Цумацагу «Илчилул» зузалал хьхьичIуннайшивуртту, ккаккияртту – му щалагу редакциялул лайкьшивур.
Жул зузалтрал цимилагу ккаккан бунни «Илчи» кказит республикалул кказит-журналлаву сий дуну, хьхьичIунну бушиву, миллатрал кказитрай зузисса журналистурал бюхъу-гьунаргу цайминнаяр хъисвагу чIивисса бакъашиву. Му исват шай гьарца шинах жул журналистурал личIи-личIисса конкурсирттай хьхьичIунсса кIанттурду бугьаврийнугу. Гьашину Миллатрал политикалул ва диндалул иширттал министерствалул баян бувсса терроризмалийн къаршисса макьаларттал конкурсрай цалчинсса кIану бувгьунни «Илчи» кказитрал отделданул редактор Андриана Аьбдуллаевал. 2018-ку, 2019-ку шиннардийгу Андриана Аьбдуллаевал цалчинсса кIанттурду бувгьуссия Юстициялул министерствалул баян бувсса «Милицалтрал зузи кьинирду» тIисса конкурсирттайгу. ДакIнихтуну барчагу буллай, чIа тIий буру жула зузалан ванияр тихуннайгу чIярусса ххувшавуртту ва ххуй-хъиншивуртту.
«Илчилул» редакция
Жагьилтурал тIуркIурду
Апрельданул 24-29-нний Омск шагьрулий хьунтIиссар ХIХ Аьрасатнал Жагьилтурал Дельфий тIуркIурду ва СНГ-лул гьурттучитурал Жагьилтурал ХV тIуркIурду.
Бадрижамал Аьлиева
АцIния ххюлчин буллалисса СНГ-лул гьурттучитурал Жагьилтурал «Жун дакIнийссар…» тIисса тIуркIурду хас бувну бикIантIий бур Ххувшаврил 75 шинан.
Дельфий тIуркIурду буллалиминнал агьамми мурадругу бур миллатирттал культурарду дуруччаву, хьхьичIуннай даву, билаятирттал дянивсса дахIавуртту цIакь даву.
ТIуркIурдал сакиншинначиталну бур Аьрасатнал НДС (Национальный Дельфийский совет) ва Омскаллал областьрал хIукумат. ЧIарав бацIаву дувантIиссар АьФ-лул Президентнал Администрациялул, ХIукуматрал, ПаччахIлугърал Думалул ва мукунма цайминналгу.
Конкурсрал программартту сакин хьуну дур вай номинациярттая: фортепиано, скрипка, сурат дишаву, академ балай щаллу баву, халкьуннал балай цалвалу щаллу баву, уттизаманнул балай.
Гьарта-гьарзану кIул бан бюхъантIиссар Дельфий тIуркIурдал delphic.games сайтрай.
