ЦIуссалакрал райондалул администрациялул хъунаманал хъиривчу Аьвдурашид Буттаев ял­тту увккунни райондалул школарду ва шяраваллал администрациярду Ххувшаврил байрандалийн цукун хIадур хъанай бурив ккаккан.

Ххалбунни Ххувшаврил юбилейрайн цукун чIюлу бувну буссарив райондалул школардал ва шяраваллал администрациярдал къатри,
лавхъун бурив шикку Аьрасатнал ва Дагъусттаннал ттугъру, дяъвилул участниктуран ва ветерантуран хас дурсса стендру, ветерантурал ва къинттуллух зий бивкIминнал сияхIру. Ва аьрххилул лагрулуву ххалдунни, мукунна, школардайсса дукра даврил тагьар, кIул бунни учительтуран стимулирующий арцу цукун дуллай буссарив.
— Школардал ялтту увккукун, ттун чIалан бивкIунни школардал директортурал ва даву жаваб­лувшинна дуну дуллай бушиву. Баннерду ва ттугъру бивщуну бия цинявппагу школардал къатрай. Дяъвилул участниктурансса стендру цинярда школардай хIадурну дакъахьурчангу, миннуха зий бия. Школардай краеведениялул кружокирдал ва музейрдал даву лавайсса даражалий дур, — увкунни Аьвдурашид Буттаевлул.
Укуннасса ххалбигьавуртту дунни ЦIуссалакрал КIулшивуртту дулаврил управлениялул зузалтрал ЦIусса миналийсса школардайгу. Шикку баннерду, стендру дакъассагу, хIадур бувну бия дяъвилул гьур­ттучитураясса буклетру. ЦачIун бувну бия дяъвилия бувкIсса, уттинин яхьусса шанмурцIу чагъарду, сакин дурну дия дяъвилий жанну дуллуминнал, ятIатIар бакъа бакъахьуминнал, дяъвилия зана хьуминнал ва къинттуллух зий бивкIминнал сияхIру.
Сайки цинявппа школардай лархъун дия «Герои Советского Союза», «Дагестанцы-Герои Советского Союза», «Этих дней не смолкнет слава» тIисса стендру.
Лавайсса даражалий ва даву дурну дия ЦIуссалакрал гимназиялий, ЦIуминалийсса ЦIуссаккуллал школалий, Шушиннал школалий. Вай школардай тарихрал дарсирдал кабинетирттаву дур та дяъвилуву Совет халкьуннал ккаккан дур­сса къучагъшиву аьч дуллалисса, дяъвилул иширттаясса суратру ва документру.