Ларгсса ххуллун кьини ЦIуссалакрал райондалул Пионертурал ва школ оьрчIал къатлул вакилтал, директор Пакият Гаппаеващал ва цалчинмур школалул педагог Анжела Аьбдуллаеващал, бивунни Каспийск шагьрулийсса, Байрамовлул цIанийсса кIичIиравусса, детдомравун (ГКОУ «Специальный (коррекционный ) детский дом VIII вида»).

ПатIимат Рамазанова
Ва бур аькьлу-кIулшилул чан-кьансса нукьсаншиву дусса оьрчIру тарбия буллалисса, Дагъусттаннал Минобразованиялул биялдарайсса детдом. ЧIявуми оьрчIругу бур нину-ппу бакъасса, ягу нитти-буттахъал кьабивтсса, ягу нину-ппушиву дуллансса ихтияр зер­ххусса нитти-буттахъал оьрчIру. Гьаннайсса, ци багьана хьурчагу, нитти-буттахъал ттюнгъашиврия ва ччаврия махIрумну ливчIсса оьрчIру. ЦIуссалакрал делегациялул агьаммур мурадгу бия укун ялгъузсса оьрчIан чIумуйнусса дунугу тирхханну дулунсса, оьрчIал дакIру тирх учин данмур бувансса. Миннахь бия ахъулсса, нацIу- кьацIу хIаласса ссайгъатру. ЦIуссалакрал №1 школалул оьрчIал цала карунних бувну бия оьрчIан цIуллушиву чIа тIутIисса открыткарду конветирттаву дирхьусса яргсса буттукьа. Дия цаймигу эмаратсса канил давурттив. Пионертурал къатлул ва Магьирлугърал къатлул уртакьну хIадур дурну дия ххуйсса концертрал программа. «Эдельвейс» ва «Гурия» ансамбльлал хIадур дурну дия Ккавкказуллал халкьуннал къавтIавуртту ва личIи-личIисса мазурдийсса балайрду. Зувия инсан усса делегация хIурматрай кьамул бувна оьрчIал ва детдомрал коллективрал. ОьрчIайх ссайгъатругу бавчIуну, концерт ккаккан дурна актовый залдануву. Концерт ккаккан дурну мукьах, детдомраву­сса оьрчIащал цачIу суратру ришлай, миннащал кIул хъанай бия цIуссалакрал оьрчIру. Детдомрал хъунама, философиялул элмурдал доктор, профессор Нариман Вагьабовгу увкIуна барчаллагьрай хъамал тIайла буккан. «ЦIуссалакрал райондалул учительтураща ва дук­лаки оьрчIаща цачIанма гъан­сса Хасавюртливсса интернатрайн биян хьунссия, Каспийскалийн биялсса ххуллугу бухьувкун. ЦIанакул ЦIуссалаккуй зузисса педагог Анжела Султановна 1969 шинал ва жул детдомраву тарбиячину зий бивкIун бур, мунил сипталийну бувкIун бур вай хIакьину жучIан. На хъунмасса барчаллагь тIий ура мунихьгу, Пакият МахIаммадовнахьгу, миннал дуллалимуницIун кабавкьусса райондалул администрациялухьгу. Зунма чIалай бур оьрчIру цукун ххари хьуссарив, зу хьулухун буккайхтува, «вай уттигу та бучIантIиссар?» тIисса суаллащал лечлантIиссар ттучIан. Аьрасатнал хIукуматран хIакьину ччимур, жунгу хъиннува ччиссар. ХIукуматрангу, жунмагу ччай бур детдомру чан хьуну, ягу бухвалавгун. Ччай бур ургала акъа ливчIсса оьрчIру гъан-маччанал, дакIру цIимисса инсантурал бувцуну. Зун чIалай бур шикку вайннах ххуйсса аякьа душиву, гьарзатрал лащу-щаллуну бушиву, цичIав чанну бакъашиву. Амма ичIалу, тIюва, хIукуматрал казенный къатлуяр гьарманан къулайссар ва нахIуссар. Чара бакъашиврулли детдомругу бусса, миннуву тарбия буллалимигу бусса. Иш укун багьлай бунавхьур, вай оьрчIалсса бан аьркинни, миннан цивппа ххирану ва аьркинну бушиву асар хъанансса куццуй. Барчаллагь чIарав бацIлацIиминнан, барчаллагь архсса кIаная бувкIсса зун», — увкунни Нариман Михайловичлул.
Пакият МахIаммадовналгу бувсунни детдомравунсса ша цала оьрчIан рахIму-цIимилул дарсну хьуншиврий дакI дарцIуну бивкIшиву, оьрчIал дакIурдиву хъиншиврул гьанна бугьавугу миннал тарбиялуву агьамсса ишну хъанахъишиву. «Так концертрал программалущал ва оьрчIал канил давурттащал бучIан ламусъя, хъунмасса барчаллагь тIий буру оьрчIан хъинсса ссайгъатру ва ахъулсса, нацIу-кьацIулул кьуцуртту ласун кумаг бувсса райондалул администрациялухь. Райондалул хъунама ХIажи Айдиев мудангу жу дуллалимунил чIарав ацIай, 30 инсан бувкIру жу хIакьину, ххуллул хIакьгу ХIажи Шихамировичлул буллунни. ОьрчIал ххарисса симанну чIалай, жугу жулла даврия рязийну ливчIру, укунсса ихIсандалул давурттив, хъиншиврул , хъинбалдарал акциярду уттигу дуллан дакIний бу­ссару», — увкунни Пакият Гаппаевал. Цуппа хъунма хьусса райондалул делегациялул чIарав бацIан бувкIун бия ЦIуссалакрал школа къуртал бувсса, МахIачкъалалив «ЕвроАзияЭкспресс» идаралий хъунмур бухгалтерну зузисса Жаннат Абакаровагу, цила чулухасса ссайгъатращал. Ванилгу хъунма­сса барчаллагь увкунни дунияллул чIярусса ххаришивурттая махIрум хьусса оьрчIай дакIцIуцIаву дуну зузиминнахь, бувсунни цилла дакI ххаригума хьушиву пар-пар тIисса, лази-лавкьусса къатравух буклакиний, оьрчIаха дагьайкунсса аякьа душиву цанма хъинну асар хьушиву.
ЦIуссалакрал делегация детдомрал тарбиячитуращал архIал циняв группардавух бувккун махъ, оьрчIал ва коллективрал хъамал хIурматрай тIайла бувккунни.