Августрал 29-нний Ккуллал райондалул администрациялул залдануву хьунни ганиннин августрал 26-27-нний цаппара шяраваллаву чявхълул зараллу биян бувсса иширттан хасъсса батIаву. Му дачин дурну ия райондалул бакIчинал хъиривчу Чаринов МахIаммад.
ХIажимурад ХIусайнов
Ва батIаврий гьуртту хъанай бия райондалул администрациялул отделлал бакIчитал, шяраваллал администрациярттал хъуними ва цаппара идарарттал каялувчитал. Ккуллал ва Лакрал районнал дазуйсса Къимизу зунттуха бувксса чявхълул вирххулул Къяннал, Вихьуллал, Хъювхъиял, Ссухъиящиял, ЦIуйшиял шяраваллал хъуруннай дургьусса бакIлахъия зия дунни, муххал магъив ларсунни, магъайсса шифердай ккутIру дурну, кIурчIулттив дунни. Ххуллурдай хьунабакьлай бия чявхълул бивчусса чIелмулт, хьхьиру ва цаймигу лелуххант. Ца бахтти цивхьур учирча, цанма инсаннан зарал къашаву хьунни.
КIицI дурсса шяраваллал хъуниминнал бусаврийн бувну, сайки ххюрагу шяраву ттуршунния лирчусса къатран зарал хьуну бур. БатIаврий цалийн бувкIуна зарал бивсса шяраваллаву сакин буван аьркиншиву ва балаллул биян бувмур жям буллалисса штабру.
Цала пикрирду кIибавчIуна Вихьуллал шяраваллил хъунама Сулайманов СайкIул, Хъусращиял шяраваллил хъунама ХIажиев Эдуардлул, Ккуллал райондалул администрациялул вивсса политикалул отделданул бакIчи Хизриев Шамххаллул, Ккуллал райондалул финотделданул бакIчил Амучиев Кьурбаннул, райондалул УО-лул хъунмур ХIаммакIуева Альбинал ва цайминнал. ХIукуматрал чулуха укунсса чIумал кумагран дулайсса харж-хурж тIалав дуваншиврул кIицI буллай бия къатрал чара бакъа «зеленка» ва гай страховать дурсса чагъарду бикIан багьлагьишиву. Мукунма дугьайсса хъурунналгу. Амма, вичIи дирхьусса чIумал, ми «чагъарду» бакъашиву чIалай бия.
Банмур цир тIисса суал хIасул хьусса чIумал, циняв бия райондалул вив шяраваллал бакIчитурал цанма цала кумаг буварча бакъа, щилчIав кумаг къабуваншиву кIицI буллай. Бия пикрирду цIана нанисса бувчIавурттавух гьуртту хъанахъисса депутатътал хьун ччиминналгу кабакьу буван аьркинни тIиссагу. ЧIаланссар вания гихунмай ци шайрив.
