Лакрал райондалул администрациялий хьунни Буттал КIанттул цIанийсса Хъун дяъвилуву Ххувшаву ларсун 70 шин там шаврил юбилейран хас дурсса мероприятиярттаха зун ккаккан бувсса Сакиншиннарал комитетрал батIаву.

БатIаву дачин дурну ия му комитетрал хъунама, райондалул бакIчи Юсуп МахIаммадов. Муний ялагу гьуртту хьунни: райондалул администрациялул бакIчи Абакар Къюннуев; администрациялул бакIчинал хъиривчутал Соня Макьаева, Юсуп Рамазанов, Ансар Къажлаев; КIулшиву дулаврил управлениялул каялувчи Явсупи ХIамзаев; Магьирлугърал управлениялул каялувчи Лида Кьурбанова; райондалул больницалул хъунама хIакин АьбдурахIим Дибиров; Аьра­сатнал МВД-лул «Лакский» МО-лул каялувчи Марат МахIмудов; ЦСОН-далул хъунама Шяпи Щурпаев.
Сакиншиннарал комитетрал ххалбивгьунни цаппара агьамсса суаллу: 9-мур майрай Ххувшаврил Парад сакин даву, муниннингу шяраваллаву Хъун дяъвилия зана къавхьуминнансса гьайкаллу дакьин даву, байрандалун хас бувсса спортрал тIуркIурду сакин баву. Вай давуртту дан ккаккан бунни жаваблувсса инсантал.
ЧIярусса давуртту дан ккаккан дурну дур хъун хъанахъисса ник ватан ххирану тарбия дан. КIулшиву дулаврил ва Магьирлугърал управлениярттал цачIуну ххалдиргьуну дур кIулшиву дулаврил ва магьирлугърал идарартту Ххувшаврил кьинилийн хIадур бансса давурттал планну. Гьарцагу школалий дуллай бур дуклаки оьрчIру ватан ххирану тарбия бансса давуртту.
Жагьилтуращалсса ва оьр­чIащалсса даврил отделданул каялувчи МахIаммад Гадаевлул бувсунни Волонтертурал корпус бансса щалвагу Аьрасатнал проектрая. Волонтертурал давриву гьуртту хьун ччисса инсаннан багьлай бусса бур http://волонтеры 70.рф сайтрай анкета дуцIин дан.
«Ххувшаврил байран лахъа-хъунну дан жува жущава шаймур бан аьркинссар», — увкунни Юсуп МахIаммадовлул, Ххувшаврил кьинилун хасъсса давурттал ялув бавцIусса инсантурай цаппарасса бигардугу бихьлай.