ЦIуссалакрал райондалий ххалбивгьунни цуксса мюхчанну бурив чIявусса инсантал бусса кIанттурду террорданул иширттая.

Ми ххалбигьавуртту ларгунни «Безопасный Дагестан» тIисса приоритет проект щаллу дуллалисса давурттал лагрулуву. ЦIуссалакрал райондалул бакIчинал хIукмулийну, райондалий сакин бувну бур ляличIисса агьамшиву дусса, ххишаласса нигьачIаву дусса ва чIявусса ин­сантал бусса кIанттурду ххалбан­сса комиссия. ЦIакь дурну дур мукунсса кIанттурдал сияхI. Ккаккан дурсса графикрайн бувну, ххалбувну бур ми кIанттурду цуксса цIакь бувну ва мюхчан бувну бурив террорданул иширттая. Комиссиялул ххал бувну бур чIявусса инсантал бусса 46 объект: кIулшивуртту дулаврил, медициналул, культуралул идарартту. Ва давриву гьуртту хьуну бур кIицI ларгсса идарарттал администрациярттал вакилталгу. Ххалбигьавурттал чIалачIи дурну дур ва масъалалуцIун дархIусса цаппарасса диялдакъашивуртту.
КIицI ларгсса цаппара ида­рарттай къалявкъуну бур ле­ххаву рутайсса кнопкартту, ца­ппарассанначIа къабивкIун бур террорданийн къаршисса давурттал документру ва мукунсса нигьачIаву дусса чIумал зузалт цукун занакьулу бикIан аьркин­ссарив ккаккан бувсса инструкцияртту.
Цинярдагу диялдакъашивурттал хIакъираву актру чивчуну, тIайла бувккун бур идарарттал каялувчитурачIан, ми дукьан дансса чаран лякъин. Мира актру тIайла дурккун дур шяраваллавусса террорданийн къаршисса комиссиярдайнгу.
— КIицI ларгсса идарарттал хъирив цаймигу нигьачIаву хъуннасса объектру, хаснува заправкартту, ххалбансса пикри бур. Ми давуртту дуллай байбивхьуссар, — тIий ур ЦIуссалакрал райондалул хъунаманал хъиривчу, коми­ссиялул председатель Гайирбек Мусаев.