Цинявппагу дагъусттанлувтуран, хаснува Дагъусттаннал халкьуннан шаэр Юсуп Хаппалаевлул творчество ххираминнан, ванал наслулун дакIний личIансса ххарисса иш хьунни вай гьантрай.
Декабрь зурул 28-нний МахIачкъалалив Родопский бульварданий чIявусса халкьгу бавтIун шадлугърал даражалий тIиртIунни шаэрнал гьайкал.

Андриана Аьбдуллаева
Гьайкал ккаркми цинявппагу ца зумату кунма буслай бия ванил ххаллилшиврия, ляличIишиврия, художникнал усттаршиврия. Мяйжаннугу, шаэрнан лайкьсса, авурсса гьайкал дия. Ванил автор ур Да­гъусттаннал лайкь хьусса художник Шамил КанайхIажиев.
Гьайкал тIитIлатIисса шадлугърай гьуртту хьунни Дагъусттаннал ХIукуматрал председательнал цалчинма хъиривчу Анатолий Карибов, ПаччахIлугърал Думалул депутат Юрий Левицкий, Дагъус­ттаннал Чичултрал Союзрал правлениялул председатель МахIаммад АхIмадов, ДР-лул информациялул ва печатьрал министр Бурлият Токболатова, шаэрнал творчество ххирами,оьрчIру ва гъан-маччами.
Цинявппагу ххарисса иширащал барча буллай, ихтилат бунни Анатолий Карибовлул.
— Гьалмахтал, ноябрь зуруй Оьрус­нал театрдануву жура кIицI дурссия шаэрнан 100 шин шаврил юбилей. Юсуп Хаппалаев ттизаманнул Дагъусттаннал литературалул гьану бивзминнавасса цар. Ванал произведенияртту кIулну бур, ххирану бур Аьрасатнавугу, дазул кьатIувгу. Ми бувххун бур Да­гъусттаннал литературалул мусил фондравун. Шаэрнал произведениярттава къявхъа тIий дур бу­ттал улклухсса ччаву. Юсуп Рамазановичлун ххуйну кIулну бия цала ниттил маз.
Ванал ххаллилсса таржумарттайхчин, пасихIсса мазрайхчин кIул хьунни миллатрал агьулданун Аьрасатнал классиктурал ва дунияллул литературалул корифейтурал произведенияртту. Ва гьайкал тIитIаврийну жува уттава буллали­ссару гьунар бусса шаэр, ххаллилсса драматург ва таржумачи Юсуп Ха­ппалаевлул аьпа, мукIрушинна дуллалиссару Дагъусттаннал литература хьхьичIуннай дан, миллатирттал дянивсса дусшиву цIакь дан шаэрнал бивхьусса захIматрал, — увкунни Анатолий Карибовлул.
— Шаэртал уттавассар, ми дакI­ний буссаксса, миннал шеърирду ккалай буссаксса, ми жямат­рал зумув буссаксса.
Юсуп Рамазанович ия халкьуннал шаэр, ва тачIавгу цала халкьунная, цала миллатрая арх къаувцссар, — увкунни МахIаммад АхIмадовлул.
Цала ихтилатраву Юрий Левицкийл кIицI лавгунни Дагъусттаннал БакIчи Рамазан АьбдуллатIипов хъуннасса къулагъас дуллай ушиву жула культура хьхьичIуннай дан. КIицI лавгунни Республикалул БакIчинал ХIукмулийну дацIан дурсса шаэрнал гьайкалданул жула республикалул хъун шагьру чIюлу буллантIишиву.
Ахирданий ихтилат бунни шаэрнал арснал Сулайманнул. Ванал барчаллагь увкунни гьайкал дацIан дан хIукму бувсса республикалул БакIчи Рамазан АьбдуллатIиповлухь, гьайкал дацIан дан хьхьичIва шаэр яхъа­най ивкIсса къатрая арх ба­къасса, Каспий хьхьирил зуманив­сса ва къулайсса кIану ккаккан був­сса шагьрулул администрациялухь, цинявппа ва давриву гьуртту хьуминнахь, чIарав бавцIуминнахь, гьайкал тIитIлатIисса мажлисрайн бувкIминнахь, бучIан ччай бунува бучIан къавхьуминнахь. Хъирив цинявннал гьайкалданучIа тIутIив дирхьунни.