Ларгсса нюжмардий Лакрал райондалул бакIчи Юсуп МахIаммадовлул каялувшиндаралу администрациялий хьунни райондалул террорданийн къаршисса комиссиялул батIаву. Муний ялагу гьуртту хьунни Лакрал ва Ккуллал районнал прокурор Светозар Оьмаров, Аьрасатнал МВД-лул «Лакский» МО-лул каялувчи Юсуп Амиров, идарарттал каялувчитал, шяраваллал бакIчитал. Микку ихтилат бия 2016 шинал дурсса давурттал хIасиллая ва 2017 шинал хьхьичI бихьлахьисса мурадирттая.

БатIаву тIигу-тIиртIуну, дачин дурну ия Юсуп МахIаммадов. Цала ихтилатраву ванал кIицI лавгуна райондалул террорданийн къаршисса комиссия зий бушиву низам дуруччай органнащал, кIанттул цилакаялувшиндарал органнащал ва жяматращал цачIуну, ДР-лул террорданийн къаршисса комиссиялул хIукмурдацIун ва даврил планнацIун бавкьуну.
Бувсунни хъунмур къулагъас дурну диркIшиву«Комплексный план противодействия идеологии терроризма на 2012-2018 годы в РФ», «Информационная программа противодействия идеологии терроризма и экстремизма на 2012-2016 годы» лагрулувусса мероприятияртту даврих ва «Об утверждении требований к антитеррористической защищенности мест массового пребывания людей и объектов, подлежащих обязательной охране полицией» тIисса Аьрасатнал Федерациялул ХIукуматрал хIукмулух.
Шяраваллаву, школарттай террорданийн къаршисса комиссиялул дурссар дуклаки оьрчIащалсса ва агьалинащалсса хьунабакьавур­тту. Микку ххал бивгьуссар терроризмалул ва экстремизмалул идеологиялийн къарши бацIаврийн багьайсса суаллу. Ми суаллайн дагьайсса материаллу рирщу­ссар райондалул ва республикалул СМИ-рдайгу.
Юсуп МахIаммадовлул кIицI лавгунни профилактикалул даву, так сияхIрайн лавсминнащал бакъа, цинявппа жагьилтуращалгу багьлай бушиву чялиш дан.
Идарарттал каялувчитурахь ва агьали давурттал щаллу баврил центрданул зузалтрахь къула­гъас дувара увкунни жагьилтал бю­хъайссаксса давурттал щаллу бан, цала пишалий зунсса кIанттурду бакъами кIилчинсса пиша ла­хьхьин тIайла буклан, шяраваллил хозяйствалуха зузи бан. КIицI лавгунни спонсортурал кумаграцIух ля­къин багьлай бушиву буллай байбивхьусса спортплощадкарду къуртал бансса каширду.
Райондалул террорданийн къар­шисса отделданул каялувчи Щамххал Сайпуллаевлул бувсунни 2016 шинал дурсса, ялун нанисса шинаву дан ккаккан дурсса давур­ттая. КIантту-кIанттурдайра дурну дур низам дуруччай органнал зузалт ва жяматрал вакилтал гьур­ттусса батIавуртту. КIулшиву дулаврил идарарттай дурну дур террордания мюхчан баврийн дагьай­сса ххал бигьавуртту, цаппарасса школарттай ялун лирчуну дур диялдакъашивуртту. Ми школарттай ялув бунни 2015 шинал Аьрасатнал Федерациялул хIукмулуцIун бавкьусса тIалавшиннарду би­ттур дан.
Терроризмалул ва экстремизмалул идеологиялуя буруччинсса давурттал ялув ихтилатру бунни Светозар Оьмаровлул, Юсуп Амировлул, райондалул администрациялул пишакар Надир ХIасановлул.

Терроризмалул идеологиялийн къаршисса хьунабакьаву хьунни КIундиннал школалийгу. Муний гьуртту хьунни райондалул администрациялул оьрчIащалсса даврил ва туризмалул отделданул каялувчи МахIаммад Гадаев, «Лакский» МО-лул балугъравун къабивминнал иширтталсса буллалисса инспектор Нураттин Амиров, райондалул имам Шагьмурад ХIажимурадов, «Ххяххабаргъ» кказитрал редактор Мусалав Мусалаев.
Вайннал ихтилат бунни терроризмалул ва экстремизмалул идеологиялуясса жяматрансса нигьачIаврия ва муния мюхчан хьунсса чаранная.