Почталул кьинилул хьунийн
Почта инсаннан хъинну аьркинсса идара бур. ТIайлар, утти интернет дурккун махъ, ванил давуртту чан хьуну чIаларчагу, почта бакъарив пайда бакъар.Ккуллал райондалий бур мукьва почта: Хъусрахь, Ккулув, Ваччав, Вихьлив. Хъусращиял, Ккуллал почтарду цала шяраваллан хасъсса бур. Ваччиял почта СумбатIуллал, 1-мур ЦIувкIуллал, Ваччиял, ЧIяйннал, Хъюйннал, 2-мур ЦIувкIуллал, ЦIущуллал аьркинлугъру щаллу дуллай бур. Вихьуллал почта Вихьуллал, Ссухъиящиял, ЦIуйшиял, Къяннал, Хъювхъиял аьркинлугъру щаллу дуллай бур.
Почтардал каялувчитал ва шикку зузисса почтальонтал хIарачат буллалисса зузалт бур. Вай мукунсса бушаврил барашинна дуллалишиврун хIисав бан бучIир, Дагъусттаннай яла гьарзану «Илчи» кказит чичайшиву Ккуллал райондалий. Ми бикIай 500-ннийн бивсса.
ХIакьину ттун ихтилат бан ччива ца почтальонная. Ва цуппагу зий бур Ваччиял почталий. Ва бур Пикьаева Рая Муртазааьлил душ. Дурусну гьашину ванил почталул даврий зий хъанай дур 36 шин. Явара ми чансса шинну дакъассар, цирдагу, шяраваллил кIичIирттавух занай, инсантурал къатта-къушайн хаварду биян буллалисса давур. ТIайлар, Ваччиял шяравалу муксса чIявусса инсантал яхъанахъисса дакъар. Амма шикку бур циняв райондалул идарартту.Ваччиял шяравалу хъанай дур Ккуллал райондалул Хъуншяравалуну. Раял, цавай кказитру ва чагъарду инсантурачIан биян баву дакъагу, бачIай пенсияртту ва коммунал хIаллихшиннардал арцугу. Ххишалдаран, ттунна ваний ялагу дакI дакьаву ци дикIай учирча, ванил хъинну хIарачат бай Ваччиял шяраву ва идарарттай жула кказит чичин баврил ххуллий. Ялагу, ванил Ваччиял почталувун духхайсса вайми шяраваллал почтальонтуращалгу дахIаву дурну, гиккусса кказитру ца шинал чивчуминнуяр чан хьун къабитан маслихIат бай.
Пикьаева Рая бувну бур Ваччиял шяраву 1957-ку шинал. Къуртал бувну бур 1975-ку шинал школа. Ганияр махъ бувккуну бур бухгалтериялул давурттацIун бавхIусса курсру. Зий бивкIун бур бухгалтерну,ттучандалий, оьрчIал багъраву. 1984-ку шинал бувкIун бур зун Ваччиял почталийн. Утти махъсса шиннардий почтальоннал давуртту дулларчагу, ванил почталийсса циняв давуртту дайсса диркIун дур. Рая цуппагу дакI хъинсса, цила даву кIанийн дуртун дайсса зузала бур. Ттунгу ва чара бакъа аьркинсса инсан бур. Ванил ттухь бусай цумур идаралул хъунаманачIан цукун гъан хьун аьркинссарив ва ганал хасиятраягу. Лархьхьуну дур ванин кказит чичайсса инсаннал циняв хасиятругу. Кулпатравугу Рая хъиннува ххуйсса инсан бур.
Ванил ласнайн Анвар учай. Ва ЧIятусса ур. Вайннал хъуни бувну бур ца арс ва кIива душ. Шамагу цала-цала ххуллурдайн буккан бувну бур.
ДакIния лавгун бакъар Рая почталул хъуниминнангу. Ва бур Аьрасатнал почталул яла лахъмур «Мастер Связи» тIисса лишандалун лайкь хьуну. Бур ва мукунма захIматрал ветерангу. Дуллуну дур цайми бахшишругу, хIурматрал грамотарттугу.
Ялун най дур почталул зузалал кьини. Жувагу чIа учинну жула кказитрал ца хъар дургьуну нанисса Раян цIуллушиву, оьрчIая чани ккаккаву ва Аллагьнал буруччаву.
