Лакрал райондалий, жагьилтурал политика хьхьичIуннай дансса райондалул программалул лагрулуву, Аьрасатнал Жагьилтурал кьини, Щардал шяраву хьунни аьдатравун дагьсса Лакрал райондалул жагьилтуращалсса даврил отделданул кубокрансса футболданул турнир.
Му хьунни Дунияллул халкь наркотикирттайн къаршисса кьинилун хасну, «Райондалул жагьилтал наркотикирттайн къаршину» тIисса акциялул лагрулуву. Сакин дурну дия турнир райондалул оьрчIащалсса ва жагьилтуращалсса даврил отделданул, спорткомитетрал ва райондалул оьрчIал спортшколалул цачIуну.
Турнирданий гьуртту хьунни 6 команда. Ххув хьунни ДЮСШ-лул команда, 2-мур кIану бувгьунни Хъурхърал шяраваллил командалул, 3-мур кIану – Гъумучиял мизитрал командалул.
Ххув хьуминнан ва хьхьичIунсса кIанттурду бувгьуминнан буллунни оьрчIащалсса ва жагьилтуращалсса даврил отделданул занази кубок ва арцуйнусса бахшишру.