ЦIуссалакрал райондалий ххалдиргьунни ДР-лул БакIчи Рамазан АьбдуллатIиповлул Халкьуннал Мажлисрайнсса Рисала.
Му ххалдигьлагьисса совещание дачин дурну ия ЦIуссалакрал райондалул бакIчи ХIажи Айдиев. Совещаниялий гьуртту хьунни райондалул шяраваллал бакIчитал ва личIи-личIисса идарарттал каялувчитал.
ХIажи Айдиевлул кIицI лавгунни Рисалалул агьамми кIанттурду ва оьвчаву дунни райондалул агьалинайн республикалул бакIчинал тапшур бувсса масъалартту щаллу бавриву чялишсса гьурттушинна дан.
ХIажи Айдиевлул бувсунни республикалул бакIчинал аьй дуршиву ЦIуссалакрал райондалул муниципал органнай агьали цIусса миналий дурсса къатравун бизаврил даву хьхьарану най тIий.
Республикалул бакIчинал тIайлану аьй дуршиврийгу мукIру хьуну, райондалул хъунаманал тапшур бунни хъирив лавну цIусса миналийсса шяраваллаву агьали къабивзсса цими къатта буссарив балжину кIул бувну баян бан.
Райондалул бакIчинал кIицI лавгунни цIусса миналий дурну къуртал хьусса къатравун агьали бизан баврил даву анавар дуккан дан багьлагьишиву.
Совещаниялий мукунма ххалбивгьунни хьхьичIва райондалул хъунаманал тапшур бувну бивкIсса масъалартту ссайн бивну буссарив.
