Агь, ттул ниттил маз, ттул къюкI, ттул рухI, ттул миллатрал ххазинай! Ва гьалаксса, дурчIин къашайсса чIумул ххурххуппалуву вин ккаклакицири.
ХьхьичIуннайсса шиннардий кIюрххил кьатIув бувккукун баяйссия жюр-жюр тIисса щаращул чIунийсса ниттил мазрайсса гъалгъа. Инсантал, хъунимигу, мюрщимигу, бикIайссия «Бивзрув», «Бурув», «Цукун буру?» тIий. Утти тIурча, циняв бур кувннащал кув оьрус мазрай жапрай.
[dropcap]В[/dropcap]а даражалийн ниттил маз биян бивтсса жуйнна хъуннасса нааьна данссар ялун нанисса никирттал. Бухлагарча ниттил маз, бухлаганссар миллатгу, тарихгу, маданиятгу, жула миллатрал дурсса виричушивурттугу.
Ниттил маз инсаннал оьрмулувун буххайссар ниттил ккуккулул накIлищал. ОьрчIал кIанугу гьуркку буллай, ниттил учайсса балайгу, дайсса саннардугу, бусайсса магьригу, аьрххилийн-ххуллийн уккайни дайсса дуаьгу – цимурца дакIний личIайссия ниттил мазрай – нацIуну, тIааьнну. Амма цIана чIявуми кулпатирттаву кувннащал кув гъалгъа тIий бур оьрус мазрай.
[dropcap]М[/dropcap]аз ябаврил ва тарбиялул ца яла хъунмур бутIану хъанай бивкIссар ккурчIа, ми цивппагу гьарца махIлалий ца-ца бивкIссар. Бартукьругу лавххун, щябикIайсса бивкIссар чарттай ягу тIаннуя дурсса улттай, бавмур-ккавкмур буслай. КкурчIа бувсса арамтурал лагма-ялтту тIуркIу тIий, вайннах вичIилий бикIайсса бивкIссар мюрщи оьрчIругу. Мюрщи оьрчIан шикку лахьлай бивкIссар чIивима хъунаманал лувату изан, оьрмулул хъунаманал хIурмат буван, тIул дакъашиву къадан, насихIат лаласун. Шиккува байсса бивкIссар личIи-личIисса тIуркIурду, бяст-ччаллу. Дуссухун бавтIукун бикIу, ккурчIав бикIу гьарца ихтилатгу буллай бивкIссар так ниттил мазрай. Утти вай ца затгу дакъар, ичIунмай батIайхту бикIу, кьатIув бикIу, «вай-файрду», «ваццапру», телефонну, планшетру, ноутбукру….Вай гьарзатгу – оьрус мазрай. Чари, туну, яла ниттил мазгу лахьхьинтIисса?
Леххаву, инсантал,
ттул зухь миннатри,
Ябара ниттил маз,
ци ликкарчагу –
Буттал буттахъая
ирсирай бивсса,
Ттюнгъасса, иминсса,
экьинанисса!
Даниял Кьурбанов,
ш. Урими
