Августрал 18-нний Ккуллал райондалул Аьрасатнал халкьуннал аслийсса культуралул центрданул залдануву хьунни Терроризмалийн къаршисса комиссиялул ирглийсса батIаву.
Ва батIавриву гьуртту хъанай бия: Ккуллал ва Лакрал цачIусса полициялул хъунама МахIмудов Марат, Ккуллал райондалул бакIчинал хъиривма ХIажиев Эдуард, УО-лул хъунмур ХIаммакуева Альбина, райондалул бакIчинал пресс-секретарь ва маслихIатчи Хизриев Шамххал, Ккуллал райондалийсса Роспотребнадзорданул хъунама хIакин Тариев ХIажикьурбан, шяраваллал бакIчитал, школардал, оьрчIал багъирдал директортал ва цаппарасса жяматийсса ишккаккулт.
Ккуллал райондалий терроризма къахьун дитансса хIуччардая гьарта-гьарзану ихтилатру бувна МахIмудов Маратлул, ХIажиев Эдуардлул, ХIаммакуева Альбинал, Хизриев Шамххаллул, Тариев ХIажикьурбаннул, Ккуллал 2-мур школалул директор Мурачуев Аьбдуллул, ЦIуйшиял школалул директор ПаттахIов ПаттахIлул ва цайминнал. Ихтилатру буллалими ца зумату кунма тIий бия хъамабитан къабучIишиву Бесланнай хьуну бивкIсса иш, терроризма гьарца мудан къашайшивуча, цал шайшиву, мунияту бурувччуну бикIан аьркинишиву. Заллу акъасса кьуцури, чантайч ув-бунугу ххал хьурча, баян буван багьлай бушиву райондалийсса диспетчерский пунктрайн. Вайннал аьмсса номер бусса бувсуна 112.
КIицI бувна МахIмудов Маратлул школардай, оьрчIал багъирдаву цIу къадагьан ялув бавцIуну бикIан багьлагьишивугу, оьрчIахь бусан аьркиншиву, цичIав бахханасса иш хIисав хьурча, «тревога» баян буллалисса кнопка чув буссарив, бувчIин буван аьркиншиву га кнопка тIуркIу тIун бивхьусса бакъашиву, иш багьний кIисса бизан бакъа. Гьаз бувна цаймигу масъалартту.
