Март зурул 10-нний Москавлив П. И. Чайковскийл цIанийсса ПаччахIлугърал консерваториялул Рахманиновлул залдануву хьунни жула хъунасса композитор, Аьрасатнал халкьуннал артист, Аьрасатнал ПаччахIлугърал ва ХIукуматрал премиярттал лауреат Ширвани Чаллаевлул оьрмулун 80 шин там шаврил юбилейран хас дурсса концерт.

Зулайхат Тахакьаева
Хасну концертрайн Аьрасатнал личIи-личIисса шагьрурдая, хIатта дазул кьатIатугума, бувкIун бия дустал- гьалмахтал, гъан-маччами, ванал творчество ххирами. Миннавух бия: Дагъусттаннал цалчинсса президент Муху Аьлиев; 2002-2008-ку шиннардий Ингушнал Республикалул президентну ивкIсса, хIакьину Дянивмур Федерал округрай Аьра­сатнал Президентнал буржру биттур буллалисса вакилнал хъиривчу Мурат Зязиков; жяматий­сса ишккаккулт – МахIаммад Аьбдулхабиров ва Аьбдурашид Саэдов; П. И. Чайковскийл цIанийсса паччахIлугърал консерваториялул профессор Всеволод Задерацкий; Аьрасатнал Композитортурал союзрал Смоленскаллал отделениялул хъунама Николай Писаренко; Л. Толстойл цIанийсса паччахIлугърал музейрал директор, профессор Виталий Ремизов; Тульскаллал паччахIлугърал хорданул каялувчи Александр Соловьев; композитор Мираб Гагнидзе ва чIявусса цаймигу музыкалул ва магьирлугърал хьхьичIунсса иш­ккаккулт.
Концерт дайдишин хьхьичI цала ихтилатраву Всеволод Задерацкийл бувсуна Ширвани Чаллаевлул оьрмулия ва творчествалия, ганал произведениярттал цайнма биян бувсса асардая.
ТIиртIуна концерт цала Ширванинал, ччянива дунияллийх машгьур хьусса лакку мазрайсса балайрдайну.
Концерт сакин хьуну дия кIива бутIуя: цалчинмур бутIуй щаллу дурна скрипкалунсса, синттал (струнный) оркестрданунсса ва флейталунсса концерт. Скрипкалий руцлай ия Аьрасатнал лайкь хьусса артист Степан Якович. Американал шаэр Эмили Дикинсоннул шеърирдайну чивчу­сса цикл щаллу бувна Б. Покровскийл цIанийсса Москавуллал ПаччахIлугърал академиялул камер музыкалул театрданул солистка, Аьрасатнал лайкь хьусса артистка Ирина Нарскаял. Ва цикл композиторнал хас дурну дур цала оьр­мулуву агьамсса кIану бувгьу­сса учитель, хъунасса композитор Дмитрий Шостаковичлул аьпалун.
КIилчинмур бутIуй ПаччахI­лугърал академиялул Хъунмур театрданул солистка, [pullquote]Цаламур ихтилатраву Мурат Зязиковлул кIицI лавгуна Ширвани Чаллаевлул музыкалул цачIунмай буллай бушиву чIяву ми­л­латру бу­сса Ухссавнил Ккавкказнал ва щала Аьрасатнал агьлу.[/pullquote]Аьрасатнал халкьуннал артистка Ирина Долженкол, Тульскаллал паччахIлугърал хорданул, В. С. Поповлул цIанийсса Хъунмур оьрчIал хорданул (каялувчи Аьра­сатнал лайкь хьусса артист Анатолий Кисляков) щаллу бунни ­Г. Державиннул, М. Лермонтовлул, А. Мейл шеърирдайну чивчусса кантата. Гьуртту хьунни СССР-данул халкьуннал артист Анатолий Полетаевлул каялувшиндаралусса ПаччахIлугърал академиялул оьруснал концертный оркестр «Боян», дирижертал – Марий Эл Республикалул лайкь хьусса артист Николай Степанов ва Аьрасатнал лайкь хьусса артист Сергей Сидоренко.
Концерт дачин дурну ия цува Ширвани, гьарца произведениялий цайва-цайва ацIлай, лях-лях, хъярч-махсара хIалану, цала оьр­мулувасса иширттаягу буслай.
Композиторнахь, юбилейгу барча дан, Аьрасатнал музыкалул магьирлугъ хьхьичIуннай дан бувсса захIматрахлугу барчаллагь учин хъунасса Глинкал ватандалия ссайгъатращал увкIсса Николай Писаренкол увкуна: «Ширвани Чаллаев так ца Дагъусттаннал ва Москавуллал композитор акъар, ва жул Смоленскаллалгу композиторди. Цанчирча ванал чIявусса произведенияртту дунияллийн бувкссар Смоленскаллал театрданул сахIналий». Цаламур ихтилатраву Мурат Зязиковлул кIицI лавгуна Ширвани Чаллаевлул музыкалул цачIунмай буллай бушиву чIяву миллатру бу­сса Ухссавнил Ккавкказнал ва щала Аьрасатнал агьлу. Композиторнал ччянияцIавасса хьхьичIунсса дус Виталий Ремизовлул Ширванинан пишкаш бувуна «Ваш Лев Толстой» тIисса, Аьрасатнал хъунасса чичул язи-язими произведенияртту цачIун бувсса, яргсса жуж, композиторнал авадан­сса творчествалуву ванал произведениярттал ляваличIисса кIану бугьлай бушивугу хIисав бувну. Гьамин В. Ремизовлул кабакьаврийнур Л. Толстойл произведениярттая чивчусса кIива опера «Хаджи-Мурат» ва «Казаки» (дунияллийн бувксса). Ванал кулпат Мария Кузьминал дурккуна, Ширванинан хас дурну, га кьини чирчусса назмугу.
«На хъинну ххариссара ттула балайрдайну ттущава Дагъусттан бюхттул бан бювхъуну бухьурча, ттул балайрдайну чил миллатирттал инсантуран Дагъусттан ххира хьуну бухьурча», — увкуна Ширвани Чаллаевлул, концерт­райн бувкIцириннахь барчаллагь тIий.
Концертраясса пишакартурал ва тамашачитурал асардая бусанну хъиривми номердай.