Субботникравух гьуртту хьун ччими чIявуя, амма давурттая, дуккаврия ти-шинмай хьун хъанай бакъая. Ва ххуллухгу жагьилтурал тамансса давуртту дунни, цIуну буллалисса мизитрацIун дархIусса.
[dropcap]М[/dropcap]укунна, ччюрк дартIун, марцI дунни шяраваллил хIатталу ва мунил лагма-ялттусса кIанттурду, 30-ку шиннардий шяраваллил мизитну бивкIсса, махъ хъамава-бивтсса, вай жагьилтурал хIарачатрайну ялун ливчусса Кьулла-Мизитрал лагма-ялттусса кIанттурдугу лавкьунни.
Ми давуртту дуллай бувхсса жагьилтал ХIасанова Бадирал бувсса нахIува-нахIусса пулаврайну ва цаймигу дукиялийну хъамалу хьунни Сагидов МахIаммадлул къушлий.
[dropcap]М[/dropcap]уния махъ жагьилтал бувккунни шяравух, хьунни шяравусса тарихрал ва культуралул агьамшиву дусса къатри дакьин даврил, лирчIмурдагу дуруччаврил ялувсса ихтилатру.
[dropcap]И[/dropcap]рглийсса субботник хьунтIиссар ва ххуллункьинигу, июньдалул 30-нний. Гьава гъилину, дуниял даркьуну дунура жагьилтуран ччай бур, цIуну буллалисса мизитрацIун дархIуну, шайссаксса чIярусса давуртту дуван. Шиккува кIицI лаган, ва лавгсса Зумаритавал зуруй жагьилтурал хIарачатрайну дартIссар 772 азарда къуруш арцул, вайннул кумаграйнугу мизитрал чIиртту биялну лавай хьунтIиссар.
Зу дуллалимуницIун Аллагьнал кабакьиннав, чIара щарнил ххаллилсса жагьилтал!