Февральданул 7-нний Ккуллал райондалул актовый залдануву хьунни райондалул УО-лул райондалийсса школардал давурттив ххал дуллалисса совещание. Му дачин дурну ия Ккуллал райондалул бакIчи Сяид Сулайманов.
ХIажимурад ХIусайнов
Шиккува гьуртту хъанай бия райондалул УО-лул хъунама АхIмадов Шамил, райондалул бакIчинал хъиривмур Илиясова Сабрина, школардал, оьрчIал багъирдал директортал, завучтал, школардал учительтал, УО-лул пишакартал.
Совещание тIитIлай, Сяид ХIасниевичлул увкуна: «На хъинну къарязину ура администрациялул Информационно-аналитический отделданул райондалийсса школардай дуклакисса оьрчIан кIулшиву дулаврил даву ххал дурну махъ чIалан бивкIсса иширттая. Дагъусттаннал кIулшиву дулаврил хIисавравун ласайсса иширттал чIалачIи бунни, дукIу жулла райондалул УО 28-мур кIанай бивкIхьурча, гьашину 51-мур кIанайн багьну бушиву».
Залдануву дирхьуну дия циняв школардал «ккаккияртту» чIалачIи дуллалисса интерактив доска. Ихтилатру райондалул бакIчинал, УО-лул хъунаманал хъинну кьянкьасса, чIярусса аьй-бювкьурду дуллалисса бия. Ва багьана, та багьана буллай, интернет зий дакъар тIий, школардая чара бакъа дучIан аьркинсса информациялул зумунусса чагъарду цила чIумал дузал къабуллай бушиврияту буслай бия. Ванийну школардал директортурай аьйб дусса дия. Интернет къазузисса чIумал школардаясса информация флешкалий чирчуну интернет зузинияту тIайла дуккан багьлай бунува баччибакъулшиву дуллай бушиву. Ялагу вара баччибакъулшиву учинссарив ци чинссарив къакIулну цала гьан дурсса школардаясса информация тIайла дуркнийн дирну дурив, къадирну дурив телефондалувухвагу оьвкъачайшиврия буслай бия. Райондалул УО-лул хъунаманал АьхIмадов Шамиллул кIицI бувуна: «Цакьнива школардал директортал хIисав буллай бивкIхьурча гаймий учительтуращал педагогикалул зузалтну, утти вай хIисав буллай бур цIусса законналийн бувну, хозяйство дачин дурсса бакIчитуран», — куна. Райондалул вив предметирттал олимпиадарду дуллалисса чIумал хъинну ялавайсса баллу ласлай бушиврияту ихтилат бия. Улу 40-50 бал ласунсса кIанттай бувагу 2-5 бал бусса бия оьрчIал ласлай. Ва иширал буслай бусса бия учительтурал оьрчIру хIадур буллай бакъашиву олимпиадардайн. Хъинну яларайсса душиврия буслай бия школардайсса кIулшиву дулаврил чулиннайсса низам. Такну Сяид ХIасниевичлул кIицI бувуна Вихьуллал шяравусса иш. «Вихьлив бур дянивмур даражалул школа, искусствалул школа, спортрал школа, библиотека. ХIисав бувсса чIумал кIюрххия кьунниялнин ца кIанай дакъахьурча гамур кIанай цукун дунугусса мероприятие дикIан багьлай бур. Бюхъай дикIайсса дикIан, амма дакъар цукунчIавсса информация ва олимпиадардай хьхьичIунсса кIантту бувгьусса ишру».
УО-лул хъунаманал АхIмадов Шамиллул кIицI бувуна: «ТтучIа столданий дур ацIниясса ходотайстварду школардайсса учительтуран «ХIурматрал цIарду», — дулара тIисса. Ци хIурматрал цIардур дулайсса? Чув дур миннал дуллалисса давурттив? Цавагу школалул цалагу дурдив учительнал усттаршиву ппив дуллалисса тIиртIусса дарсру? Циванни му учительнан къабучIисса цала даву ккаккан дуван цайми школардаятусса учительтурайн, дуклаки оьрчIайн оьвкуну? Чара бакъа кIицI буван ччива бурхха гьарца школардай автобусру. Гьан бувну ми автобусру чIаххувсса шяравусса школалийн, бувцуну мичча учительтал, оьрчIру цала даву циванни къабучIисса ккаккан дуван?
Ихтилатру хьуна школарду луттирдал, партардал, цайми аьркинлугъирттал чулуха ци аьркинссарив чувчIав сияхI лякъин къахъанахъаврия. Иширах бургарча ваца гьарца задирттал дузалну буни кунмасса иш хъанай бур тIий бия. Райондалул УО-лул къуллугъчитал цивппа бавхIусса школардайн чанну бакъа къалаглай бушиврияту буслай бия. Вайннал школалул директортуращал дувансса давурттал плангу дурну, цивппагу гьуртту хьуну оьрчIан кIулшиву дулаву хъит учин дуван багьаврия буслай бия. Вай шинал мутталий учительтурал цала буржру багьайсса кьяйдалий биттур къабуллай бикIаврийн бувну, шинал ахирданий дулайсса ЕГЭ — лий вайннал учениктурал лавсъсса чансса баллал буслай бур тIива учительтал цукун зий бивкIссарив шинал мутталий.
Ихтилатру бувуна: ЦIуйшиял школалул директорнал ПаттахIов ПатахIлул, УО-лул зузалал АхIмадов Нуруттиннул, ЧIяйннал оьрчIал багъирал хъунмунил ХIаммакуева Альбинал, Ккуллал 1-мур школалул директорнал Къянчиев Русланнул, ЦIущарнил школалул директорнал АхIмадов МахIаммадлул, УО-рал хъунама специалистнал Оьмаров МахIаммадлул, Ккуллал 2-мур школалул директорнал хъиривманал Ризванов Кьубанчил, УО-рал специалистнал ХIусайнов Юсуплул, Вихьуллал школалул директорнал МахIаммадов Аьлиллул ва цайминналгу.
Совещаниялул жям дуллай кIул хьуна Ккуллал райондалул школардай увагу 1200-бивсса дуклаки оьрчIру бушиву. Мунин бувну гьарца школалий багьайсса кьяйдасса штатирттал чулуха дузалшиву духьувкун, цукунчIавсса «марцI чIаллаха» цивппа лащин буллалишиву учительтурай къадикIан аьркиншиврия буслай бия. Дуккаврил шин къуртал хьун лирчIсса чIумуй лаваймий классирттал оьрчIал ялув бавцIуну, вай ЕГЭ-лийн хIадур буваврил давурттив щурущи дуван багьлагьишиву кIицI бувуна. Аькьлу-кIулшилул чулуха учительтал хьхьичIсса ххуттайсса инсантуран ккалли бувайсса бухьувкун, цала ялув цивппа бавцIуну хIарачат буллан багьлай бушиврияту буслай бия, цайми районнаяр жуламур районгу хьхьарану къадикIаншиврул.
