ЦIуссалакрал райондалийсса ЦIуссалакрал шяраву Аьрасатнал Виричу Мутай Исаевлул цIанийсса гимназиялий хьунни оьрус мазрал ва литературалул дарсирдал учительтурал семинар.
Ми сакин бувну бия ЦIуссалакрал райондалул КIулшиву дулаврил управлениялул методический отделданул, «Человеческий капитал» приоритет проектрал лагрулувусса «Просвещенный Дагестан» тIимур бутIа дузрайн буккан баву мурадрай.
Учительтурал даврил даража лавай баву мурадрайсса давривух гьуртту хьунни райондалул оьрус мазрал ва литературалул учительтал, кIулшивуртту дулаврил идарарттал методический объединениярттал каялувчитал, кIулшивуртту дулаврил управлениярттал зузалт.
Семинарданий гьуртту хьуминнал ххалдиргьуну, кьиматру бивщунни «Подготовка к ЕГЭ. Комплексный анализ текста» тIисса 9-мур классраву Ф. АхIмадовал ва «Подготовка к ЕГЭ» тIисса И. Аьлибуттаевал дирхьусса тIиртIу дарсирдан. Мукунма вайннал хьхьичI «В гостях у Сергея Есенина» тIисса тIиртIу дарс дирхьунни 11-мур классрал учительница Г. Рамазановал. Лавайсса даражалий ккаккан бунни учительтурал цалла дарсру дишаврил бюхъу-гьунарду. Вай дарсирдан кьимат бишлай, кIицI лавгунни учительтурал, цIушиннарду ва технологияртту ишла дурну, уттизаманнул тIалавшиннарду биттур дурсса дарсру дихьлай бушиву.
Семинарданул даврил лагрулуву хьунни учительтуран маслихIатру ккаклакисса «ккуркки столгу».
Шикку, мукунма, ххалбивгьунни оьрус мазрал ва литературалул дарсру дишаврил даража лавай баву мурадрайсса личIи-личIисса масъалартту. МаслихIат ккавккунни учительнал школалул сайтрай цалва даврил опыт ккаккан буллалисса блогру сакин бувансса. Сакин дунни «Просвещенный Дагестан» подпроектрал лагрулувусса «Русскоязычный Дагестан» тIимур бутIа дузрайн буккан баву мурадрай дуллансса мероприятиярдал план.
Ахирданий вай давурттавух чялишну гьуртту шайсса цинявппагу учительтурахь барчаллагь увкунни КIулшивуртту дулаврил управлениялул методист Б. Кьурбановал.
