Ва зурул байбихьулий, бигьалагай гьантрай, Гъумук хъуннасса шадлугърай хьунни 1975 шинал Гъумучиял школа къуртал бувминнал хьунабакьаву.
1975 шинал школа къуртал бувну бур 90 инсаннал. Вайннава 7-ннал ларсун дур мусил медальлу: Абакар Къюннуев, Шамил ЛухIуев, ХIажимурад Каримов, МахIаммад Эфендиев, Алхас КьурбитIаев, Рамазан Тумалаев. Школа къуртал бувминнава, анжагъ, цаппарассаннал личIаннин, сайки цинявннал ларсун дур ларайсса кIулшивуртту. Лакрал щархъал оьрчIан Гъумучиял школа хьуну бур ца дуккаврил бакъассагу, дусшиврул ва цашиврул кюруну. Оьрмулул кьадарданул щалва Аьрасатнавух кIучIирчагу, та кюрттараву куртI хьусса чаннасса асардугу, марцIсса ччавугу, цIакьсса дусшивугу чIумуща ласун къархьуну дур. Ми хьунабакьайсса бур гьарца 5 шинай цал. Гьашину хьунабакьлай бур 8-чин, кIицI лаглай бур школа къуртал бувну 40 шинал юбилей.
Зулайхат Тахакьаева
Цуксса пашманнугу, ва чIумул мутталий вайннава яла лавгун ур 12 гьалмахчу: Каримов ХIажимурад, ХIажиев ТIагьир, Эфендиев Зайдин, Мюллуев ХIасан, МахIаммадов ТIажиб, Жалаев Аздар, Сулайманов Саэд, Рамазанов Сиражуттин, Шахшаева Аьжа, Атаев Руслан, КьурбитIаев Алхас, Аьбдуллаев МахIаммад. Аьпа баннав цал! Хьунабакьаврийн бувкIмигу цалчинма-цалчин лагай цалва дустурал гьаттардийн биян, алхIан буккин. ЧIяву-чIявусса цаймигу жулва ватанлувтал кунма, 40 шинал хьхьичI школа къуртал бувмигу щалва билаятрайх кIама бивщуну бур, ми Дагъусттаннал кьатIувгу бучIи лявкъуну бур. Лакрал цIа-кьини лайкьну дуручлай бур.
Гьашину хьунабакьаврийн увкIун ия 47 инсан. ХьхьичI кьини мажлис бия Гъумук столовыйлуву. Мунил тямадашиву дуллай бия Лакрал райондалул администрациялул бакIчи Абакар Къюннуев ва МахIаммад Эфендиев. Абакар Къюннуевлул барчаллагь увкуна, цивппа чув бухьурчагу, райондалул оьрмулия архну къабавцIуну, Лакку улклул ялун бучIантIимунил цIаний бунияла дакIгу цIий, кIий хъанахъисса иширттаву чялишсса гьурттушинна дуллалисса цалва одноклассниктурахь. Ххувшаврил 70 шин шаврил юбилейрал хьунийн Гъумук Вирттаврал чIира бан спонсоршиву дурсса Къажлаев Ансардун, Эфендиев МахIаммадлун, МахIаммадов Низаминан, Рамазанов Сайпуллагьлун, ХIасанов ХIасаннун, МахIаммадов Бунияминнун, Макъиев МахIаммадлун райондалул бакIчи Юсуп МахIаммадовлул цIания буллуна Барчаллагьрал чагъарду. Хъиривмур кьини ми лавгуна неххацI тIабиаьтрай бигьалаган. Дустал архIал бакъашивугу хIайп тIий, яла лавгсса учительтал, классрай каялувшиву дуллай бивкIсса МахIаммад Сунгъуров ва Шамай Канкаева, гьалмахталгу, дуклакийнисса яла яргми лахIзардугу цIунилва-цIунилгу дакIнийн бичлай, тIааьнну ларгуна вайннал хьунабакьаву. Хьунабакьаврил шадлугъ чIюлу дуруна вайннащал ца классраву дуклай ивкIсса цIанихсса музыкантътурал наслулиясса ххаллилсса аккордеонист ХIасан-ХIусайн Дибировлул ва ванал гьалмахчу Ризван Тумалаевлул аслийсса лакку балайрдал.
