ЦIуминалийсса ТIюхчардал школалий хъанахъисса цумурцагу мероприятие лавайсса даражалий лагай. Мудангу гъирарай бучIару жу ва школалийн.
Гьар мудан кунма, гьашинугу хъинну ххуйну лавгунни шикку ниттил мазрал кьинилун хас бувсса мажлис.
Цала байрандалий гьурттушинна дан вайннал оьвчай шаэртурайн, ниттил мазрал дарсирдал учительтурайн, редакциялул ва миллатрал зузалтрайн. Гьашинусса байрандалийгу гьуртту хьунни Дагъусттаннал халкьуннал чичу Мирза Давыдов, Дагъусттаннал Чичултрал союзрал лакрал секциялул хъунама Илияс МахIаммадов, Лакрал театрданул директор МахIаммад ХIусайнов, МахIачкъалаллал 16-мур школалул лакку мазрал дарсирал учительница ПатIимат Аьлиева.
Дуклаки оьрчIру бувххунни залданувун зюннав-дачIулущал, лакку дукрардал ланжарттащал. Ва кьини шикку цинявппагу учительталгу, бувкIсса жяматгу ларххун бия лакку зумуну, ца даркьуну дияхха душваврай бавахъал буттукьирттавасса цаннияр ца авурсса лачакру.
Байран дайдирхьунни лакрал гимнрайну. Мажлис бачин бувну бия байрандалул сакиншинначи, ва школалий лакку мазрал дарсру дихьлахьисса Оксана Дадаева.
Хъамалгу, дуклаки оьрчIругу барча буллалисса ихтилат бунни школалул директор ШайхахIмад Дадаевлул.
Ниттил маз яла пасихIмур шеъри, яла бюххаймур балай бушиву, миллатрал рухIгу, ххазинагу хъанахъишиву бусласисса ихтилат бунни Мирза Давыдовлул.
Дуклаки оьрчIал хIадур дурну дия авадансса программа. Миннал асар хьунну ккаккан бунни «Аьрая къаувкIсса арснахасса ниттил зума» тIисса Абакар Мудуновлул назмулувасса парча, дурккунни назмурду, увкунни балайрду. Лакку мазрал байран лахъа-хъун дунни ва школалущал дусшиврийсса хIала-гьурттушиву дусса лакрал театрданул артистътурал.
