Аьдатравун дагьсса куццуй, Лакрал райондалий лахъа-хъунну кIицI ларгунни Учительнал кьини. Ва кьини Гъумучиял клубравун бавтIун бия райондалул учительтал, дуклаки оьрчIру, нину-ппу.
Дайдирхьунни шадлугъ райондалул магьирлугърал зузалтрал Лакку билаятрал Гимн щаллу даврия.
Райондалул бакIчи Юсуп МахIаммадовлул, кIулшиву дулаврил зузалт барча буллай, кIицI лавгунни ва байран, так ца учительтуран дакъасса, щала илданун бусравсса, ххирасса байран хъанахъишиву, цанчирча инсан чув ци къуллугърай зий ухьурчагу, ганал оьрмулуву учительнал агьамсса кIану бугьлай буну тIий.
— На зухь барчаллагь тIий ура зу бигьа бакъасса, амма бусравсса пиша язи бувгьуну, мунийн дакI тIайлану зий бушиврухлу. Зул даврилгу, щала оьрмулулгу мяънану хьуну дур хъун хъанахъисса ник тарбия даву, миннаву ватандалухсса ччаву дишаву. Зул захIмат мудангу пахрулун ва кьиматран лайкьссар, — увкунни Юсуп МахIаммадовлул.
магьирлугърал школалул хьхьичIунсса дуклаки душ Масуева Сабрина
Ванал бусаврийн бувну, хIакьину райондалий зий ур 280 кIулшиву дулаврил зузала. Вайннава 5 лайкь хьуну ур Аьрасатнал кIулшиву дулаврил министерствалул чулухасса ХIурматрал грамотарттан, «Дагъусттаннал бусравсса учитель» цIанин лайкь хьуну ур 30, «Дянивсса кIулшиву дулаврил хIурмат бусса зузала» цIанин лайкь хьуну ур 50, «Дагъусттан Республикалул кIулшиву дулаврил отличник» цIанин лайкь хьуну ур 43, 2 ур педагогикалул элмурдал кандидат.
[dropcap]М[/dropcap]уния махъ райондалул бакIчинал хьхьичIунну зузисса кIулшиву дулаврил зузалтран дуллунни Дагъусттаннал КIулшиву дулаврил ва элмулул министерствалул чулухасса ХIурматрал грамотартту, Барчаллагьрал чагъарду, мукунна райондалул администрациялул чулухасса ХIурматрал грамотартту ва арцуйнусса бахшишру.
КIулшиву дулаврил зузалт барча бан бувкIун бия КIундиннал школалул дуклаки оьрчIру. Райондалул магьирлугърал зузалтрал ва Мариян Дандамаевал цIанийсса Гъумучиял оьрчIал магьирлугърал школалул дуклаки оьрчIал ккаккан дурунни ххаллилсса концерт.
