Хъунмасса Буттал КIанттул цIанийсса дяъви къуртал хьуну гьашину бартларгунни 71 шин. Дяъвилул ишру ккаккан кьисмат хьусса ЦIуссалакрал жяматрачIа Ххувшаврил байрандалул кьимат ххишалассава бур, 9-мур майрал байрангу вайннал ляличIинура яргну ва сий дуну тIайла дуккай.

Дяъвилул цIараву талай бивкIсса ва къинттуллух захIмат буллай бивкIсса ЦIуссалакрал райондалул агьлу дакIнийн бутан ва кьини шиккун бувкIун бия райондалул жямат ва бусравсса хъамал. Гьашину ЦIуссалакрал райондалий Ххувшаврил байран хьунадаркьунни дяъвилул 4 ветераннал. Ххувшаврил ЯтIул ттугъгу бувгьуну, бу­ттахъал, буттал буттахъал суратирттащал, «Бессмертный полк» акциялул гьурттучитурал шяраваллил зумания байбивхьуну, дяъвилия зана къавхьуминнан дирхьу­сса гьайкалданучIа ва абадлийсса цIарачIа тIутIив дирхьунни.
ЛивчIсса мукьагу дяъвилул ветеран щяивтуна байрандалул ссупралух. Вайннал дурсса чувшивурттан лавайсса кьимат бишлашисса ихтилатругу бувну, райондалул бакIчи ХIажи Айдиевлул буллунни миннан арцущалсса конвертру.
Шадлугърал митинг дурну, ветерантал барча бувну махъ, ХIажи Айдиев бакIчисса делегация гьур­тту хьунни дяъвилул ветерантуран ва Ватан дуручлай бивкIминнан гьайкаллу тIитIлатIисса шадлу­гъирттай.
Билаятрал тарихраву ва халкьуннал дакIурдиву абадлий дакIний личIантIисса Ххувшаврил байрандалул кьини ЦIуссалакрал райондалий Гьамиящиял ва ЧIурттащиял шяраваллаву тIиртIунни Ватандалул цIаний жанну дуллусса вир­ттаврал аьпа абад буллалисса гьайкаллу.
Шикку гьуртту хьунни ХIуку­матрал Председательнал хъиривчу Билал Оьмаров, ДР-лул Халкьуннал Мажлисрал депутат Зайнуллагь Мирзоев, райондалул депутатътурал Мажлисрал председатель Мавледин Исламаьлиев, Жяматий­сса советрал председатель Магьди Оьмар­ов, Республикалул МВД-лул вакилтал, ЦIуссалакрал райондалул ОМВД-лул хъунама Садруттин Рашидов, ЦIуссалакрал райондалул прокурор ХIусайн Аьлилов, райондалул судрал председатель ХIамзат ХIамзатов, райондалул ОМВД-лул зузалт, «Бессмертный полкрал» гьурттучитал ва райондалул щархъавасса хъамал.
ЦIуссачIурттащиял шяраваллил жямат ва цинявппагу хъамал Ххувшаврил байрандалущал барча буллалисса ихтилат бунни ЦIуссачIурттащиял шяраваллил бакIчинал хъиривчу НурмахIаммад НурмахIаммадовлул.
Ва шяраву цIуну дирхьусса Ватандалухлу жанну дуллусса вирттаврансса гьайкал тIиртIунни ХIажи Айдиевлул. Ванал кIицI лавгунни, вирттаврал чувшивурттан лавай­сса кьимат бишлай, миннал аьпа абад буллай тIиртIусса гьайкаллу ялун нанисса ник тарбия даврин­сса хъуннасса агьамшиву дусса давуну хъанахъишиву.
— Дяъвилул щавщи бивссар цинявппагу кулпатирттайн. Бюх­ттулсса Ххувшаву ларсъсса, дяъвилул цIараву талай бивкIсса жулва буттахъал дурсса дазу-зума да­къасса чувшиврийнур оьхIалсса душман ххит увсса. Жулва жагьилтуралгу республикагу, районгу къачагътурал кьюкьрая дуручлай ккаккан дурссар цалла чувшиву ва ццах бакъашиву. Мунийн бувну, ва хIакьину тIиртIусса гьайкалданул буниялагу хъуннасса агьамшиву дуссар, — увкунни ХIажи Айдиевлул.
Райондалул бакIчинал барчаллагь увкунни гьайкал дацIан дуван кумаг бувсса, чIарав бавцIусса шяраваллил жяматрахь, спонсортурахь. ХIажи Айдиевлул маслихIат ккавккунни гьайкалданул хьхьичI ливтIуминнал аьпа абад буллали­сса аллея буван.
Мажлисрай ихтилатру бунни 1999 шинал ЦIуссалакрал райондалийн къачагътурал кьюкьри ххярх­сса ппурттуву ливтIусса полициялул зузалтрал кулпатирттал. Ахирданий цинявннал гьайкалданучIа дирхьунни тIутIив.
Вара кьини Гьамиящиял шяравусса 2-мур школданул хIаятравугу тIиртIунни дяъвилул участниктурансса гьайкал.
Гьамиящиял жямат Ххувшаврил байрандалущал ва цIуну тIитIлатIисса гьайкалданущал барча бунни ХIажи Айдиевлул.
Гьамиящиял шяраваллил жямат­рал барчаллагь увкунни дяъвилул ветерантурал аьпа абад буллалисса гьайкал дацIан дуван кумаг бувсса М. ШейхахIмадовлухь.
Гьайкал тIиртIуну махъ кка­ккан дунни тяхъасса концертрал программа. Мукунма байрандалун хасну хьунни жагьилтурал дянив­сса спортрал бяст-ччаллу.
Цайми байраннай кунна, ва кьинигу хъуннасса хъар лархъунни агьалинал мюхчаншиву дузал дуллалисса ихтияр дуруччай органнал зузалтрал.