ХьхьичI райондалул администрациялул актовый залдануву Юсуп МахIаммадовлул барча бунни администрациялий зузисса цинявппагу хъами. «Ччя-ччяни учин къашай жущава жула ниттихъахь, кулпатирттахь, ссурваврахь, душваврахь, архIал зузисса хъаннихь барчаллагьрал махъру.

Мунияту 8-мур Мартрал кьини зун ми махъру кIилий-шамлий хIалалссар. Ва цалчинсса интнил байрандалул кьини кунма чаннасса, ххари­сса асардал бувцIусса хьуннав зул оьрмулувусса гьарцагу гьантта», — увкуна Юсуп МахIаммадовлул. Гьарцагу хъамитайпалун дуллунни тIутIив ва бахшишру.
Гара кьини райондалул клубраву хьуна магьирлугърал зузалт­рал концерт. Залданувун бавтIсса хъами барча буллалисса цала ихтилатраву Юсуп МахIаммадовлул, хъаннил байрандалул тарихрая буслай, кIицI лавгуна Аьрасатнаву Хъаннил байран дуллай байбивхьуния шихунмай, ттуршлийсса шиннардил мутталий, жула билаятрай хъаннил хIал-ахIвал ххуй хьурчагу, миннал ихтиярду дуручлай бухьурчагу, кьянатсса зунттал шартIирдаву ялапаргу хъанай, зугу-зузисса хъаннил оьрму хIакьинугу дахIалай учинсса бакъашиву. ОьрчIал тарбиялулсса, ичIаллил кушулул­сса баврицIун, жяматрал оьрмулувугу хъаннил захIматрал бутIа ва бияла ххину-ххишаласса бушиву. Хъун дяъвилул шиннардий, тIурчарив, ми, арамтурал хъаргу цайнна ларсун, зий бивкIшиву. ХIакьинугу чансса бакъашиву район хьхьичIуннай даврил цIаний гьарцагу аралуву дакI тIайлану захIмат буллалисса хъами. Му дакI тIайласса захIматран кьимат бишлай, райондалул гьарцагу идаралул кIи-кIива, шан-шанма зузала барча бан дуллуна тIутIив ва арцуйну­сса бахшишру.
Хъирив райондалул магьирлугърал къатлул зузалтрал кка­ккан дуруна ххаллилсса концерт. Концертрай тIутIисса балайрду бия ниттихъан хас бувсса.