Апрель зурул 2-нний Хъювхъиял шяраву хьунни райондалул лагрулийсса хъузалал яла агьаммурну хъанахъисса Хъарас щаврил байран. Ва байрандалийн хIадур хъанай, Хъювхъиял жяматрал дурну дия чIярусса давурттив: бакьин бувну бия бухсса ламу, цIу бувну бия культуралул центр, бувну бия ва центрданул хьхьичI ххуйсса ккурчIа,
бакьин бувну бия шяравусса ххуллурду ва райондалия шяравун нанисса ххуллу. Гьай-гьай, сир бувккун, бакьин бувну бия агьамми тяхъашивуртту най диркIсса райондалул ца эбратрансса кIануну хъанахъисса амфитеатр. Вара кьини тIитIлай бия 2016-ку шин Зунттал шин душиврун хас дурсса тяхъашивурттугу.

Хъювхъиял шяравусса Хъарас щаврил байрандалувух гьуртту хьун бувкIун бия МахIачкъалалия чIявусса къуллугъчитал. Миннавух бия: Дагъусттаннал экономикалул министр, премьер-министрнал хъиривма Раюдин Юсупов, Дагъусттаннал бакIчинал зунттал районнайсса вакил Абумуслим Абумуслимов, Дагъусттаннал Халкьуннал Мажлисрал депутат ХIасан Аьлиев, Дагъусттаннал Жяматий­сса палаталул бакIчинал хъиривма Ссапар Аьбдуллаев, ЦIуссалакрал райондалул бакIчи ХIажи Аьйдиев, Лакрал райондалул бакIчи Юсуп МахIаммадов, хьхьичI вице-премьерну зий ивкIсса Шарип Шарипов, Шагьимардан Мудуев, Шалласу Шалласуев ва цаймигу чIявусса хIурмат лавайсса лакрал ва цайми миллатирттал хъамал.
Хъамал хьунабавкьуна Хъювхъиял шяраваллил къирагърай Ккуллал райондалул бакIчи Сулайманов Сяидлул ва культуралул зузалтрал ччатI-нисиращал, дукьрахIанттищал ва зюннав-дачIулущал. Шичча циняв мухлукьат хъамаллуращал лавгуна, бакьин бувну, цIуну ламу тIитIлатIисса лента кьукьин. Ганияр махъ тIивтIуна шяраваллил культуралул центр.
Лавгуна хъамал мукунма ххал буван Хъювхъиял шяраваллил музей. Ганияр махъ шяраваллил лувсса къурув балчаннуй дархIусса хъарас щуна. Хъарас щун ихтияр дуллуну дия чIяруми шяравусса давурттив дуван бакIрайн ларсъсса, Хъювхъиял шяравасса, МахIачкъалалив УМС-рал хъунаману зузисса МахIаммад Кьурбановлухьхьун. Хъурссул кIамайму бувгьуна мукунма Дагъусттаннал Халкьуннал Мажлисрал депутат ХIасан Аьлиевлулгу. Шиккува хьуна чIивисса ссувхIат ва махъру лахъавугу.
Ганияр гихуннайми давурттив хьуна амфитеатрданул сахIналий ва сахIналул хьхьичI. Шикку тIивтIуну бия хъинну чIярусса нахIусса дуки-хIачIия дусса ссуп­ра.
Хъарас щаврин ва Зун­ттал шин Ккуллал райондалий тIитIаврин хас дурсса тяхъашивуртту дайдишин сахIналийн оьвкуна байран дачин дурсса Ккуллал райондалул вивсса политикалул отделданул бакIчи Хизриев Шамххаллул. ХIурмат лавай­сса хъамал сахIналийн гьаз шайхту, цалчин махъ буллуна Раюдин Юсуповлухьхьун. Ванал такну кIицI бувна:
— На къуллугъчи хIисаврай ва табасараннал миллатрал инсан ушиврийн бувну, ттулва миллатрал цIания барча буллай ура Ккуллал райондалийсса циняв шяраваллал жяматру, буниялагу зунттаву яхъанахъисса инсаннал-хъузалал яла агьаммур касмуну хъанахъисса хъуру дугьаврил кьинирду дайдишаврил, Хъарас щаврил байрандалущал. Нава шийн нанисса чIумал, ттун ххай бия, архну зунттаву дирхьусса чIирисса Хъювхъиял шяраву ца-кIия инсан акъа ттуна кIичIираву хьунакъаакьинсса. Ххал барча, шикку щаллусса Бомбей шагьрулийксса агьали бур. На ва иширал хъинну ххари увунна. Дагъусттаннай дуссар най «Развитие горных территорий» тIисса программа. Шикку цалчин ккаккан бувну бур гьарца райондалул центрданийн асфальт бавкьусса ххуллу бикIан аьркиншиву. Да­гъусттаннай мукунсса асфальт къабавкьусса ххуллурду бусса 5 район лирчIун дур, миннувух – Ккуллал районгу. Гьашину ми давурттан итабавкьуну буссар 950 миллион арцул…
Раюдин Юсуповлул баян бувна Зунттал шин тIитIлатIишиву. Яла щаллу дурна Аьрасатнал хIукуматрал гимн.
Хъювхъиял культуралул центрданул хъунмур Оьмаева Рукьижатлул цила барчаллагьраву кIицI бувна цIуну увчIусса шяраваллил бакIчи Кьурбанов Сергейщал чIявусса Хъювхъиял чиваркI, шагьрурдайсса хьуннав, шяраву­сса хьуннав, лагма лавгун, арцуйну, стройматериаллайну, каруннах­сса даврийну бакьин бувшиву шяравусса бухсса ламу, культуралул центр, ванил хьхьичIсса ккурчIа ва цаймигу шяравусса давурттив. Бувсуна ванил хъинну гьуртту хьушиву школалул оьрчIру ва Ккуллал райондалул жагьилтал.
Райондалул администрациялул чулуха барчаллагьрал ча­гъарду буллуна хъиннува хIарачат бувминнан. Миннавух бия: Хъювхъиял шяраваллил бакIчи Кьурбанов Сергей, райондалул подстанциялул зузала Маммаев Аздар, МФЦ-лул бакIчи Кьурбайтаев Нуруллагь. «Почетный Гражданин Кулинского района» тIисса хIурматрал цIарду дуллуна, медаллугу дуллуну, лентардугу бавхIуну: лавайгу кIицI бувсса, Кьурбанов МахIаммадлун, Юсупов Раюдиннун, Шарипов Шариплун.
Шиккура Ккуллал райондалул бакIчи Сулайманов Сяидлул ва ООО «Чар» тIисса идаралул хъунаманал къулбас дурна инвестициялул зумунусса гъаттарал агро-туризмалул давурттив вайннал дулланшиврий Ккуллал райондалий.
Хъарас щаврил байрандалий хьусса спортрал тIуркIурдаву цалчинсса шанма кIану бувгьуну ххув хьусса, школалул оьрчIая байбивхьуну, бугьараминнайн бияннин, гьурттучитуран бувгьусса кIанттан лавхьхьусса дипломру ва арцущалсса конвертру буллуна Ккуллал райондалул УО-лул хъунмур ХIаммакуева Альбинал.
Яла ахттакьуннин най дия сахIналий ва сахIналул хьхьичI Лакрал театрданул артистурал ва Ккуллал райондалул культуралул зузалтрал хIадур дурсса концерт, тяхъашивуртту.