Мадарасса шинну лях ларгуна Вихьуллал шяравусса Хъундяъвилул гьурттучитуран хас дурсса гьайкалданул лагмасса чапар цIу къадурну. ТIайлар, ва, сир бувккун, дакьин дурну дикIайва муданнагу.
Вана утти, духмур цIу дуллай, хьхьичIрамурнияр ххуйссагу, цIакьссагу дихьлан бивкIунни. Вай давуртту дуллай бия Оьмар ХIасанхIусайнов ва Мажид ХIажиев. Ца-кIива махъ учин ччива Оьмар ХIасанхIусайновлуя. Оьмар хъинну шяраваллил агьлу ххирасса, хъунаманал хIурмат буван хьхьичIунсса жагьил ур.
Буниялагу, ванах урувгсса чIумал, аьлтта чIалан бикIай ва, ци-бунугу бан бур учиннин къаавцIуну, хьхьичIунну зун икIайсса ушиву. Шяраваллил хIатталлицIун дархIусса давурттавугу Оьмар уссар, цайминнайн яржа къабитлай, аьркинмур дуллай. Барчаллагь хьуннав ванал нитти-буттан – Рукьижатлун ва ХIасанхIусайннун, укунсса арс тарбия увсса. Ахирданийгу кIицI буван ччива ва цувагу зий ушиву Гъумук судрал приставну. Ур ва мукуна бюхъу ххисса спортсменгу. Чан къааннав ина, Оьмар, жяматран!
