Ттун муданмагу чIалан бикIай хIакинтал ва школардай дук­лаки оьрчIахь дарс дихьлахьи­сса учительтал яла цала буржру дакIнийхтуну биттур буллалимину. Ттула оьрмулувугу, цуксса бюхълай бурив, хIакиннал ва учительнал хIурмат буван ччан бикIай. ХIакьинусса ттул ихтилатгу, гьай-гьай, жунма чара бакъа аьркинсса хIакинтуравасса цаннаятур, Ккуллал райондалул азарханалул хъунама хIакиннал хъиривману зузи­сса, августрал дайдихьулий 50 шин бартларгсса, Буржунов Рашид Мяъсудлул арснаятур.
Цала оьрмулул шиннардия Рашидлул бувсунни ттухь укун­сса затру:
— На увссара август зурул 3-нний 1966-ку шинал Ккуллал шяраву. Ттул буттайн Мяъсуд, ниттийн Качар учайссия. Бутта ия гъаттарал хIакин. Му лайкь хьуссар «Заслуженный ветврач РД» тIисса хIурматрал цIанингу. Нину жу, оьрчIру, тарбия буллай шарда дикIайва. Жул кулпатраву мукьа уссу ва кIива ссу бия. На ура шамилчинма.
1983-ку шинал на къуртал був­ссар Ккуллал 2-мур школа. Гара шинал дуклан увхссияв Дагъусттаннал мединститутравун. Дуклай усси­яв лечебный факультетрай.1987-ку шинал перевод ларсъссия Саратоврайсса военно-медицинский академиялувун. Ттун ччай бия аьрали хIакин хьун. 1989-ку шинал дуккаву къуртал шайхту, на зун тIайла увккунав «Байконур» космодромрачIасса Ленинск тIисса шагьрулийн, ти­ккусса медслужбалул хъунаману. Тикку зий дурссар на кIира шин. Дуллуна ттун тикку аьрали чингу, медслужбалул хъунама лейтенантнал. Яла бувкIуна замана СССР лирсса. Мунияту на, Аьрасатнавун зана хьуну, зун ивкIссияв Грозналий, тайннал рес­публикалул азарханалий, специализациягу ларсун, анестезиолог-реаниматорну. Тикку зий дур­ссия шин ва дачIи. Му чIумалва на бувссия кулпатгу, му медсестрари. Грозналиятугу на зана хьуссияв Да­гъусттаннайн, зун ивкIссияв Ххажалмащилийсса районнал дянив­сса азарханалий, анестезиологну ва физиотерапевтну. Гикку зий хьуна ттул 2 шин. 1995-ку шинал зана хьура ттула Ватандалийн – Ккуллал райондалийн.
— Жула Ккуллал райондалий яхъанахъисса инсантурал дянив цукунсса цIуцIавуртту дур чIяруну хьунадакьлакьими?
— ЧIяруми цIуцIавуртту дур давлениярттал, къюкIлил, онкологиялул. Къашайшалтгу чIявуми бугьарами бур.
— Медициналул модернизация най душиврия ихтилатру бикIайхха, дуссарив жучIарагу мунин хасъсса дахханашивуртту?
— «Национальное здоровье» тIисса программалийн бувну буллуссар жунмагу анаварсса медициналул 3 машина, 2 аппарат УЗИ, ца шикку бур, ца Ккулувсса азарханалий буссар. Бур жучIава эндоскоп, кардиограф, рентген аппаратру, цифрардайсса флюорограф. Флюорограф бур стационарданийсса ва машиналий бивхьусса. Шиккува ххи буван ччива жучIан хъин хъанан увкIсса къашайшалан аьркин­сса дарурттугу дузалну бушиву.
— Вил къуллугърайн ци дагьайссар?
— На ххал дувайссар хIакиннал дурсса назначенияртту, къашайшала уттуишин аврил иш-тагьар. Дувайссар палаталул хIакиннащал ялтту уккаву. На каялувшиву дувайссар мукунна анаварсса медициналул кумаграл къуллугърайгу. ЖучIава хъин уван къахъанахъима ялавай гьан уваннин мунахьхьун булайсса документирттай къулбас дувайссар, мугьру бищайссар. Мукунма ттуйн тапшур бувну буссар хIакинтурал комиссиялул председательнал буржгу, больничный листру цIакь давугу.
— Жула азарханалий зузисса хIакинтурава щил цIарду кIицI дуван бю­хъанссия вища?
— Ккуллал райондалий зий ур 24 хIакин, 100-нния ливчусса медсестрахъул. Вай цинявппагу цалла даву ххирасса, цачIана ххал уван увкIманал ялув бавцIусса пишакартал бур. Цинявппагу хIакинтал, медсестрахъул цала пишалул лахъми категорияртту ларсъсса зузалт бур. Вай кIицI булларча, сияхI ла­хъисса хьунссар. Амма кIицI къадурнугу къабучIир цаппараннал цIарду: Аьшаев Нуруллагь, Аьрасатнал ва Дагъусттаннал хIурмат лавайсса хIакин, Дагъусттаннал хIурмат лавайсса хIакинтуран цIардан лайкь хьу­сса МахIаммадов Аьли, Шамххалов Гьарун, Асланбекова ПатIимат.
— Бувсун ччива вила кулпат­раятугу.
— Ттул бур кIива душ, ца арс. Душ Эльвира зий бур оьрчIал хIакинну. Арснал Оьмарил къуртал бунни Дагъусттаннал Медакадемия. Шийн зун учIан аьркинссар. Фарида тIимур душ 7-мур классраву дуклай бур.
— Барчаллагь, Рашид, дакI­нийхтунусса гьарта-гьар­засса ихтилатрахлу. Барча вил 50 шинал лахъазангу. ЦIуллуну итаннав инавагу.