ЦIусса дуккаврил шин дайдишайхту, Дагъусттаннал БакIчи Сергей Меликовлул резиденциялий, Тарки-Таулий зунтIиссар пагьму-гьунар бусса оьрчIру ялун личин бансса ва миннал чIарав бацIлансса республикалул центр «Альтаир». Центр зунтIиссар «Сириус» тIисса КIулшивуртту дулаврил центрданул журалий.
Цал архIал щалагу Дагъусттаннаясса 200 оьрчIаща бюхъантIиссар шикку элмулуцIун, искусствалуцIун, спортрацIун дархIусса украсса дарсирдай щябикIан.
Ухссавнил Ккавкказуллал хъамалушиннарал Миллатрал Ассоциациялул президент, Щалагу Аьрасатнал «Матери России» суккушиннарал МахIачкъалаливсса председатель, ДР-лул Хъуними классирттал дуклаки оьрчIал ва студентътурал советрал куратор Сефижат МахIаммадрасуловал бусласимунийн бувну, оьрчIавусса гьунарду кIул баншиврул, миннащал дуллалисса даврил даража гьаз бан аьркинссар, ххишаласса кIулшивуртту дулун цIу-цIусса технологияртту ишла дуллан аьркинссар.
– Гьунар бакъасса оьрчIру къабикIайссар, ми ашкара къавхьунур личIайсса, оьрчIащал зий бакъашиврийн бувну, – тIий бур С. МахIаммадрасулова. Ванил мукунма кIицI лавгунни, центрданул нитти-буттавун ва учительтуравун оьрчIавусса гьунарду ялун личин буллансса гъира бутан аьркиншиву.
