Ккуллал райондалул УО-рал сакин бувну буссия гьарцагу дарсирал учительтурал дянивсса олимпиада даврил график. Му графикрайн бувну, уттигъанну школардай хьуссар хIисаврттал дарс дишайсса учительтурал дянивсса олимпиада. Муний гьуртту къавхьунни, личIи-личIисса багьанттайн бувну, цаппара учительтал.

Олимпиадалийн бувкIминнан хIадур дурсса хасъсса заданияр­тту биттур дуван ккаккан дурну ду­ссия 2 ссят. Учительтурал хьхьичI бивхьусса суаллу буссия хIасул бувну укунсса масъаларттаяту: 2 суал хIукуматрал Агьаммур экзамендалия, 2 суал – хIукуматрал Цасса экзамендалия, 3 суал – ларгсса математикалул олимпиадарттаясса. Гьарта-гьарзану жавабру дуллуну дия: МахIаммадов ХIасаннул (Ваччиял школа), Щайхов Щайхлул (Вихьуллал школа),Гъазиева Наргизлул (Ккуллал 2-мур школа) ва мукунма цайминналгу. Амма аьмну хIисав хьунни учительтуран уттигу аьркинну бушиву захIмат бихьлан оьрчIан дарсру ла­хьхьин дуллали­сса хIадуршиннарал цIаний.

4-ми классирттал дянивсса хIисаврттал олимпиада

Дагъусттаннал КIулшиву дулаврил министерствалул амрулийн бувну, Ккуллал райондалийсса школардал 4-ми классирттал оьрчIал дянив дурссар хIисаврттал олимпиада. Укунсса олимпиада гьашину цалчинни дурсса. Муниципал этапрай гьуртту хьунни 25 дук­лаки оьрчI. Вайннал жаваб дулун багьлай бия захIмат бакъасса 5 суалданун, цайнугу ласун бюхълай бивкIсса 20 балл.
Олимпиадалул жям укун­сса хьунни: 1-сса кIанттурду бувгьунни: Алхасова Марижатлул – 18,5 балл (Ккуллал 2-мур школа), МахIаммадова Гулаятлул – 18,5 балл (Ккуллал 2-мур школа).
2-ми кIанттурду: Гъазиева Радмила, 16,5 балл (Хъусращиял школа), Оьмариев Муси, 16,5 балл (Ккуллал 1-мур школа), Аьлиев ЯхIия, 16,5 бал (Ккуллал 2-мур школа).
3-ми кIанттурду бувгьунни: Чаринова Сиясатлул, 15 балл (Ккуллал 1-мур школа), Устарова Галинал, 15 балл (Ккуллал 1-мур школа), Аьбдуллаева Халисатлул, 15 балл (Ккуллал 1-мур школа), Кьурбанова Марияннул, 15 балл (Хъусращиял школа).
Республикалул этапрай хьу­сса олимпиадалий гьуртту хьуссар Ккуллал 2-мур школалул дуклаки душ МахIаммадова Гулаят. Ванил дянивсса ккаккияртту чIалачIи дунни.

ЗахIматрал дарсирдал выставка-конкурс

Уттигъанну Ккуллал райондалул УО-рал дунни дуклаки оьрчIал дянивсса захIматрал дарсирдай дурсса усттаршивуртту кка­ккан дуллалисса выставка-конкурс. Ши­кку гьуртту хъанай бия 5-9-ми кла­ссирттал оьрчIру. Бия гьур­ттушинна къадурсса школарттугу. Хъиннура ххуйсса гьурттушинна дунни Ваччавсса ОьрчIал творчествалул къатлучIасса кружокир­ттайн заназисса оьрчI-душварал. Янилун дагьлагьисса, хъинну ххуй­сса макетру дия: «Кутандалул макет», «Ппал дюххай къатIа» – Хъусращиял школалул (каялувчи Закарияев МахIаммад-ХIажи); «Парталул макет», «Вихлиночка» – Вихьуллал школалул (каялувчитал ХIасанов Исмяил, Шалласуева Ххадижа), «Гъунттул макет», «Гьарахъалттил макет» – ЧIяйннал школалул (каялувчи Сутаева П.); «Буттукьрал макет» –2-мур ЦIувкIуллал школалул.
Технологиярттал дарсирдай дурсса давурттал конкурс буссия личIину. Му конкурс-выставкалул жям хьунни укунсса:
1-мур кIану бувгьунни Ккуллал 2-мур школалул 5-мур классраву дук­лакисса А. Шахшаевал. Ванил бия щяикIайсса кIану бувну (каялувчи МахIаммадов Р.).
2-мур кIану бувгьунни Ваччиял школалул 7-мур классраву дук­лакисса С. ХIажиевал. Ванил дия синааьрщарая дурну «Пасхальные яйца» (каялувчи ХIажиева Ш.). ЧIяйннал школалул 5-8-ми кла­ссирттаву дуклакисса оьрчIал цачIу дия янналий ххаллал кумаграйну щаршсса сурат.
3-мур кIану бувгьунни Хъусращиял школалул 6-мур классраву дуклакисса А. Шариповал. Ванил дия цилла дурсса лаххия (каялувчи Карсаева Д.).
Гьурттушинна дурсса, янилун дагьлагьисса давуртту ккаккан дурсса циняв школарттан, оьрчIан, ОьрчIал творчествалул къатлун дуллуссар грамотартту. ХьхьичIунсса кIантту бувгьусса давуртту гьан дурссар республикалул конкурс-выставкалийн, Дагъусттаннал Педуниверситетрал технологиялул факультетрай хьунтIисса.

«НигьачIаву дакъасса нигь»

Мукьилчинсса шинни гьашину райондалул школардал дуклаки оьрчIал дянив буллай «НигьачIаву дакъасса нигь» цIанилусса конкурс. Шиву гьур­тту шайссар 4-6-ми классирттаву дуклакисса оьрчI-душру. Гьашину ва конкурсравух гьурттушинна дуллай бия 12 школа. Конкурс цуппагу най буссия ЧIяйннал школалул асфальт бавкьусса хIаятраву. Шиккусса номинацияртту дия укунсса: 1. «Фигурное вождение велосипеда», 2 душ, 2 оьрчI. 2. «Конкурс по правилам дорожного движения». 3. «Знание основ доврачебной первой помощи».
ХIисав дурсса чIумал, цинявппагу конкурсирдал журардай 1-мур кIану бувгьунни Хъювхъиял школалул командалул (каялувчину ия Гъазиев Аздар), 2-мур кIану бувгьунни Ккуллал 1-мур школалул командалул (каялувчину ия МахIмудов ХIамид), 3-мур кIану бувгьунни Хъусращиял школалул командалул (каялувчину ия Закарияев МахIаммад-ХIажи).
Цала-цала конкурсрал журардавугу укунсса ккаккияртту хьунни:
«Фигурное вождение велосипеда»: 1-мур кIану – Хъювхъиял школалул, каялувчину ия А. Гъазиев; 2-мур кIану – Ккуллал 1-мур школа, каялувчи ия ХI. МахIмудов; 3-мур кIану – Ккуллал 2-мур школа, каялувчину ия Р. МахIаммадов; Хъусращиял школа, каялувчи М-ХI. Закарияев.
«Знание правил дорожного движения»: 1. Хъусращиял школа, каялувчи М-ХI. Закарияев; 2. Ккуллал 1-мур школа, каялувчи ХI. МахIмудов; 3. Вихьуллал школа, каялувчи С. Сулайманов; ЦIуйшиял школа, каялувчи А. МахIаммадова.
«Знание основ оказания доврачебной помощи»: 1. ЦIуй­шиял школа, каялувчи А. МахIам­ма­дова; 2. Ваччиял школа, каялувчи С. Алхасов; 3. ЧIяйннал школа, каялувчи А. Рамазанов.
Аьмну 1-мур кIану бувгьусса Хъювхъиял школалул команда ларгссар зональный этаправух гьуртту хьун Гъуниннал райондалийн, бувгьуссар 2-мур кIану, ларсун дия грамота.
Мукунна жулла райондалий ххув хьусса командарттан Управлениялул чулуха дуллуссар хасъсса грамотартту.
Юсуп ХIусайнов, Ккуллал райондалул КIулшиву дулаврил управлениялул пишакар