Каратэ Кёкусинкай спортрал ирглийсса ххувшаву ларсун бувкIунни ЦIуссалакрал райондалиясса ТIюхчардал шяравасса уссурвал — Арсен ва Руслан ХIаммадовхъул.
Имара Саидова
Каратэлул спортраву уттинингу цикссагу наградартту лайкь дурсса Арсен ХIаммадов ур СКФО-лул Каратэ Кёкусинкайрал федерациялул президент ва Аьрасатнал Каратэ Кёкусинкайрал вице-президент. Вай бяст-ччаллаву хьхьичIунсса кIану бувгьусса Руслан ХIаммадовгу ур ЦIуссалакрал райондалул 1-мур ДЮСШ-рал тренер-преподаватель ва «ИППОН» спорт-клубрал каялувчи. Уссурвал ХIаммадовхъал чIярусса шиннардий кекусинкай спортраву хIадур бувссар цикссагу цIанихсса спортсментал.
Гьашинусса шинал июнь зурул гьантрай Сочилий «Дагомыс» гъинтнил лагерьданий хьунни Каратэ Кёкусинкайрал семинарду ва аттестация дуллалисса экзаменну. Гикку гьуртту хьусса уссурвал ХIаммадовхъал тасттикь дунни каратэлул спортрал ларайсса даражалул магьиршиву.
Аттестациялул хIасиллу дурну махъ, Арсеннун дуллунни 7 Дан мухIлу ва Русланнун 4 Дан мухIлу.
Шиккува кIицI лаган, Аьрасатнаву каратэ кёкусинкайрал 7 даражалул мухIлу ларсъсса так нажагьссар бусса.
ХIакьинусса кьинигу кIиягу уссу хъунмасса захIмат бихьлай бур оьрчIру спортрахун машхул буллай, цала бюхъу ва кIулшивуртту миннан лахьхьин дуллай.