Ларгсса итни кьини ЦIуссалакрал райондалий, Культуралул центрданий, дия хъуннасса шадлугъ: чIявусса агьали бавтIун бия Дагъусттаннал лайкь хьусса зузала Ярагъи Аьлиевлун 75 шин шаврил ва творчествалул даврий зий 50 шин шаврил юбилей дуван, мунахь дакIнийхтунусса барчаллагьрал махъру учин.

ХхюцIалла шин сахIналий гьан дурсса МахIаммадкьурбаннул арс Ярагъи Аьлиев Ккуллал райондалиясса Арттабиял шяравасса ур. Та никирал чIявусса агьулданун кунма, мунангу оьрчIнийва ЦIуссалаккуйсса оьрму нясивну бивкIун бур. 1959 шинал ЦIу­ссалакрал школагу къуртал бувну, дуклан увххун ур Борис Щукиннул цIанийсса Москавуллал театрал училищалувун. ЯтIул дип­ломращал къуртал буварчагу му училище, тийхва Москавлив ацIу тIисса маслихIатругу кьамул къабувну, зана хьуну ур ватандалийн. ЗахIматрал оьрму байбивхьуну бур Апанни Къапиевлул цIанийсса Лакрал театрданул актерну зий.1970 шинал ЦIуссалакрал райондалул культуралул отделданий каялувшиву дуллалисса Исрапилов Анвардул оьвкуну, ЦIуссалакрал шяравунай зана хьуну, миккува Культуралул къатлул каялувшиву дуллан ивкIун ур. 1973 шинал, ЦIуссалакрал райондалий МухIуттин Чариновлул цIанийсса халкьуннал театр хIасул бувкун, му театрданул режиссерну ивтун ур. Муния мукьах, Ярагъи МахIаммадкьурбановичлул каялувшиврийну, ЦIуссалакрал халкьуннал театрданул ххюцIалунниха ливчусса спектакльлу ккаккан бувну бур. Ярагъи Аьлиев Польшанавусса Зунттал аьрщарал международный конкурсрал лауреат ур, СССР хIасул хьуну 50 шин шаврин хас дурсса халкьуннал театрдал Щалвагу Аьра­сатнал смотрданул лауреат ур. МухIуттин Чариновлул театр гьаз буван бувсса захIматрахлу Лениннул премиялун лайкь хьуну ур.1984 шинал, Ххувшаву ларсун 40 шин шаврин хас бувсса, «Товарищ Песня» тIисса щала союзрал телевизион конкурсрай 1-мур даражалул дип­ломран лайкь хьуну ур. МухIуттин Чариновлул «ХIабибат ва ХIажияв» тIисса спектакльданул режиссуралухлу 1982 шинал халкьуннал театр­дал Всесоюзный фестивальданий хьхьичIунсса режиссерну 1-мур даражалул дипломран лайкь хьуну ур. Гьаннайсса, ванал оьрму лавгун бур ЦIуссалакрал халкьуннал театр, ччаннай бацIангу бувну, гьаз буллай. Культуралул ва культуралуву дакI дирхьуну зузиминнал кьимат мудангу хьхьичIунсса ЦIуссалакрал райондалий ва гьаз уван райондалул хъунимигу, агьалигу, хъамалгу чIявусса батIаву цичIав тамаша бизансса затгу бакъар. Мукунсса хIурматран ва ччянива лайкь хьуну ур.
Мунахь барчаллагьрал махъру учин, дурсса даврин ххуйсса кьимат бищун бувккунни сахIналийн райондалул хъунама МахIаммадхIажи Айдиев, Да­гъусттаннал Халкьуннал Мажлисрал член Зайнуллагь Мирзоев, Чапаевкаллал шяраваллил хъунама МахIаммадпаша Аьбдуллаев, Лакрал театрданул директор МахIаммад ХIусайнов, искусствовед Мариян Чалабова, Дагъусттаннал Чичултрал союзрал лакралмур секциялул хъунама Илияс МахIаммадов, Ярагъи Аьлиевлул каялувшиврийну творчествалул ххуллийн увксса Дагъусттаннал лайкь хьусса артист Аьбдул Давидов ва цаймигу бусравсса инсантал. Юбиляр барча уван бувкIун бия Лакрал театрданул артистал ва Ккуллал ва Лакрал районнал культуралул вакилтал. Гьаннайсса, шаннагу райондалул культуралул зузалтгу, Лакрал театрданул артис­талгу лагма лавгун, тIааьнну, ххуйну, тяхъану лавгунни юбилярнал мажлис. Ярагъи Аьлиевлущал тай шиннардийва зий бивкIсса Аьлимов Аьбдулхаликьлуя тIайла хьуну, ПатIимат МахIаммадова, Савдагул Шабанова, Фируза Рамазанова, Таибат Каллаева, Сара ХIажиева, Рая МахIаммадова ва цаймигу гьурттуну, ккаккан бунни «Аршим мал Алам», «ХIабибат ва ХIажияв» пьесардавасса парчри, цала наставник барча уллалисса балайрду увкунни цIуссалакрал артистурал, Лаккуя бувкIсса ххаллилсса балайчитал РайхIанат ХIажиевал ва АьлихIажи Щамхаловлул. Ххуйсса къавтIавуртту дунни «Дараччи», «Эдельвейс» ва «Гурия» тIисса фольклорданул ансамбльлал. Ххуйсса концерт хIадур дурну дия юбилей лайкьсса даражалий тIайла дуккан­сса хIарачат бувминнал.
Райондалул хъуниминнал бахшиш бунни Ярагъи Аьлиевлун телевизор ва махъ буллунни мунан республикалул награда тIалав дуван.
Ярагъи Аьлиев барчаллагьрай ия цалла байран хъун давриву бутIа бивхьуцириннайн: райондалул хъунама ХIажи Айдиевлуйн, Халкьуннал творчествалул къатлул директор, культуралул министрнал хъиривчу Марита МухIадовайн(мунил хъиривчу Гульнара Мурщиева бия юбилейрай), райондалул Культуралул управлениялул хъунмур ХIабибат Буттаевайн, Лакрал ва Ккуллал районнал культуралул управлениярттайн, щалвагу коллективрайн. Барчаллагьрай ия, ЦIуссаккуллал школалул директор Татьяна Айгуновая тIайла хьуну, Новостройрая бувкIцириннайн, «Зунттал хъами» журналданул жаваб дулайсса секретарь Аьжа АьбдурахIмановайн, жуйн, «Илчилул» журналистурайн, дагъусттаннал телевидениялул журналистътурайн.
Ялун ххи буван ччива, Ярагъи МахIаммадкьурбанович цалла даву хъинну кIулсса усттар ушаврицIун, ххаллилсса ппу ва лас ушиву, мунал 50 шин цачIу дурсса Саидащал 4 оьрчI ххуйну тарбия бувшиву, миннал кулпат райондалий яла мяърипат думи, хьхьичIунми кулпатирттавух бушивугу кIицI лаглай бивкIшиву му барча уллалими. Дагъусттаннал халкьуннал артист Аслан МахIаммадовлул тIийкун, Ярагъи Аьлиев, райондалий культурагу, театргу гьаз бувсса пишакар акъагу, ур цачIава зий бивкIцириннай хъуннасса дакIцIуцIаву дусса, гьарма аякьалувун лавсъсса, гьарманах дагьайкунсса къулагъас дуван чялишнувасса хъунамагу. Мукунми нажагьссар. Амма мукунминнал кьимат мудангу бивкIссар, буссар ва бикIантIиссар.
ЧIярусса шиннардийсса цIуллусса оьрму чIа тIий бу­ру жугу вин, Ярагъи МахIаммад­кьур­банович!