— Цал дагъ дан ишла дурсса аьгъу­шиву цукунчIав кIилчин ишла мадувару, шиву хIасул шайссар рак дай­сса канцерогенну. Гъунттуву цичIар ччуччин ритан къааьркин­ссар, ишла дувара дукра чIанулун къалачIайсса (антипригарная) тIахIни, щинаву шархьсса, цавура цирда шархьсса, къавур дур­сса, ссихIирай дурсса дукралийн кIурабаера.

— Маканарду чIярусса дикI, хIукуматрал ккурккимайрду (колбасарду). НакIлил продукты личIи дувара яла чансса аьгъушиву дусса, ягу аьгъу­шиву дурагу дакъасса. Зул дукралуву цуксса чIярусса дурив аьгъушиву, муксса тархъанну бикIайсса бур ракрал клеткарду.
— НахIу лачIун мадару кIурал дурсса (копченности) дукия. КIурал дуллалийни хIасул хъанахъисса пицI (смола) бюхъайссар инсаннал организмалун канцерогеннуну дацIан.

— Мадукари мяххи, гъама даркьусса, зия хъанай дайдирхьусса продукты. Агарда гьивч ягу ччатI зия хъанай байбивхьуну бухьурча, зия хъанахъимур кIану макьукьарича, щала экьибутияра. Так укунну зу буруччинтIисса мяххилуву хIасул хъанахъисса 100-я ливчусса загьрулул журардая. Масалдаран, ца вайннувасса афлатоксиндалул дайсса дур ттиликIрайсса рак.
— КьацIливун маласару кIирисса, кьацI ччуччин буллалисса дукия, цуксса зува ккашилну бунугу.
Урандалул азарунния буруччиншиврул хъинссар хъинну дарувсса кIяла жавжрал (имбирданул) настойка – хьхьичIарасса китайнал (тибетнал) рецептрай дурсса. Укун­сса настой даншиврул, 250 гр. кIяла жавжрал мархрал лавсун, ххуйну шювшуну, марцI бувну (ккири ливккун), кIюла-кIюлану бурувсуну, лисри дай­ссар. Хъундакъасса пюрундалул банка дуцIайссар гайннул, ялун ми дахьлаганцIа аьракьигу дутIайссар. Кьалакьигу ларкьуну, банка 2 нюжмардийсса дитайссар цIансса, кьавкьсса кIанай, чIумуя чIумуйн хъюлчугу дуллай, 2 нюжмардува диргьуну, 2 чяйлул къуса ницIалгу дишайссар. КIяла жавжрал настойкалул тонус гьаз дайссар, инсан таза уккан айссар, хъинну хъин­ссар ангиналул чIумал, аьвкъу-гъили хьусса чIумал, хъинссар яруннил чаннангу. ХIачIайссар ца-ца чяйлул къуса, дукра дукан хьхьичI гьантлун кIийлла. Ва настойкалул оь марцI байссар, цумур-цагу цIуцIавурттая буру­ччинсса гуж ххи шайссар.
Р.S. КIяла жавж (имбирданул мархха) цIана хъуни ттучаннай бахлай бур.