Ккуллал шярава Хъун дяъвилуву гьуртту хьун лавгсса 436 чувнава 18 жагьилсса учитель ивкIссар. Миннавату 11 дяъвилул цIарава шяравун къаувкIссар. Гайннал цIарду ядуллай буссар Ккуллал шяраваллил школардал дуклаки оьрчIру. Гайннал аьпалун школалул хIаятраву дацIан дурссар гайннал цIардащалсса гьайкал.

Ххувшаврил кьинирдай ва цаймигу агьамсса кьинирдай жанахIравусса суратирттал хьхьичI дишайссар «Чувшиврул дарсру». ЦIана ва школалун дирзун дуссар 1999-ку шинал Аьрасатнал Виричунал цIанин лайкь хьусса Халид Мурачуевлул цIа.
1970-80-ку шиннардий школалул оьрчIал цалва учительтуращал архIал бавтIссар Хъун дяъвилуву гьуртту хьусса чиваркIунная бусласисса чагъарду, суратру. Гай суратру дирхьуну, дурссар стендру. Мукунсса ца стендрай дуссар дяъвилия зана къавхьу­сса 11 учительнал суратру. Нанияра цIунилгу вайннал цIарду дакIнийн дичиннуча: Аьбдуллаев (Обаков) ХIасан – дяъви байбишиннин хьхьичI оьрус мазрал учительну зий ивкIссар; Ибрагьимов (Ачуев) Муса, байбихьулул классирттал учитель; АьбдурахIманов Рамазан физикалул ва химиялул учитель; Аьбдуллаев МахIаммад, байбихьулул классирттал учитель; Арсланов Муси, физкультуралул ва военный делолул учитель; Жалилов ХIасан, географиялул ва тарихрал учитель; Маммаев Рамазан, оьрус мазрал ва сурат дишаврил учитель; Мамедбеков Ажув, дагъусттаннал литературалул учитель; Жамалов АхIмад (АьнтIикIа), байбихьулул классирттал учитель; Аккуруев Рамазан (Акъу База), тарихрал учитель, школалул директор.
Ххувшавугу ларсун бувкIми учительтурал хъунмасса захIмат бивхьуссар жула ялун нани­сса ник цила багьайсса кьяйдалий тарбия дуван. Гай яхъанай бивкIссар, зий бивкIссар жущала. Гайннан кIулну бия цукунсса захIматшивурттай ларсъссарив Ххувшаву.
Оьмаров Аьли, тарихрал учитель, зий ивкIссар лахъисса му­тталий школалул директорну; Аьбдуллаев Рамазан, оьрус мазрал учитель, хIаписар, зий ивкIссар Ккуллал 2-мур школалул директорну; Оьмариев Аьли, военрук, хIаписар; Сулайманов Бадруттин, хIисаврттал учитель; Ибрагьимов Рамазан, байбихьулул классир­ттал учитель, чичу, зий икIайссия «ЧаннацIуку» кказитрал редакторнугу; Аскандаров Загьиди, зий икIайссия пионервожатийну; ХIажикьурбанов ХIуса, дяъви байбишин хьхьичI зий ивкIссар пионервожатийну ва комсомол организациялул секретарьну, полковникри.
Сагъну ливчIминнавасса махъа-махъма Оьмаров Аьли ахиратравун лавгунни майрал 9-нний 2015-ку шинал, 70 шин Ххувшаву ларсун хьунадакьлакьисса кьини (!).
Рамазан Маммаев,
Ккуллал 1-мур школалул учитель