Сентябрьданул 1-нний Кку­л­лал райондалий Хъювхъиял шяраву хьхьичIава зий бивкIсса оьрчIал багъ бакьин бувну цIунилгу тIивтIунни. ОьрчIал багъ тIитIаву хъунма­сса иширан ккаллину бур ва Хъювхъиял чиваркIуннал цалва харжи-хуржилийну бакьин бувну тIийгу.

ХIажимурад ХIусайнов
ЧIявуну СМИ-рдаву буслан бикIай чуврив щиллив мизит, килиса, синагога бакьин бувну бушиврия. Вана утти жулва лахъсса зунттал дарардаву дирхьусса шяраваллал дакIру чумартсса чиваркIуннал дайдишавай оьрчIал буруккинтту дузал буллалаву. Явара ва ца оьрчIал багъ тIитIаву къахъанахъиссарча, улу цайминнан ххуллу ккаккан буллалисса ишнугу хъанахъиссар. Шивун занантIисса мюрщултран тарбия лахьлантIиссар, жяматраву, чIаххувращал бавкьуну бикIан багьлагьишиву мюрщину бунува кIул хъанантIиссар. Шиккува кIицI буван, укуннасса даву дуллай бу­ссар Хъусращиял шяравугу. Тикку щалва оьрчIал багъ бакьин къабуварчагу, ца группа ххи буван гьарта-гьарзашиву дуллай буссар.Тай давурттугу шяраваллил чиваркIуннал цалла арцухри дуллалисса.
Утти бусанна на зухь Хъювхъиял шяраву оьрчIал багъ тIитIаврия. Хъювхъиял шяравалу дирхьуну дуссар Хъуннеххавун дагьлагьи­сса КьукIма лахъазантул чулуха нанисса Кулинка неххал кия чулухсса ца лахIунттуй. Ва шяравалу хъанахъиссар Лакрал райондалул зума-къирагърайсса Кьукуннал шяравалличIату Ккуллал райондалийн бухлахинийсса цалчинсса шяравалуну. Шиккур дикIайсса «Щунудагъ» фестиваль. Ва фестиваль дайссар Хъювхъиял шяравасса Оьмари Къаллаевлул. Ва иширалгу тасттикь буллай бур Хъювхъиял шярава бувккун бушиву чIявусса ххаллилсса чиваркI. Шяравалу чIири-хъуннасса душиврул иш бакъассар, гикку яхъанахъисса инсантурал дакIурдил утта-лахъишиврулли иш бусса. Ва шяравассар жула цанналусса такьвалий балай учайсса Да­гъусттаннал артистнал лахъсса цIанин лайкь хьусса АхIмад АхIмадов, дунияллул сурат дихьултравух цIа ларгсса художник Лак Буни, тарихчи МахIач МахIаммадов, шаэр, чичу, журналист Валерий Амиров. Ва шяравассар Ккуллал райондалул муниципал сакиншиннарал бакIчи Сулайманов Сяид ХIасниевич.
Гьай-гьай, оьрчIал багъ бакьин буван инсантал лякъаву, гайннал дуллалимур ца ххуттайх дачин даву Сяид ХIасниевичлулли дурсса. Каялувчинан ччан бикIарча, шайсса дур даву ва Хъювхъиял шяраву кунна.
Сентябрьданул 1-нний, Ваччав школа тIивтIуну махъ, шяраву оьрчIал багъ тIитIин бувкIсса хъамал хьунабавкьуна Хъювхъиял Аьрасатнал халкьуннал аслийсса культуралул центрданул зузалтрал, исвагьийсса лакку яннардугу лар­ххун, ччатIущал ва нисиращал. Хъамаллуравух бия ДР-лул ХIукуматрал Председательнал хъиривчу Шарип Шарипов, связрал министрнал хъиривчу Тамерлан Бугъанов, ДР-лул КIулшиву дулаврил ва элмулул министерствалул вакил Ирина МахIаммадрасуловна, Экономикалул министерствалул зузала Шагьимардан Мудуев, ДР-лул Халкьуннал Мажлисрал депутат ХIасан Аьлиев, Ккуллал райондалул бакIчи Сяид Сулайманов, ванал хъиривми Сабрина Илиясова, Эдуард ХIажиев, УО-лул бакIчи Альбина ХIаммакуева, Ккуллал райондалул администрациялул иширтталсса буваймур Надежда ХIажиева, Лакрал ва Ккуллал районнал цачIусса полициялул хъунама МахIмудов Марат ва цаймигу чIявусса хъамал.
ОьрчIал багъ тIитIаврил шадлугъ дайдирхьушиву баян бувна Хъювхъиял школалул учительница, «Почетный работник общего образования РСФСР» цIанин лайкь хьусса Софият Кьурбановал. Яла щаллу дурна Аьрасатнал гимн.
Хъирив махъ буллуна райондалул бакIчи Сулайманов Сяидлухьхьун. Ванал барча бувна Хъювхъиял жямат шяраву оьрчIал багъ тIитIаврищал ва хъунмасса барчаллагь увкуна ва багъ бакьин буван кабакьу бувсса шяраваллил чиваркIуннахь. Ванал яла махъ буллуна, ва оьрчIал багъ Хъювхъиял шяравусса школалущал цачIусса бухьувкун, школалул директор Исяева Аьйша ХIасниевнахьхьун. Ванил увкуна:
— ХIурмат лавайсса хъамал, даврил уртакьтал, дуклаки оьрчIрув, нитти-ппу, оьрчIрув! ХIакьину жува бавтIссару шиккун иширайн буккан буван яла мюрщими оьрчIал хиял. ХIакьинусса кьинилух ялугьлай бувагу ца барз лавгун бунува, ва хъуннасса чIунну чIалай дия жунна. Ккуллал райондалул бакIчинал сипталийну дакьин дуван пикри хьуссар духсса оьрчIал багърал къатри. Сайки циняв шяраваллил инсантал, цащава шаймур буллай, гьуртту хьуссар ва давривух. Хъунмасса барчаллагь арцуйну кумаг бувсса чиваркIуннан жяматрал чулуха. Барчаллагь учин ччай бур Кьурбанов МахIаммадлухь, УМС-2 идаралул бакIчи, Сулайманов Артурдухь, «Арткомстрой» идаралул бакIчи, АхIмадов Максимлухь, ишбажаранчи, Кьурбанов ХIусайннухь, Дагъусттаннал инкассациялул управлениялул бакIчи, Сулайманов Нариманнухь, ишбажаранчи, Гъазиев АбутIалиблухь, ишбажаранчи, Сулайманов Сяидлухь, райондалул бакIчи, ванал хъиривчу Илиясова Сабринахь, Ккуллал райондалул администрациялул иширтталсса бувайсса ХIажиева Надеждахь ва цинявппагу администрациялул зузалтрахь. Барчаллагь тIиссара шяраваллил школалул оьрчIахь, каникуллал чIумал бувсса кумаграх. Барчаллагь оьрчIал багъ буллай бивкIсса зузалтрахь ва вайннал кумагчитурахь.
ОьрчIру – жулва бучIантIимурди. Мунияту «Теремок» цIа дирзсса оьрчIал багърал зузалтрал яхI бувантIиссар жулва оьрчIру Ватан ххирасса, ядуван бюхълахъисса инсантурайн кIурабаен буван. ЧIа тIий бура цIуллушиву хIакьину оьрчIал багъравун бувкIсса мюрщултран ва муданмагу багъравун букIлансса хъит гьарца кьини хIасул хъананссар тIисса умудращал. Цинявннанмагу тIайлабацIу чIа тIий бура ва паракьатсса ссав жула цинявннал ялув, — увкуна Аьйша ХIасниевнал.
Яла махъ буллуна ва багъравун нанисса мюрщултрахьхьун. Вайннал дурккуна оьрус ва лакку мазурдийсса дикломацияртту, ватандалун, миллатран, Хъювхъиял шяраваллин хас дурсса.
Махъру лавхъуна хъамаллуралгу. Шарип Шариповлул оьрчIал багъран пишкаш бунни музыкалул центр.
Яла ятIулсса лиссу кьукьаврийну тIивтIуна оьрчIал багъ. ЧIалай бия циксса харж буккан бувссарив ва бакьин буван, ххуйва-ххуйсса къатри бия, чаннава чаннасса. Циняв барчаллагь тIий бия укунсса даву дуван хIарачат бувсса чиваркIуннахь. Жувагу, вайннацIун бакьлай, чIа учинну бюхъу буну личIаннав жулва зун­ттал халкьуннал чиваркI куну, чув, ци дуллай бунугу.