Зукьлу цир? Зукьлу – му цаннахь цаннал (куннахь куннал) тIутIисса, оьрмулуву тIайлабацIу, хайр хьуннав тIисса махърур.Зукьлурду бан шайссар кIива журалий: укунма ихтилатрайну ва балайрдайну (зукьлу-балай).

Цахьва зукьлу бувкун, инсан, цIуцIи дакIний малхIан бивхьусса куна, игьалагай­ссар, дуллалисса давриву лябукку хъанан бикIайссар, зунсса гъира гьаз шайссар. Зукьлу бай­ссар хъунаманал хъунаманаха ва чIивиманаха. Мюрщиминнал ва жагьилминнал мазрай зукьлу чанссар. Мунин савав духьунссар оьрму къаккаккаву, оьмунил ва хъинмунил дянив щала ттигу тIайлану дазу рищун къакIулшиву.
Зукьлу байссар, инсаннал дугърисса тIул дурукун. Чанну зукьлу бай ризкьилуха. Масала, хъирив къалавгна оьл шаппайн бучIарча, къарил учайссар: «Вия арулва бизивуй!».
Зайлий ягу зукьлулий дарцIу­сса дуниял дакъанугу, ми кIивагу бур антонимру. Миннул тIурча оьрму аьямну чIалачIи бай­ссар, диял дакъашиву духлаган дан кумаг байссар, бучIимур къабучIимуния личIи бан ла­хьхьин байссар.
Дагъусттаннал цайми миллатирттал халкьунначIа кунма, лакрачIагу зукьлурду чIявур. Ми сакин бувну бур так хьуну ччаврил формалий, гьарца зукьлулул ахирданийгу бур бутIа-суффикс «вуй» ягу «нав»: Вил жангу, бакIгу цIуллу бивуй! КкурчIа-чIирах оьрчIал чIурду чан къахьуннав!
Зукьлурдаву чIявуну ишла бувну бикIай «ина» тIисса хасъсса цIанинкIанаймур, цIанил, гъаншиврул, дулаврил падежирттай бивхьуну (ина, вил, вин). Ца-ца чIумал хьунабакьай аьмну бувсса зукьлу. Я ли­хъансса, я хъирив агьансса къабукканнав! ОьрчIал дард къа­ккакканнав!
Лакрал тIилисин поэзиялул анализ дурну дур Халил Халиловлул цалва сакин бувсса, 1989-ку шинал буккан бувсса «Магическая поэзия народов Дагестана и Северного Кавказа» тIисса луттираву (ххал бара «Вербальная магия в поэзии лакцев» тIисса статья).
Чан-кьансса бунугу миннуя бувсун бур Аьвдулмажид Къаяевлул, Юсуп Хайдакьовлул ва Курзи Къажлаевал чичрурдаву (луттирдаву).

Ихтилатрайнусса зукьлурду:
Вий кьини дацIивуй,
Вил ка тIиртIунийн диевуй.
Вил нитти-буттал гьав нурданул дуцIивуй.
Вил багьну, чил къабацIивуй.
Чил хьулух ацIлансса къабу­кканнав.
Я лихъансса, я хъирив агьансса къабукканнав.
Чил лавай бацIансса къабукканнав:
Зукьлу-балайрду:
Лирикийсса балайрдаву хьунабакьайссар зукьлулул журалий сакин бувсса, личIи-личIисса темардайн багьайсса балайрдугу. Миннуву дур инсантуран талихI, тIайлабацIу хьуну ччисса, чIа тIисса калимар­тту. Миннул инсан кIилчинмур рухI дукIлакIисса куна айссар, дакIнил аргъ гьаз дайссар, хияллаха зузи дайссар, умудирттайн вихшала дихьлахьи айссар.

Душрув, мурад булуннав!
Вирттал, талихI булуннав!

Вил чIу чIутIул шивуй,
Чу мурчал шивуй,
Ссавний парандарал
Турлил мицI шивуй!

КIяла ларзулу ххуй душ
Цумур ниттил бурдивав?
Цумур ниттил барчагу,
Лякьа ттиркьюкьал хьуннав!

Зукьлу-балайрдаву рифмардах хъунмасса ургъил бувну бакъар. Хьунадакьай тикрал бавуртту, лащан бавуртту, метафорарду.

Бюхттулний кIяла ларзу
Цу усттарнал дурдивав?
Цу усттарнал дарчагу,
УрчIа ка мусил хьуннав!

Дуаьрду

Ихтилатрайнусса зукьлурдал ва дуаьрдал кунния куннил личIишиву дакъар. Мунихлуну вайннуйн жува учинну дуаьрду-зукьлурду куну.
Дуаь – му, цумур-дунугу аьдат дуллалийни, буккайсса текстри, дуллалимур, хъанахъимур, ялун бучIантIимур инсан рязи­сса куццуй хьуннав тIисса.
Бусурманнал динчитурал дуаь ккалли дайссар диндалул ттурцIан, лухччи-ссавнил нурданун. Миннахь цIуххирча, дуаьлул бакъа бала яла гьан къабайссар тIар.
Дуаь дан аьркинну дусса дур хьхьичI цахара, яла – нитти-буттаха, оьрчIаха, гъанминнаха, уссурссуннаха, хъирив бувминнаха. ХIатта оьбала бувманаха дуаь дурнугума хъинссар тIар.
ЧIиринугу, хъуннанугу, дуаь дуккин къакIулсса оьрмулул угьарасса (улу жагьилмагума) инсан жучIава къаикIайссар. Жулва учайссар, ттуршра дуаьлува ца тIайла дацIарчагу, мугу хъунмасса ишри, куну.
Дуаьлул ххуттардил кьарал дакъассар. Ми бюхъай­ссар бикIан гьарца ххуттай ря­ххунния байбивхьуну ацIния кIиннийн бияннинсса слогру бусса. Дуаьрдаву хъунмур иш, дуллалимуницIун кабакьа тIий, Аллагьнахь миннат буллалавур.
БивкIу-буккулий ххуйну дуаь дуккин бюхъайсса, шай­сса инсантал гьарца шяравугу бивкIссар. Миннаватусса цар бивкIсса ГьунчIукьатIатусса Исубуттахъал Башарат Аьлил душгу. Ганил дуккайсса диркIссар укунсса дуаь.

АьлхIамдулиллагь, щукру Аллагь,
Гьарза баннав, чан къабаннав,
Ккашил кьимат кIул къабаннав,
Дигьалагру ва цIуллушиву дулуннав.
Къаччинан ччикун къахьуннав,
ЧчинацIа махIрум къабаннав,
Дакъану аьсив къабаннав,
Дуну бахил къабаннав,
Аьсивсса умматиннавух бизан нясив къабаннав.
Неххаща, ххюлуща,
Дужагьирал цIараща,
Гьаттал аьзавраща,
Оьсса чувнал мазраща,
Ххувсса чувнал канища,
Загълиннал зулмулуща,
Пасикьнал макрулуща
Ина буручча, Аллагь!

Бурганну ва текстрах. Ци дур ваниву? Шиву бур ца журалул члентру, оьвчаву-обращение, гьарца хха – калима, цурдагу кутIа калима. Дур шиву ттявха тIий баллалисса рифмагу. Дуаьлул дачIи дуккин аьркинну дур цал ссихI лавсун, му­къурттил чарсса дуккайсса кунна. Экьинай бур махъру, яни цичIав захIматшиву хъанай дакъар дук­лакиминнан, ххуйну баллай бур вичIи дирхьуминнал вичIан.
Ва дуаьлул форма балайлучIан гъансса дур. Ванищала дур дуаьрду щала ихтилатрайнуссагу. Масала, хъинбалдарай, хъиншиврий дукан нясив даннав!
Та дайсса диркIссар ( цIанагу дайссар) жучIара дуаь? Дуаь дайсса диркIссар, гьарца ша лавстари тIиссакссагу: дукра канан айивхьукун ва къуртал хьувкун, хъатIи буллалийни, хъу дугьлагьийни, ттихIлахIийни, бивкIулий, хIайван машан ласласийни ва бихлахийни, цIусса янна-ус лархни. ХIасил, шаттирал бакIрах. Дуаь дикIайссар паракьатсса оьрму, дакьаву, цачIу-чIарав бацIаву ччишиву бусласиссагу. Мукунсса дуаьрдал хъуннасса агьамшиву диркIссар, куннан кув бувчIлай, инсантал тарбия бавриву. Дуаьрдал инсантал оьмуния махъун бищун байсса бивкIссар.

Дуаь
Къатлуй барачат бишиннав,
БакIрай давран бацIаннав,
ДаймуницIун ка бакьиннав.
Чих ялугьисса оьрму къабу­чIан­нав!
Дакъану аьсив къабаннав,
Дуну бахил къабаннав.
Жухавар тIий чийха зий къаля­къиннав!
Дунияллул неъмат булуннав.
Мукьвагу мурцIу тIитIиннав.
СситтучIа ссавур,
ХъусличIа аькьлу булуннав!
Оьсса чувнал ябахIиннав.
Хьхьунил балаллуща буруччиннав,
Кьинилул мусиватраща буру­ччиннав!
Гьидаят Мудунова,
филологиялул элмурдал
кандидат